Sineriak tamakkerlugu nuissertarnera putsertarneralu peqqutaallutik sullitatta ornitaanut apuunnissaat ulluni makkunani unammillernartoqarpoq. Silassamut ilimasaarut malillugu silap pitsanngornissaa ilimananngilaq, taamaattumillu Air Greenlandip sinerissamut angalanissanut billetsinik tuniniaaneq juuli tamakkerlugu unitsikkallarpaa. Nerlerit Inaannut billetsit uani pineqanngillat.

Ullumikkut ataasinngornermi juulip 11-anni ilaasut 1000-t nuna tamakkerlugu weekendimi aallartussaagaluit aallanngitsoorput. Sineriak tamakkerlugu minnerunngitsumik Nuummi nuisseqqasarnera putserneralu peqqutaalluni, Dash-8-t Nuummi angerlarsimaffeqarmata aatsaat ullup ingerlanerani timmisartuussinissat ingerlanissaat pisinnaasimavoq. Tamannalu ilaasunik nassiussanillu apuunneqanngitsumik amerliartortitsipiloorpoq. Taamaattumik Air Greenlandip juulip sinneranut billetsinik tuniniaaneq matuaa.

- Air Greenland piffissami matumani qajannartumik inissisimavoq. Kiffartuussineq pitsaasoq tunniukkusutarput ajornakusuulersimavoq, taamaattumillu billetsinik tuniniaaneq matusariaqalerparput. Taamaalilluta ilaasussanut inissaq sinneruttoq kinguaattooqqanitsinni atorluarneruniarparput. Putsup nuissallu pukkitsut ajornartorsiortitsingaatsiarnerisigut ullormut angallassinissat kinguartittariaqartarsimavagut ullullu tulleriit arlallit taama ingerlagutta ilaasussat amerliartuinnartarput Air Greenlandimi pisortaaneq, Jacob Nitter Sørensen, taama nassuiaavoq.

Timmisartuussissutit amerlanerit Nuummi angerlarsimaffeqarput, ataaserlu Ilulissani. Tassanilu aamma piffissaq kingulleq putsingaatsiarsimavoq. Timmisartut aggerfimminnut uteqqittariaqartarput aserfallatsaaliineq eqqarsaatigalugu, silamillu ilimasaarut malillugu taamaaliorsinnaasanngikkaanni timmisartuussinissanut pilersaarut kalluarneqartarpoq. Taassuma saniatigut unnuiffissanik amigaateqarpugut.

- Air Greenlandip ilaasut aallareersimasut unnuiffissaqarnissaat isumagisarpaa, taannaannarluunniit pilersaarusiornikkut aamma unammillernartoqartitsivoq, unnuiffissat killeqarnerat peqqutaalluni. Suliffeqarfipput Mittarfeqarfiillu sutigut tamatigut ajornartooqqavugut. Taamaattumik ilaasuvut naammagittarnissaannik kajumissaarpavut, suleqatittami sapinngisannguartik tamaat ajornartorsiutit aaqqinniarlugit sulimmata, tamannali timmisartuutivut qangattarsinnaanngippata ajornakusoorpoq, Jacob Nitter Sørensen oqarpoq nangillunilu:

- Europami angallassinerit aamma unammillernartoqartitsipput, tassami atlantikoq qulaallugu timmisartumik attartorsinnaanerit piffissami matumani ajornakusoormata. Air Greenlandip nalinginnaasumik periarfissaq tamanna atorluartaraluarpaa, maannakkulli periarfissat killeqangaatsiarput ilaatigut SAS-imi suliumajunnaartoqarnera peqqutaalluni.

Air Greenlandip nittartagaani inoqatinullu attaveqatigiittarfitsigut annertuumik allanngortoqaraangat paasissutissiisoqartassasoq Jacob Nitter Sørensen ilisimatitsivoq. Ilaasut angalanissaat allanngorpat taakku toqqaannaq nassitsittassapput angalanissamik pilersaarusiaq naammassereeraangat.

- Sulisuvut massakkut annertuumik ataqatigiissaariniarlutik suliaqarput, sullitagullu ernumaqqunanngeqaat. Pilersaarut naammassiniariarpat tunniunneqartarumaarpoq. Sila, timmisartut timmisartunilu inuttat iluatsinnissaanut apeqqutaassapput pisortaaneq naggasiivoq.

11. juuli 2022