Aqagu tallimanngornermi martsip 10-ni Norsaq Københavnimiit Arizonami Maranami Pinal Airpark-iliaanneqarluni naggataavimmik ingerlaassaaq, Tucsonimili akunnissaaq tassani ilanngaaserinermik nunasiartortunillu isumaginnittarfik aqqusaaqqaassagamigit.

Norsaq februaarip 16-ni naggataamik ilaasunik angallassimmalli qanoq pinissaa amerlasuut pissanngatigisimavaat. Tamannalu maanna oqaluttuarisinnaalerparput.

- Norsap matuersaatai piginnittortaavinut AAR SUPPLY CHAIN -imut tunniunneqassapput tassalu pisatai kingoraartissatut ‘atoqqitassanngussapput’, Air Greenlandip Atlantikoq qulaallugu timmisartuutigisanut teknikkimut immikkoortortaani pisortaq Henrik Keil oqarpoq nangillunilu,

- Timmisartoq ulloq 13. marts Arizonami inoqajuitsumi kiaqisumi tunniunneqassaaq. Tamanna Norsap piumasarisinnaasaanut akerliugaluaqaaq, Norsarmi issittumi timmisartuussisussatut ’perorsagaavoq’, amerlanngitsuinnarnillu issimik pissuteqartumik ajornartoortarnikuulluni.

- Issisiutilluunniit 40 gradet angugaluarpagit. Ilaatigullumi pissusissamisuunngitsunik  pisoqartartaluarpoq, tamakkuli tamatigut sivisuallaalaamik uninngasimanerup nassatarisarpai, ulapaarnitsinnilu pisarnatik.

Tassa Norsap ukiorpassuarni aalajaalluni attartorneqarluni nunanut kiattunut ilaasunik nuannaartunik, Kuwait-imut Calgarymullu sakkutuunik aammalu Canadami illoqarfinnut assigiinngitsunut kalaallinik timersortartunik Arctic Winter Games-inut peqataajartortunik angallassisarneri tamaanga killeqarput. Ullulli tamaasa Nunatta Danmarkillu akornanni attaveqaatitut pinngitsoorneqarsinnaanani sullissinera pingaarnerpaavoq. Timmisartullu ukiut 20-t sinnerlugit silaannakkut angallassinissamut piareersimatinneqartuarnissaa sulisunik immikkorluinnaq tunniusimasunik pisariaqartitsivoq.

- Timmisartormi SAS-imi teknikerit amerlasuut tunniusimasullu unnuit tamasa misissorlugulu paarisimanngippassuk ullut tamaasa ilaasunik angallassinissaa pisinnaassanngikkaluarpoq. Teknikerimmi immaqa namminneq biilitik, immaqaluunnit aapparisatik, taama paarilluartigisimanngilaalluunniit. Ataatsimilluunniit massuasoqarneq ajorpoq. Norsaq biilillit silarsuaanni TLC- tut (Tender, Love and Caring) atorlugu immikkorluinnaq sullinneqartuarsimavoq, Henrik Keil oqarpoq.

Air Greenlandillu iluani aamma ajoqutit nassaariniarnissaannut aammalu timmisartup pilersaarutaasumik aserfallatsaaliinissaanut piareersimasoqartuarpoq.

- Ukiullu ingerlanerini sulianik tamakkunannga uku Norsamut angajoqqaarsiatullusooq  isumaginnittuusarsimapput, Peter Bjerre, Lars Christensen, Jens Laurberg, Michael Linder, Mia Mandal, Gert Bo Petersen aamma Bo Møller.

Nunatsinnilu uku isumaginnittuusarsimapput Johannes Holst, Rudy Mynster, Morten Lanther Larsen, Jan Mejlgaard Larsen minnerunngitsumillu maannakkut teknikeriusut marluk Kasper Zeeb Andersen aamma René Fencker Holm, timmisartorsuup tikinneri tamaasa siutequtitik atorlugit ingerlalluarnersugut paasiniaallutik takkuttartut, ukiumut 140.000 -nik ilaasoqarluta Danmarkimut uternissarput qulakkeerniarlugu, Henrik Keil oqarpoq, Norsamillu nammineq naggammik inuulluaqqusinini ima oqaasertalerlugu

- Ila maqaasinassaqaaq, ilisimasakkalu malillugit nunarsuarmi timmisartut ikittuinnaat Norsap pisarnermisut timmisartuussinngikkaangami soqutigineqartarneratut pineqartartut. Timmisartunimmi soqutigisallit ’spegepølse’ aappaluttoq assilissallugu nuannarisaqaat, Henrik Keil naggasiivoq.