Air Greenland Hotel Hans Egede A/S-ip Hotel Hans Egedemik, HHE Express aamma Nuuk Hotel Apartments by HHE-mik ingerlatsisup pisiarinissaanut isumaqatigiissuteqarpoq. Siunertaavoq Nuummi akunnittarfimmi inissaqarnerup nukittorsarnissaa, ingerlatsinermi akornutaasinnaasut akiorsinnaaneruniarlugit Kalaallit Nunaatalu ornigassatut piorsarnissaa annertusarniarlugu. Pisinissap oqartussaasunit akuersissutigineqarnissaa apeqqutaavoq.

Ukiuni makkunani Nuup Kalaallit Nunaatalu annertuumik ineriartornera pisinermut aallaaviuvoq. Nunanut allanut timmisartornerit nutaat, takornariat amerliartortut inuussutissarsiornikkullu annertusaaneq akunnittarfeqarnikkut patajaannerunissamik pisariaqalersitsivoq. Isumaqatigiissuteqarnikkut Air Greenlandimit kissaatigineqarpoq nunat tamat akornanni ineriartornermut ilaannikkullu ingerlatsinermi akornutaasinnaasut iliuuseqarfiginerusinnaanissaannut piukkunnarsarnissaq. Pisinikkuttaaq qulakkeerniarneqarpoq Hotel Hans Egede Kalaallit Nunaanni naleqarnerulersitsinissamut aqqutaajuassasoq, soorlu pilersinneqarnerminiilli taamaattoq.

Akunnittarfimmik tunisineq Kalaallit Nunaanni akunnittarfiit malunniuteqarnerpaat ilaat, ukiut qulikkaat sisamat pallillugit ilaqutariit pigisimasaat tassunga killeqarpoq.

Hotel Hans Egede 1987-imi Helge Tangimit Carl Juhlimillu pilersinneqarpoq, anguniarneqarluni akunnittarfimmik pilersitsinissaq Kalaallit Nunaanni illoqarfiup anginersaanni Nuup piorsarnissaa siunertaralugu. Kingorna illoqarfiup alliartornera ilutigalugu suliffeqarfik alliartorpoq, ullumikkullu aamma HHE Express aamma Nuuk Hotel Apartments ilaalersimallutik.

Ukiuni kingullerni suliffeqarfik oqaluttuarisaanermi nukittunerpaamik inissisimasimavoq, Nuummi mittarfissuup ammarneqarneratigut, Kalaalliat Nunaata nunarsuarmiunit alaatsinaanneqarnerulerneratigut tunaartaqartumillu niuernikkut piorsaasoqareratigut. Taamaattumik ilaqutariit akunnittarfiutillit aamma Air Greenland naliliipput suliffeqarfiup piorsaqqinneqarnissaanut maannakkut pisiarineqarnera tulluartoq.

Siulersuisuni siulittaasup Helge Tangip isaanit tunineqarnera tassaavoq sivisoorsuarmik sulinerup naammassinera suliffeqarfimmullu kapitalip nutaap aallartinnera.

Hotel Hans Egede ukiuni sisamat qulit missaanni ineriartortinnissaanut peqataasinnaasimaneq ataqqinartuuvoq. Carl Juhl peqatigalugu suliffeqarfiup toqqavissaa pilersipparput, kisianni suliffeqarfik sulisut ulluinnarni ingerlatsisut nukittorsartuarpaat. Taamaattumik sulisugut kiisalu pisortaanerput Jørgen S. Bay-Kastrup, 2014-imili suliffeqarfiup ineriartortinneqarnerani pingaarutilimmik suliaqarsimasoq, immikkut qutsavigerusuppakka.

Ataatsimoorluta angusagut tulluusimaarutigaakka, misigisimavungalu suliffeqarfik pitsaasunik toqqammaveqarluni ingerlateqqinneqarnissaminut piareersimasoq.

Hotel Hans Egede nukittuumik inissisimavoq sulisunik unneqqarissunik pilersinneqarsimasoq, patajaatsumik aqunneqartoq niuernikkullu piorsarneqartoq. Sulisut arlaqartut ukiorpassuarni suliffeqarfimmi sulisimapput, pisortaanerlu Jørgen S. Bay-Kastarup peqatigalugu suliffeqarfik ullumikkumut kulturikkut inissisimaneranut ilusilersueqataasimallutik.

Christian Loiberg Tang ukiuni kingullerpaani suliffeqarfiup aqunneqarneranut ilaavoq niuernikkullu piorsarnerani qitiulluni.

Piginnittunut pingaartinneqarsimavoq suliffeqarfik sumiiffimmit aallaaveqartumik ingerlateqqinneqarnissssa Nuummut Kalaallit Nunaannullu pingaaruteqarnera ataqqillugu.

- Hotel Hans Egede ilaqutariittut ukiuni qulikkaani sisamangajanni inuunitta ilagisimavaa annertooq. Taamaattumik aamma isumaliutigeqqissaakkatsinnik  peqqissaarluta aalajangerpugut. Suliffeqarfik, kulturi ataatsimoornerlu sulisut, aqutsisut suleqataasullu ukiorpassuit ingerlanerini pilersitseqataaffigismagatsigu tulluussimaarpugut. Tamannarpiarlu peqqutigalugu uagutsinnut pingaartuuvoq suliffeqarfiup ingerlateqqinnissaa sumiiffimmit aallaaveqartumik kiisalu Nuummut Kalaallit Nunaannullu pingaaruteqarnera ataqqillugu.

- Piffissami sivisujaami suliffeqarfiup siunissaa isumaliutigisimavarput, imalu inerniliivugut; Hotel Hans Egedep ingerlateqqinnissaanut Air Greenland piginnittuusoq eqqortoq. Tunineratigullu ilaqutariiusugut periarfissaqalerpugut suliffeqarfinnik allanik inerisaanikkullu sammisaqarnissatsinnut.

Tunineqarnissaata oqartussaasunit pineqartunik akuerineqarnissaanut Air Greenland aamma Hotel Hans Egede A/S ingerlatsineq allanngortinnagu suliffeqarfittut namminersortutut ingerlatiinnarneqassapput.

Air Greenlandimi pingaartinneqarpoq Hotel Hans Egede immikkut niuernikkut nalinginnaasumik tunngaveqarluni immikkut ingerlanneqaannarnissaa. Ingerlatseqatigiiffissuaq akunnitttarfinnik ingerlatsinernik misilittagaqareerpoq Arctic Hospitality Group Ilulissani Hotel Arcticimik, Ilimanaq Lodgemik Eqi Glacier Lodgemilu illuaqqanik ingerlatsineq aqqutigalugu.