Ukiuunerani savat savanut inissianut eqqussorneqarnerat suli naammassinngitsoq apersuaalerpoq, savallu savaaqqallu amerlasoorujussuit appussaapput. Savaatillillu amerlasuut qujanartumik ilaatigut Sermeq Helicoptersimiit ikiorneqarlutik savaatitik sumiissusersisimavaat, savaatillillu allat aamma suli ikiortariaqarlutik.

Air Greenlandip qulimiguuliutaa AS350 Narsarsuarmut tikimmat, timmisartunik attartortitsinermut immikkoortortamiit, savaatit silaannakkut sumiissusersiniarnissaannut qulimiguulimmik atuinissamut savaatillit neqeroorfigineqarput.

Arfininngornermi novembarip 11-ni neqeroorut savaatilinnit arlalinnit qujarunneqarpoq. Taakkununnga ilaalluni Eskild Paviassen Qassiarsuup eqqaani Kiattiitineersoq, tassumalu qujamasunnini Facebookimigut ersersippaa.

Narsarsuarmi stationimi pisortap Suulut E. Krogh-ip oqaluttuaraa, savaatinik sumiissusersiniarluni suliaq Eskild Paviasenip savaateqarfianiit Kiattiiniit nal. 09.00 aallartittoq. Stationimi pisortaq nammineq qulimiguulimmut ilaavoq.

- Savat savaaqqallu 100 -150-it sumiissusersivagut, qulimiguulillu atorlugu savat amerlasuunngorlugit katersorlugit. Savat savaaqqallu apummi nikisinnaajunnaaqqasut, ilaallu toqusimasut, siumornissaat piareerfigisimanngilarput, uangalu assut attortippunga. Nunallu maniinnera pissutigalugu miffiginiakkatta ilaani missinnaanngilagut, Suulut E. Krogh oqaluttuarpoq.

Eskild Paviasen qaqqami qulimiguulimmit nioriarluni savat angerlakaatinnerat nangippaa, qulimiguulillu kujammut ingerlaqqippoq, allat ikioqqusut ikioriartorlugit.

- Qaqortumut inuk savanik Tasikuluulimmi katerseqataasussaq aavarput. Tassanngaanniit Qallimiut tungaannut pukkitsunnguulluta ingerlaarpugut, tassanilu savaatilik Piitaaraq Nielsen illumi eqqaaniittoq oqaluuteriarlugu tamatuma eqqaa ujaasiffigiartorparput.

Tassani uumasut 60-80-illu akornanniittut takuagut, ilaalli toqoreersimapput. Savallu sumiissusersineqareermata, apullu manngertinnerummat Piitaaqqap snescooterit atorlugit uumasuutiminik katersuineq nangippaa, Suulut oqaluttuarpoq. 

Tamatuma kingorna savaatilik alla aamma attavigineqarpoq, taassumalu savaatini sumiissusersereersimammagit, ikiuunnerput nal. 16 missaani unippoq.

Nunatta kujataani savaatillit savanik savaaqqanillu annaasaqarsimasut tamaasa inuulluaqquagut. Tamassi ajunnginnerpaamik kissaappassi <3