Air Greenland aamma Kalaallit Nunaanni Qimussertartut Kattuffiat (KNQK) qanoq iliuuseqarnissamik ukiuni arlalinni suleqatigiinnissaq pillugu nalunaaruteqarput, tassuuna qangali ileqquusoq qimussit sukkaniuttarnerat qulakkeerneqassaaq.

Air Greenland ukiuni arlaqartuni qimussit sukkaniuttarnerannut pingaarnertut aningaasaliissuteqartartuuvoq, tassami qimussertarneq Nunatsinni kulturikkut kingornussat qitiusut ilagimmassuk. Qangali ileqquusoq tatineqariartorpoq piniariartarnerup aamma aalisarnerup nutaanngorsarneqarnerata aamma silap pissusaata allanngorniartornerata malitsigisaanik, kangerluit sikusarnerannut sunniuteqartumik. Air Greenlandip aamma siunissami qimussertarnermik ileqqutoqqap ingerlaannarnissaa tapersersuinnarniarpaa, nunap immikkoortuisa kinguaariillu akornanni ilisimasanik avitseqatigiinnerup siuarsarnissaa kiisalu kalaallit qimmiisa piujuartinneqarnissaat tapersersorniarlugu.

Qanoq iliuuseqarnissamut nalunaaruteqarnermut anguniarneqarpoq ukiumoortumik sukkaniuttarnerit 2027-2029-mut pilersaarusiornissaasa aamma ingerlanneqarnissaasa killiussat pitsaanerusut pilersinneqarnissaat. Suleqatigiinnermut ilaapput assartuinerup aamma ingerlanneqartussat piareersarneqartarnerannik ineriartortitsinissaq, qimmit aamma peqataasut eqqarsaatigalugit, taamatuttaaq unamminernut angalanissamut tunissutit allagartaat aamma qimussertunut ajugaasunut akissarsiat qimminullu kusanarnerpaanut.

Sapaatip akunnerata kingulliup ingerlanerani isumaqatigiissutip atsiorneqarnissaa siunertaralugu illuatungeriit Air Greenlandip qullersaqarfiani naapipput. Tassani niuernermik ingerlatsinermut pisortaq Chris Shern suleqatigiinnerup siusissukkut ataqatigiissaarneqarnissaa ingerlaavartumillu ineriartortinneqarnissaa pingaaruteqartutut oqaatigaa:

Sukkaniuttarnerup ilisimaneqarnerata annertusarnissaa ataatsimiinnermi oqaluuserineqartut ilagaat – nunami namminermi nunanilu tamalaani amerlanerit aggersarniarlugit – imaanngitsoq qimussit sukkaniunnerat kisiat pillugu, kisianni taammatuttaaq kulturip immikkut illuinnartup misiginissaqarfiginissaanut aamma aaqqissuussinerup nalaani qanimut peqatigiittarneq nalinginnaasumik ulluni marlussunni ingerlanneqartartup misigitinnissaa.

KNQK-mi siulittaasup, Mikkel Jeremiassenip, siunissami suleqatigiinnissamut tunngatillugu maannakkullu killiffiup iliuusissallu piareernera assut nuannaarutigaa.

– Suleqatigisassanik nukittuunik peqarnissaq uagutsinnut pingaaruteqartorujussuuvoq, tamannalu Air Greenland suleqatigalugu pigaarput, taakkumi assartuinissamut piareersarnermi suliassaq annertooq nalunngilaat aamma qimussit sukkaniuttarnerannik ineriartortitsinermut pingaaruteqassusia. Tapiissutit maannamut tigoreersimasagut pillugit qujamasuutigeqaarput suliniutillu aalajangersimasut pillugit oqaloqatigiinnerup nukittorsarneqarnissaa qilanaaraarput, taamaaliornikkut qimussimik sukkaniunneq pillugu ilisimasaqarnerup annertusaqqissaaq, Mikkel Jeremiassen oqarpoq.

Avannaata Qimussersua, nuna tamakkerlugu qimussimik sukkaniunneq, apriilip aappaani 2027-mi ingerlanneqarnissaa eqqarsaatigalugu pilersaarusiorneq maanna aallartikkiartuaarpoq. Qeqertarsuarmi aputeqannginneq imaluunniit siku pissutigalugu sukkaniunneq ingerlanneqarsinnaanngippat KNQK-p angallassinermut immikkoortortaqarfik paasitereerpaa sukkaniunneq illoqarfinnut allanut nuunneqarsinnaaffii pillugit.