Siorna marsimi Norsaq nunatsinniit aallalerluni Nuuk naggataarutitut qulaavaammagu tussunngusut amerlaqaat.

Taamanilu Norsaq Arizonamiittumi Maranami Pinal Airparkimi, kingoraartissatut atugassanut inissiisarfiliarluni ingerlalertinnani Nuuk qulaavaammagu nuummiorpassuit ataatsimoortukkuutaarlutik aalateriffigerrappaat.

Norsallu pukkilluni illoqarfik marlussoriarluni qulaateriarlugu killingusaamut ersigunnaariartornerani nipaatsumik tussunngusumillu malittarineqarpoq. Tupinnanngitsumimmi killitsinnarami, timmisartormi taanna nunatta oqaluttuassartaanut ilaalluinnarpoq.

Norsaq Air Greenlandip 2002-mi aggustimi pigilerpaa, 2023-milu marsip 12-ni atorunnaarnissani tikillugu nal.ak. 41.364-t timmisartuussisimavoq, 10.112-eriarlunilu aallarlunilu missimalluni.

Air Greenlandip Norsaq Atlantikoq qulaallugu timmisartuussinermi ukiut 20-t sinnerlugit atorpaa, Air Greenlandimullu, minnerunngitsumillu ilaasorisartakkatsinnut annertuumik pingaaruteqarsimavoq.

Taamaammat Norsap qalliutaata maanna, assimi takuneqarsinnaasutut, katersiumatuut pilerigisaattut matuersaatinut ikkussivittut imaluunniit nassatanut ilisarnaatitut sananeqarsimanera nuannaarutigeqaarput. Taamaasillunilu Norsaq tammatsaalisaavoq.

”Norsap Atlantikoq qulaallugu timmisartuussisarnerisa nunat kisiisa pinnagit aammali uummatit oqaluttuassallu ataqatigiississimavaat, taamaasillunilu inuiaqatigiit oqaluuttuarisaanerani immikkut inissisimalerluni.

Norsarmi nunanut assigiinngitsunut tikittakkaminut inuinullu, silaannartani allanngorartuartuni, immikkut atassuteqaataanermini immikkut inissisisimasimavoq, Air Greenlandip pisortaanera Jacob Nitter Sørensen oqarpoq.

Norsamillu kingornussatut matuersaatinut ikkussiviit nassatanullu ilisarnaatit aqqutigalugit inuit ataasiakkaat oqaluttuarisaanermik pigisaqalernissamut periarfissisoqarnera iluarisimaarpaa.

Norsamit sanaamik ikkussiveeqqamik pigisaqalerusukkaanni, taanna Aviationstags-ip nittartagaani, 39,95€-nik, tassa 300 DKK-t missaannik, akilerlugu pissarsiarineqarsinnaavoq. Tuniniakkalli killeqarput.