"IKUMA nipilersornermik, pinngorartitsinermik ataatsimoornermillu takutitsivoq, inuusuttut periarfissaannik nutaanik pilersitsisinnaavoq, najukkamilu ataatsimoornermik nukittorsaataasinnaalluarluni. Nunatsinni timmisartortitsileqatigiiffittut inuit imminnut naapinnissaat nunalu tamakkerlugu ataqatigiisinnaaneq oqinnerulersissallugu pitsaanerpaatut suliassarput atorlugu tapersiisinnaagatta nuannaarutigaarput" Air Greenlandimi piujuartitsinermut attaveqaqatigiinnermullu pisortaq Inga Dóra G. Markussen oqarpoq.

IKUMA tassaavoq kalaallisut oqaaseq, isumaqartoq “ikumasoq” imaluunniit “ikitsisoq”. Taanna tassaavoq ikumasoq festivaalip nipilersorneq, workshopit ataatsimoornerlu aqqutigalugit Tasiilami pilersikkusutaasoq.

"IKUMA tassaavoq suliniut inuit Tasiilami peroriartorsimasut illoqarfimminnullu utersimasut pilersitaat. Air Greenlandi tapersersuinngikkaluarpat aaqqissuusseqatigiit Tasiilaliarnissaat periarfissaqarsimassanngikkaluarpoq. Taamaattumik tapersersuineq suliniutip iluatsinnissaanut pingaaruteqarluinnarpoq", IKUMA-p pilersitsisua Carl Florian Sørensen oqarpoq.

Kalaallit Nunaanni sumiiffippassuarni kulturikkut inooqatigiinnikkullu aaqqissuussinerit pisinnaassappata angallanneq pingaaruteqarluinnarpoq. Taamaattumik inuiaqatigiinni akisussaaffimminut ilaasutut Air Greenlandip isigaa, suliniutinik ataatsimoornermut, ilinniarnermut misigisassanullu nunarput tamakkerlugu periarfissiisunik tapersersuisarneq pingaartinneqarpoq.