Qaqqani angalaarnermik imaluunniit qaqqasiornermik nuannarisallit Alex Hannold tusaamassavaat. Taanna ilaatigut 2017-mi isumannaallisaanermut atortoqarnani qaqqaq El Capitan, 2.307 meterisut portutigisoq, Yosemite National Parkimiittoq qaqigamiuk nersorneqaatigaa. Qaqqasiorneralu ”Free Solo”-mik taallugu piviusulersaarusiarineqarmat, ukiup tulliani piviusulersaarutit pitsaanerpaatut Oscarinnatsinneqarpoq.

Free Solomut taaguutaavoq isumannaallisaanermut, tassa allunaasanik, ujatsiutaasanik, kiggequtinik nissinnilluunniit atortoqarnani qaqqasiorneq, qaqqasiortorlu nakkassagaluaruni illersuuteqanngivilluni.

Qaqqasioriaaserlu taanna Alex Hannoldip ilisimaneqaatigaa, taamatullu periuseqarluni nunarsuarmi qaqqat amerlasuut qaqisimavai.

Qaqqasiorfigisimasaminullu nunatta kangia ilanngussinnaanngorpaa. Qaqqaq qaqisaa kingulleq ateqarpoq Immikkoortoq, taannalu El Capitan-imit portuneruneqarneqartarpoq. Qaqqaq Immikkoortoq innaaqqissoq Nerlerit inaata kitaatungaani kangerluup, iigartartumik sermeqartup ungasinngisaaniippoq.

Qaqqasiorneq pikkunartoq taanna National Gerographicimit filmiliorneqartoq, Disney+-ikkut takuteqqaarneqaqqammerpoq.

Suliassamik tunineqarneq
Piffissaq 2022-mi aprilimut kinguartilaariartigu, taamanimi Air Greenlandip attartortitsinermut immikkoortua mail-imik pissanganartumik tigusaqarpoq. Mail-imik nassiussisuuvoq Gelco Corporation, pilersaarutinik piviusunngortitsinissamut ikiuunnermik ingerlatsiviusoq.
- Taamani uanga sulilerlaajuvunga, suliassallu taassuma immikkut ittuunera pasitsaallugu. Sunaaffami, tassaagamimi suliassaq immikkut illuinnartoq, Daniel Motzfeldt, Air Greenlandimi Sales Account Manageriusoq, oqaluttuarpoq.

Gelco qulimiguulimmik, Alex Hannold-imut, National Geographic-imit filmiliortussanut, tuperfissani qaqqanullu majuarnermi atortunut aammalu nerisassanik orsussamillu Nerlerit inaata ungasinngisaani kangerlummiittunut piffinnut marlunnut, aalajangersimasumik assartuussinermut atugassamik pisariaqartitsivoq, suliassarlu taanna qaammammik ataatsimik sivisussuseqartussatut nalilerneqarluni.

Attartortitsinermut immikkoortortap suliakkiissut pissanganartillugu akueraa, qaammatinilu sisamani aallussilluni pilersaarusiorneq ingerlalerpoq.

Suut tamarmik iluatsinnissaat anguniarlugu ataatsimiittarnerit oqaloqatigiittarnerillu ingerlanneqarput. Assartuutitullu atorneqarsinnaasoq ataasiinnaavoq, tassalu Air Greenlandip qulimiguuliutaa AS350-i, taannalu sap.ak. marloriarluni nunaqarfiliaatitut atorneqartarpoq.

Suut tamarmik pilersaarusiorneri naammassimmata suliamillu ingerlatsinissaq isumaqatigiissutaareermat, juuli qaammat Nerlerit inaata ungasinngitsuanut timmisartuussinerit siulliit pipput.
- Suliamut tassunga peqataaneq misigissaavoq nuannersoq. Piffissaliussallu eqqorteqqissaarniarlugit  suliat ingerlanneqarput. Nalunaaquttallu akunnerini 12-ni sulisarneq nalinginnaapajaarluni. Kukkunaveersaaqqissaarnissarmi pisariaqarpoq. Daniel Motzfeldt oqaluttuarpoq.

Honnold nannullu
Danielip oqaluttuarneratut attartortitsinermut immikkoortortap suliaq ungasianniit, ullullu tamaviisa qaammammi ataatsimi malittareqqissaarpaa. Silalu peqqutigalugu atortussanik assartuineq marlussoriaannarluni unitsinneqartarpoq. Taamatullu pisoqartillugu ullut arlerlugit, ilaatigut sapaatip akunningajassua uninngasariaqartarput.
- Silamillu peqquteqarluni ullut susinnaanngiffiit Alex Hannoldimut filmiliortunullu ilungersunarnerpaasarput. Qulimiguulimmi takkusinnaanngikkaangat taakku nunatta kangiani inuilaarsuarmi ulorianartoqarsinnaasumi, nanoqarfiusumilu, kisimiivittarput. Paasitinneqarpugullu nannut arlallit siumorneqarsimasut. Aammalumi taqussat nungukkaangata nerisassaarutivinneq misigisarpaat, Daniel Motzfeldt oqaluttuarpoq.

Suleqatigiillu imminnut ullut tamaasa attaveqatiilluarnerisa attartortitsiviullu peqqissaartumik pilersaarusiornerata suliakkiissut iluatsittumik naammassineqartippaa. Timmisartuussinerlu kingulleq, aggustimi aallartinnermiit qaammatip ataatsip missaa qaangiuttoq pilersaarutit malillugit naammassineqarpoq. - Suliassap naammassilluarnera uppernanngingajapoq, uangalu oqiliallangaarama qullilingiluaannarpunga, Daniel Motzfeldt oqaluttuarpoq, nangillunilu:
- Air Greenlandi ukiup taamaalinerani ilaasunik angallassinermik qulakkeerinermi saniatigut timmisartunik atorluaalluni suliassamik taama annertutigisumik isumaginninnera iluarusunnarpoq. Tamannalu tulluussimaarutigisinnaalluarparput, Daniel Motzfeldt oqarpoq.

National Geographicsip filmiliaanik pissanganartumik isiginnaarusuttut, Disney+ -mut piviusulersaarutini takuneqarsinnaavoq. Qilanaartuutitaa aana:

PAASISSUTISSAT:  Alex Honnold

Qaqqasiortartoq amerikamioq, 17. aug. 1985 inunngortoq, ilisimaneqaatiginerpaavaalu qaqqani innaasuni qutaarluusunilu free solo-mik qaqqasiortarnini.

Nunarsuarmi tusaamasaalerpoq 2017-mi junimi siullerpaalluni Yosemite National Parkimiittoq El Capitan kisimiilluni atortoqarnanilu qaqigamiuk, taannalu New York Timesimit ima allaaserineqarpoq: ”Timersornikkut iliuusaasoq tupinnarnerpaaq”.

Hannoldip aamma "Yosemite Triple Crown"-mik qaqisisunit sukkanerpaalluni qaqinikuuaa, tassa nal. ak. 18-t atorlugit, tassanilu Mount Watkins, The Nose aamma Half Dome's Regular Northwest Face, minutsini 50-ni aqqusaarlugit.

2015-mi qaqqarsuarni aputilinni Tommy Caldwell peqatigalugu ulluni tallimani Patagoniami uuma naammassisarnera: enchainment (Fitz Traverse-itut ilisimaneqartup) Cerro Chaltén Group (imaluunniit Fitzroy Group) Piolet d'Or-innappoq.

Honnold tassaavoq atuakkamut eqqaamasalersaarummut Alone on the Wall-mut (2015-meersumut) (David Roberts peqatigalugu) atuakkiortoq, piviusulersaarullu 2018-meersoq Free Solo, BAFTA-mik Oscarimillu nersornaasigaavoq.

Paasissutissanik aallerfik: Wikipedia