Ippassaq oktobarip 24-ni nal. 13.02, timmisartuutitta Dash-8-t ilaat mianersorluni Nuummi mittariaqarsimavoq, timmisartup assakaassuata ataaseq qaarsimammat. Videomi takuneqarsinnaasutut Mittarfeqarfiit upalungaarsimasui piareermata timmisatoq pinartoqanngitsumik mippoq. Ilaasut 26-t minnginnermi timmisartumi inuttanit pisumut paasissutissinneqarput, Nuummullu tikereernermi pisunik nassuiaalluarneqarput.

Timmisartup naalagaa Edd Arne Lund, oqaluupparput, taassumalu pisoq ima nassuiarpaa:

- Kulusummiit ingerlaarnitsinni timmisartoq Nuummut mittussanngormat assakaasut assakaasoqarfimmiit apparneqarmata assakaasoq ataaseq pullaarsimasoq ilaasut ilaannit paasineqarpoq. Minnissamullu minutsit marluinnanngorlutik. Takunnittup takusani timmisartumi saqisumut ingerlateqqippaa, taassumalu uagutsinnut ilisimatitsissutigaa, Edd Arne Lund aallartippoq.

Air Greenlandimi timmisartortartut taamatut pisoqariataarnissaanut sungiusagaapput, taamatullu assakaasup qaarnerani aaliangersimaqqissaartunik malitassaqarput. Edd Arnellu, ukiuni 25-ni uagutsinni timmisartortartuusimasup, taamatut pisoqarnera misigereersimavaa.

- Kulusuup mittarfiani ujaraaqqanik qalligaasumi qangattarnitsinni minnitsinnilu assakaasut artorsartinneqarnermikkut qaarsinnaapput. Taamaattumillu ilaasutsinnut pingaaruteqarpoq, taama pisoqarnerani aaliangersimasunik malitassaqarnitta ilisimanissaa. Pisumi uani timmisartortartut assakaasup qaarsimanera uppernarseqqaarlugu iliuusissamik nalilersuissapput. Pisumillu Air Greenlandimi timmisartuussinernut aqutsivik, OP, nalunaarfigineqassaaq, oqarpoq, nangillunilu

 - Qanoq iliornissaq eqqartorneqarpoq, Kangerlussuarmullu ingerlaqqitariaqarsinnaaneq nalilersorneqarluni, Nuummili mittarfik silinnerulernikuummat, tassunga minnissaq aaliangiunneqarpoq, oqarpoq.

 Aaliangertoqareermallu timmisartup Nuummik qulaavaanerani minnissamut piareersarneq aallartippoq.

 - Mittarfeqarfiit qatserisartut biiliinik piareersimatitsinissamik nalunaarfigaavut, ilaasullu iliuusissatsinnik nassuiaallugit. Ilaasut assakaasup qaarnikup nalaaniittut timmisartumi issiavinnut allanut nuutinneqarput. Tamannalu isumannaallisaanermik peqquteqarpoq, nassuiaavoq

Ilaasut nassuiaanneqareermata mittarfimmilu upalungaarsimasut piareermata, Edd Arne aquttualu Jakob Blaabjerg minnissamut piareerput.

- Pilersaarutigaarput timmisartup assakasui saamerliit siulliullugit timmisartoq mianersortumik nunamut tutsissallugu, taavalu kingorna illuatungaa tutsissallugu. Pilersaarutillu iluatsipput. Timmisartoq assakaasut pingaarnerit marluk atorlugit mianersorluni mippoq. Assakaasullu timmisartup assakaasoqarfianiittut marluugaluartut, aappaa qaarsimatillugu aappaannaa atorlugu minneq ajornanngilaq, timmisartup naalagaata, naqissuserpaa.

- Ilaasullu nassuiaalluarnissaat pisariaqarmat timmisartup qimannginngerani, timmisartumik saqisoq Edvard nutserisoralugu, tamanna isumagaarput, ilaasullu apeqquteqarnissamut periarfissillugit. Aperisoqanngilarlu. Ilaasut ersaattaapput, tamannalu timmisartumik qimatsinissamut piareernerinut ersiutitut tiguarput, Edd Arne Lund nassuiaavoq.

Timmisartup OY-GRR-p assakaasua taarserneqassammat eqqunneqarpoq. Timmisartullu naalagaa Edd Arne Lund sulisuilu isumannaallisaanermik nalunaarusiorneq isumagereeramikku aatsaat soraarput. Kulusummut ilaasunik ingerlaqqinnissamut utaqqisunik aalleqqittussaagaluarput, timmisartorlu alla atorneqartussanngormat taannalu piareersarneqaqqaassammat, inuttanut qasuersaarnissamik peqqussut malillugu piffissaarutussanngorput.

Inuttallu allat OY-GRM atorlugu Kulusummiit ilaasussat ingerlannissaat isumagaat. Taamaasillunilu ilaasut silap ajorneranit timmisartuussinissanik taamaatitsermit eqqugaasimasut tamarmik apuunneqarput. Ullumilu nunatta kangianut nalinginnaasumik timmisartuussisoqassaaq.