Club Timmisamut ilaasortanngorit

Taamaatiguk

6204

2026 novembarip 3, marlunngorneq

Isumaqatigiissut nutaaq Air Greenlandip angallaviani nutaami Kangerlussuaq nukittunerulersinneqarpoq

Kangerlussuaq ornigassaavoq suli nuannarineqarluartoq. Ukiut pingajussaanni Air Greenland aamma Albatros Arctic Circle Københavnimut toqqaannartumik timmisartuussisarnerit pillugit suleqatigiipput. 2027-mi angallavik taanna Air Greenlandip angallaviinut tamarmiusunut qaninnerusumik atorneqalissaaq.

Kangerlussuup angallavissatut siunnerfigineqartarnerata annertusiartornerata naammassineqarnissaa, aammalu sulinngiffeqarlutik tikeraat umiarsuarnullu sinersorlutik takornariartartut angalanerminni Kalaallit Nunaanni ornigassanut allanut tikeraarsinnaanissamut periarfissaasa pitsaanerulernissaat siunertarineqarpoq.

Isumaqatigiissut tunngavigalugu 2027-mi marsip 16-anniit oktobarip 26-annut marlunngornerit tamaasa, Kangerlussuup Københavnillu akornanni toqqaannartumik sapaatit akunnikkaartumik timmisartuussisoqartalissaaq.

Tamatuma saniatigut nunami namminermi Kangerlussuup aammalu Ilulissat, Nuup Sisimiullu akornanni timmisartuussisarnissaq isumaqatigiissummut ilaatinneqarpoq.

Angallavimmi annertunerusumi ilaasussaq

Taamaalilluni Københavnimi angallavik toqqaannartoq kisimiikkunnaassaaq. Nunami namminermi angallavinnut Kangerlussuaq Kalaallit Nunaanni ornigassanut allanut ilanngunneqarsinnaalerpoq.

“Ukiut pingajussaanni Kangerlussuaq pillugu Albatros-ip suleqatigilluarneqarnera nangittussanngoratsigu nuannaarutigaarput. Angalanissanut pilersaarummi nutaami Københavnimut toqqaannartumik angallassisinnaaneq, nunami namminermi angallavitsinnut atassuteqartoq atorsinnaalerparput. Taamaalilluni sullitagut Kangerlussuup aamma Kalaallit Nunaata immikkoortuisa allat akornanni angalanissamut amerlanerusunik periarfissaqalerput, tamannalu angallavitsinni tamarmiusuni ataqatigiinnermik pilersitsiniarluta angalanissamullu periarfissanik amerlititsiniarluta sulinitsinnut assersuutissaalluarpoq”, Air Greenlandimi niuernermut pisortaq Chris Shern oqarpoq.

Toqqaannartumik angallassisinnaaneq 2025-mi pilersinneqarpoq aammalu 2026-mi ingerlateqqinneqarluni. Nutaamik isumaqatigiissusiornermi suleqatigiinnerup 2027-mi ingerlaqqinnissaa qulakkeerneqarpoq.

Kangerlussuarmi takornariaqarneq

Albatros Arctic Circle-mut isumaqatigiissut Kangerlussuup ornigassatut ineriartorteqqinneqarnissaanut periarfissiivoq, tassanilu sumiiffimmi najugaqarneq Kalaallit Nunaata ilaanut allanut angalanermik tapertalerneqarsinnaavoq.

JL Foto.jpg

“Kangerlussuarmut toqqaannartumik timmisartuussisarneq pillugu Air Greenlandimut isumaqatigiissuteqaqqinnerput nuannaarutigisorujussuarput. Tamanna sumiiffimmi takornariaqarnermik ineriartortitsinissamik, aammalu tikeraatta Kalaallit Nunaanni misigisinnaasannik tamanik misigisaqartinnissaannik ajornannginnerulersitsinissamik takorluugaqarnitsinnut alloriarneruvoq pingaarutilik. Isumaqatigiissut suleqatigiilluarnermut, aammalu Kalaallit Nunaannut takornariarnissamut periarfissat nutaat pilersinnissaannut ataatsimut piumassuseqarluarnitsinnut takussutissaavoq nukittooq,” Albatros Arctic Circle-mi pisortaq Jørgen Larsen oqarpoq.

Najugaqartunut tikeraanullu iluaqutissaq

Kangerlussuup tikinneqarsinnaanera najukkami inuiaqatigiinnut, najukkami suliffeqarfinnut sumiiffimmilu sammisassanut isumaqartorujussuuvoq. Tamatuma peqatigisaanik Kangerlussuaq ilaatigut sermersuarmut, issittumi uumasunut sumiiffiullu nunataanut isorartoorsuarnut isaariaavoq.

Albatros Arctic Circle-mut angallassisinnaanerup ingerlaannarnera suliffeqarfiup tikeraanut danskinut nunanullu allamiunut angalanissamut tunisassianik annertusaasinnaanermik isumaqarpoq.

  • 2027-mi angallassinissat pillugit paasissutissat

    • Kangerlussuup Københavnillu akornanni toqqaannartumik timmisartorneq. Angallavimmi Jettime aamma Air Greenlandip timmisartua ”Unaaq” sullissisuussapput.

    • Marlunngornikkut aqqut timmisartuussivigineqartalissaaq, ullorlu taanna Sisimiunut, Ilulissanut Nuummullu ingerlaqqinnissamut periarfissaqassalluni. Air Greenlandip nittartagaani aallarfissat tikiffissallu takukkit.

    • Timmisartuussinerit 2027-mi marsip 16-anniit oktobarip 26-annut ingerlanneqassapput.

    • Isumaqatigiissummut aamma nunami namminermi Kangerlussuup aamma Ilulissat, Nuup Sisimiullu akornanni timmisartuussinerit ilaatinneqarput.

    • Kangerlussuup angalanermi siunnerfittut piumaneqarnerata annertusiartorneranik naammassinninnissaq, aamma Københavnimut nunamilu namminermi angallavinnut toqqaannartumik attaviliinissaq siunertarineqarpoq, taamaalilluni sulinngiffimminni tikeraat umiarsuarnullu sinersorlutik takornariat Kangerlussuup aammalu Kalaallit Nunaanni ornigassat allat kattullugit angalasinnaanissaannut periarfissat pitsaanerulissammata.