Air Greenland Maritime Domain Awareness pillugu Illersornissaqarfimmut MDA-mut isumaqatigiissuteqarpoq  - inuinnaat silaannakkut angallanneqarneranni Kalaallit Nunaanni, Issittumi Imarpiullu avannaani alapernaarsuinermut, misissuisarnermut assartuussinermullu tapertaasussamut tunngasumik.

Tallimanngornermi 3. juulimi Nordatlantens Brygge-mi Københavnimiittumi Kalaallit Aallartitaqarfianni atsiornerit arlallit ingerlanneqarput. Siullermik Nunanut Allanut Naalakkersuisup Múte B. Egede-p aamma Danmarkimi Illersornissamut Ministerip Jeppe Bruus-ip Illersornissaqarfiup aamma kalaallit sullissisuisa akornanni suleqatigiinnerup nukittunerulersinnaaneranut periarfissanik salliutitsinissaq pillugu siunnerfittut nalunaarut atsiorpaat.

Tassunga ilagitillugu Illersornissamut Ministereqarfiup Atortunut Pisiniartarnermullu Aqutsisoqarfiata aamma Air Greenlandip MDA-mut isumaqatigiissut atsiorpaat, kiisalu Air Greenlandip aamma PAL Aerospace-p isumaqatigiissutertik atsiorlugu.

Air Greenlandip suliffeqarfissuani pisortaaneq Jacob Nitter Sørensen aamma Jacob Nitter Sørensen aamma generalløjtnant – Illersornissamut Ministereqarfiup Atortunut Pisiniartarnermullu Aqutsisoqarfiani pisortaq Per Pugholm Olsen atsiortuupput.

“Tatiginninneq, Air Greenlandimut takutinneqartoq pillugu tulluusimaarpugut, aammalu Illersornissamut Ministereqarfimmi Atortunik Pisiniartarnermullu Aqutsisoqarfik pitsaasumik pilersitsiviusumillu suleqatigaarput. MDA-mut isumaqatigiissummi takutinneqarpoq, inuinnaat silaannakkut angallanneqarneranni pisinnaasat qanoq iliorluni inuiaqatigiinni suliassat pingaarutillit isumagineqarnerini atorneqarsinnaasut, aammalu Issittumi sullissinermik misilittakkatsinnik tunngaveqartoq”, pisortaaneq Jacob Nitter Sørensen oqarpoq.

MDA-mut isumaqatigiissummut atsiorneq panerpianngitsorluunniit Air Greenland PAL Aerospace-mut, timmisartut naleqqussarneqarnissaannik iluarsineqarnissaannillu isumaginnittuusussamut isumaqatigiissuteqarpoq. Suliffeqarfik timmisartunik nunat tamalaat imaataanni alapernaarsuutinik aamma Dash 8 atorlugu suliassanik immikkut ittunik misilittagaqarpoq.

“PAL Aerospace-mut isumaqatigiissut atsiornermiit iliuuseqarnermut alloriarneruvoq pingaarutilik. Suleqatissarput misilittagaqarpoq, Dash 8-t atorlugit immikkut ittumik suliaqarnissamut ilisimasalittut uppernarsarneqarsimasumik piginnaaneqartoq, taannalu MDA-mut suliassatsinnut timmisartunik piareersaanitsinni ikiortissaraarput”, pisortaaneq Jacob Nitter Sørensen oqarpoq.

Taamaalilluni suliaq aallartissinnaalerpoq. Timmisartut malussaatinik misissuinermullu atortunik, Illersornissaqarfimmit aalajangerneqartunik, ikkussorneqareernerminnilu MDA-mik suliaqarnissamut ilaalersussanik atortulersorneqassapput.

Ukiuni tulliuttuni pilersaarusiorneq, naleqqussaaneq, misissuinermut atortunik atuilertarneq, uppernarsaasiisarneq, ilinniartitaaneq aaqqissuussaanerullu suliaqarfiusussap annertusarneqarnissaa ingerlanneqassapput.

MDA pillugu suliaq Issittumi piginnaaneqarfinnut ataatsimoortunut isumaqatigiissummut 2021-meersumut, aamma Illersornissaqarfimmut 2024-2033-mut Issittumi Imarpiullu Avannaani suliassanut isumaqatigiissutip immikkoortuanut 1-imut, nunarsuup immikkoortuani upalungaarsimanerup, nakkutilliinerup Illersornissaqarfimmiillu najuuttoqarneranut tunngasumut atasutut isigineqassaaq.

Air Greenlandimut tunngatillugu MDA pillugu suliassami aamma niuerfiup nutaap, ukiut arlallit ingerlanerini ineriartortinneqarsimasup, aammalu periusissiornermut atatillugu annertusarneqarsimasup aallartinnera malunnartinneqarpoq.

Najukkani najunnerit, Issittumi suliassanik misilittagaqarneq aammalu silaannakkut angallassinermi piginnaaneqarfiit immikkut ittut upalungaarsimanerlu Illersornissaqarfiup pisariaqartitai kalaallillu atugaat qanillugit aaqqiissutissaapput nukittuunngortitsisussat.

Tamatuma peqatigisaanik suliassaq Kalaallit Nunaanni suliffissanik pilersitsinissamut immikkullu ittunik ilisimasaqalernissamut iluaqutigineqarsinnaavoq.

“Suliap ingerlanera sivisusimavoq, aammalu ukiut ingerlanerini Naalakkersuisut arlallit suliassat amerlanerusut naammassineqarnissaannik najukkaniillu aallaaveqalernissaannik sulissuteqarsimapput. Mittarfeqarnikkut attaveqaasersuutit nutaat atulertarneri malillugit Dash 8-nik isumalluutaasunik atuiunnaartoqartartussaavoq, taakkulu inuiaqatigiinni suliassanik nutaanik suliaqarnermut atorsinnaalertussaapput. Tamanna amerlasuut annertuunik suliniuteqarnissaannik pisariaqartitsiffiusimavoq – aamma Air Greenlandip iluani – maannalu timmisartut, inuttat ilisimasallu nutaat ilusileriartortinniarlugit suliat takunissaannut qilanaarpugut”, pisortaaneq Jacob Nitter Sørensen oqarpoq.