Aalisagaguppit? Kalaallit Nunaanni eqalunniarneq

Kalaallit Nunaanni eqalunniarneq nunap timaani pinngortitami qaqqat qooruini kuunni tikinneqajuitsuni pisarpoq. Aasaq naallugu kusanartunik eqalunnissaq periarfissaqarpoq. Juunip qaammataani aalisakkat tatsinit kuunnillu kangerlunnut sisullutik imaanut puallarserlutik neriartortarput, augustillu qaammataani majortarlutik. Nunap sineriaani neqitaasat kaavittut qarsorsallu atussavatit kuunnilu qissattaruit neqitaasat kaavittut niviugaasallu atussallugit.

Nunatta Kitaani eqalunniarneq
Illoqarfiit Sisimiut, Maniitsoq imaluunniit Kangerlussuaq aliikkutaralugu aalisariarfissaqqissoqarluarput, kuuit tikinneqarpiarneq ajortut inunnit 6-12-iinnarnit aalisarfigineqartarlutik. Aalisariartarfiillu pinngortitami kusanassutimigut asseqanngitsumiittut timmisartumik angallammilluunniit tikinneqartarput.

Nunatta Kujataani aalisarneq
Kujataaliaruit eqalunniarfissaqarluarpoq. Kujataani kuuit eqaloqarluarmata taqqanna Kalaallit Nunaata nerisassanik pequmaasivianik taaneqartarpoq. Juulip qiteqqunneraniit septembarip tungaanut Tunulliarfimmi qissattaammik aalisarnissaq periarfissaqarluarnerpaavoq.

Aliikkutaralugu eqalunniarneq
Nalinginnaasumik eqaluit nerisassaqarfiulluartuni siumugassaasarput. Immami aalavallaanngitsumi avaleraasalu tarrisimasinnaaffiani. Eqaluit qeqertaaqqat sinaanni, sarfaqarfinni aammalu kangerluit paavini kangerluaqqani sarfamut oqqisimaarlutik ilinnit pisarineqarnissartik utaqqisutullusooq uninngaartarput.

Kalaallit Nunaanni qissattaammik aalisarneq

Oqummersat immikkut sanaat atorlugit qissattaammik eqalunniarneq misilikkusuppiuk? Tamanna Kalaallit Nunaanni periarfissaqarluarpoq! Kalaallit Nunaani kuuit mingoqanngilluinnarlutik ersareqqissaartumik imallit, tikinneqarpiarnerlu ajortut, aalisakkat isigalugit piniarnissaannut periarfissiipput. Aliikkutaralugu aalisarnertulli piffissaq oqummersanik immikkut atortoqarluni aalisarfiusartoq aasaanerani piffissami killilimmi pisarpoq. Aalisariarneq ulluni arlalinni imaluunniit ulliinnarluni pisinnaavoq.

Aliikkutaralugu eqalunniarneq
Isigalugit aalisariaaseq tassaaginnarpoq aalisakkat isigalugit aalisarneq. Aalisariaaseq pissanganartoq, aalisakkammi tikiivillugit neqitaasamik niviugaasamik pisarineqartarput. Unammillernartorivaalu aalisagaq isigisinnaagakku, aalisakkallu aamma isigisinnaammatit, aalisarnermi eqqissisimanissap pikkoriffiginissaa pisariaqarluinnarami.

Kalaallit Nunaanni immami itisuumi

Imaq aalisagarpassuaqarpoq. Angallammut ilaallutit 100 aamma 300 meterit missaannik itissusilimmut aalisariarit. Angallammit aalisarluni nataarnamik, qaleralimmik, suluppaakkamik qeeqqamilluunniit pisaqarnerup nuannersumik misigisaqartitsinera misigiuk. Nunatta imartaani suluppaakkat angisoorujussuusarput, meteri angullugu takitigisinnaallutik 15 kg-llu angullugit oqimaassuseqarlutik. Taakku itisuumi ataatsimoortarmata arlaqartunik pisaqarnissaq qularnarneq ajorpoq. Aamma saarullinnik qaleralinnilluunnit pisaqamaffiusartunut aalisariaruit unnukkorsiutissatit qulakkiissavatit.

Kalaallit Nunaanni sikukkut aalisarneq

Sila issileraangat immallu sikua issutsilluni, Kalaallit Nunaanni sikukkut aalisarnissaq tassannga nuannarisalinnut piukkunnarsisarpoq. Kisimiilluni imaluunniit kalaallimik aalisaqateqarluni sikukkut aalisartilluni immap itisuup naqqaniit qaleralimmik amuarneq immikkut misigisassaavoq. Aalisartumik aalisariaqateqarneq misiliguk. Kalaallit Nunaanni januaarimiit apriilip tungaanut sikukkut aalisartoqartarpoq. Eqqaamassavat aalisarnermut atortut eqqortut aammalu atisat oqortut nassarnissaat, ukiuuneranimi sikumiilluni qiianarsipallattaqaaq.

Sikukkut aalisarnermi ileqqut
Sikukkut aalisarneq Kalaallit Nunaanni qangarsuaaniilli kalaallit inooriaasaannut ilaavoq. Kalaallit inooriaasaannik nalinginnaasumik misilitaqarusukkuit aalisakkamillu ataatsimik qulinilluunniit pisaqarlutit, sikukkut aalisarneq misigisaqarfigiuk. Sikukkut aalisarnissaq avannaani periarfissaginnerpaavoq.
Kitaani illoqarfinni Qaanaaq -miit Uummannaq, Ilulissat, Sisimiut, Kangerlussuaq aamma Nuuk, tikillugu nunattalu kangiani januaarimiit apriilip tungaanut sikukkut aalisarneq misilinneqarsinnaavoq. Piffiillu assigiinngitsut tamarmik immikkut periuseqarmata, immikkuullarissumik misigisaqarnissavit utaqqiinnarpaatit.

ILISIMAVIUK?

Aalisagaq kalaallit periusaat malillugu paarnaqutinik pujooruk imaluunniit killutigut igajuk. Qaarsumullu kuigukku nerissutissat piareeqqapput.

Kalaallit Nunaanni aliikkutaralugu aalisarneq ukioq kaajallallugu ingerlanneqartarpoq.

Suleqaterput World of Greenland – Arctic Circle (WOGAC) aamma illit pisariaqartitatit naapertorlugit aalisariartitsisarpoq

Allagartaq aalisarnissamut akuersissut illoqarfinni allakkeriviini imaluunnit takornariaqarnermut allaffinni pissarsiarineqartarput.

Kalaallit Nunaanni aalisarnissamut maleruagassat

Kalaallit Nunaanni aalisassagaanni aalisarnissamut akuersissummik peqartariaqarpoq. Akuersissut allakkerisarfinni immersugassamik immersuinikkut pissarsiassaavoq. Akillu imaapput:

75 kr.: Akuersissut nal.ak. 24-nut atuuttoq
200 kr.: Akuersissut ullunut arfineq marlunnut atuuttoq
500 kr.: Akuersissut qaammammut ataatsimut atuuttoq

Kalaallit Nunaanni aliikkutaralugu qissattaammik aalisarneq imaluunniit sikukkut aalisarneq pilerigaajuk? Kalaallit Nunaannut angalanissat uani inniminneeruk uani.