Air Greenland aamma angalatitsivik Ruby Rejser 2025-mi aasakkut aqqummi Nuuk – Aalborg sapaatit akunneranut marloriarluni timmisarnissamik suleqatigiinnissamik isumaqatigiipput

Ungasinngitsukkut Air Greenlandip 2025-mi aasakkut Nuup Aalborgillu akornanni sapaatip akunneranut ataasiarluni timmisarnissamik pilersaarutini nalunaarutigaa. Maannalu pilersaarutit taakku sapaatit akunneranut marloriarluni timmisarnissamik annertusineqarput, Air Greenland angalatitsivillu Ruby Rejser suleqatigiinnissamik isumaqatigiissuteqareersut, 2025-mi aasakkut aqqutip taassuma tuniniarnera avinniarlugu.

Nuup Aalborgillu akornanni aqqut 2025-mi juunip 12-aniit septembarip aallaqqaataanut ataasinngornikkut sisamanngornikkullu pisassaaq timmisartumillu attartornermik ingerlatseqatigiiffimmit Airsevenimit timmisartoq atorneqassalluni.

Air Greenlandip niuernermi pisortaata Kasper Rungfeldtip suleqatigiinnissamik isumaqatigiissut naammagisimaarpaa, aqqutip iluatsinnissaanut, taamaalillunilu aamma siunissami ineriartornissamut periarfissanik annertunerulersitsimmat.

Aalborgimi Ruby Rejserip immikkoortortaani pisortap Morten Meyerip aamma suleqatigiinnissamik isumaqatigiissut naammagisimaarlugu oqaatigaa, naatsorsuutigalugulu aqqutip akilersinnaaneranut iluaqutaassasoq.

- Air Greenlandimik suleqatigiinnissamik isumaqatigiissuteqarneq nuannaarutigeqaarput piffissap sivikinnerusup sivisunerusullu ingerlanerani periarfissarpassuit takusinnaagatsigit. Isumaqatigiissut inissipallappoq ingerlatseqatigiit marluullutik eqaatsumik periaaseqarnerisigut. Isumaqarpugut Air Greenlandip peqatigineratigut nukittunerulersimasugut, aqqutip akilersinnaasunngortinnissaanut, taamaalilluta siunissami aqqut atuleqqissinnaallugu immaqalu allaat sivitsorlugu. Siusinnerusukkut oqaatigisimavarput Kalaallit Nunaat angalasunut nalinginnaasunut tamanut angalaffissatut ajornannginnerulersikkusullugu. Isumaqatigiissuteqalerneratigut isumaqarpugut taamaaliorniarnitsinni periarfissaqarnerulersimasugut, Morten Meyer oqarpoq.

Aalborgip mittarfianit Niels Hemmingsen oqarpoq:

- Aalborgip mittarfiani Nuummut Nuummiillu toqqaannartumik timmisalernissamik pilersaaruteqarlutik Ruby Rejser aamma Air Greenlandip suleqatigiilernerat pitsaasutut isigaarput.Taakku suleqatigiillutik sapaatit akunneranut marloriarlutik timmisalissappata inuussutissarsiuteqartut sunngiffimminnilu angalaartut Kalaallit Nunaanni illoqarfiit pingaarnersaanut angalanissaminnut periarfissaqarlualissapput, immaqalu tassannga Kalaallit Nunaata iluani Air Greenland aqqutigalugu ingerlaqqillutik. Pissanganassaarlu takullugu ukiuni tulliuttuni suleqatigiinnikkut periarfissat allat suut takkukkumaarnersut