Ukioq manna nersornaat Greenland Tourism Award, Tasiilami Sermilik Adventuresimik ingerlatsisinut Tobias Ignatiussenimut aamma Line Kristiansenimut  tunniunneqarpoq

Nersornaat Visit Greenlandip Air Greenlandillu suleqatigiillutik takornariaqarnermik ingerlatsisunut tunniuttagaat ukioq manna Sermilik Adventuresimit Tasiilameersumit pissarsiarineqarpoq. Tamannalu Vestnordenimi nunatsinni angalatitsisartut nittarsaassinerat Nuummi 19.-22. sept. ingerlanneqartoq sioqqullugu saqqummiunneqarpoq.

Sermilik Adventures nersornaammut takussutissamik Kim Kleist Eriksenimit sanaamik aammalu Air Greenlandimit angalanissamut allagartamik 10.000 kroninik nalilimmik tunissutisivoq.

Sermilik Adventures Tasiilami ukioq 2019 piniartumit Tobias Ignatiussenimit napparsimasunillu paarsisumit Line Kristiansenimit pilersinneqarpoq. Taakku Sermiliup kangerluanut aasaanerani ukiuuneranilu ulluni arlalinni angalaarnissanik neqeroortarput. Angalaanerit taakku ataatsimut akilerneqartartut Tiniteqilaami angallassisut illuaraataanni unnuinissamik, sermersuarmi qimussernissamik, qajarissanik angalaarnissamik aammalu arfernik takornariarnissamut periarfissaqarput. Taakkulu saniatigut, Tasiilallu aningaasarsiorneranut tapertaalluartartumik, ilisimasassarsiorlutik angalasunut kiffartuussinermik aamma ingerlatsisarput.

Sermilik Adventures takornariaqarnermik sullissinerminni malunnaatilimmik iliuuseqartarput. Ilaatigut inuusuttut takornariaqarnerup suuneranik misigisassarsiortillugit angalaqatigisarpaat aammalu illoqarfimmi kulturimik ingerlatallit, soorlu erinarsoqatigiit, tivasartut eqqumiitsuliortullu peqataatinnerisigut takornariat nunatsinni angalanerminni immikkut misigisassittarlugit.

Tamakku saniatigut Sermilik Adventures takornariartaassuarnik ingerlatsisartut nunanit tamalaaneersut immap sikuanik aserorterisartut suleqatigisarpaat, umiarsuaq pilersuisoq allallu ingerlatsisut pisarnermit siusinnerusukkut suliaminnik aallartitsisinnaalersillugit. 

Greenland Tourism Awardip tunniunneqartarneranut siunertarineqarpoq takornariarnermik ingerlatsisut, isumannaatsuunissaq, pitsaassuseq qaffasissoq, avatangiisit, nutaaliorneq inuiaqatigiinnilu akisussaaneq pingaartillugit nungusaataanngitsumik tunngaveqarluni tunisassiortunik nersornaasiinissaq.

Nunatsinni immikkoortuni tamani takornarianit ikitassanut aaqqissuisartut naliliisussanut Visit Greenlandimit, Air Greenlandimit aamma Innovation Greenlandimit aallartitanut piukkussaminnik saqqummiussisarput.

Ukioq manna Tourism Awardimut innersuussat ukuupput: Arctic Living Ilulissat, Dogsledge Taxi Sisimiuniit, Hotel Søma Aasiaat, Qooqqut Nuan Nuummiit aamma Riding Greenland Qassiarsummiit.

Naliliisitat ataatsimoorussamik ima oqaaseqaateqarput:

- Suliffeqarfiit innersuussat avatangiisinut aamma illoqarfigisami innuttanut akisussaaffeqarnerat minnerunngitsumillu pitsaassutsimik pingartitsillutik nutaaliorsinnaanermik  pigisaqarnerat assut nuannaralugu tupigusuutigaarput. Suliniutit taamaattut nunatsinni takornariaqarnerup nungusaataanngitsumik ineriartorinnerani tunngavissaapput, tamannalu massakkorpiaq pisariaqarpoq, taamatullu siunissami! Taamaattumik innersuussat tamaasa, minnerunngitsumillu Sermilik Adventures, nalliuttorsiutigisinnaagatsigit nuannaarutigaarput, taama naliliisartut ataatsimut oqaaseqaateqarput.