Greenland Airports-ip Ilulissani mittarfik nutaaq ammarpagu, Air Greenland Ilulissat aamma Københavnip akornanni toqqaannartumik timmisartuussisalissaaq sisamanngornermi 29. oktober 2026. Angallavik pisortatigoortumik timmisartuussinermik ammarnersiorneqassaaq Tuukkaq A330neo atorlugu.

Tamatuma kingornatigut utaqqiisaagallartumik Jettime angallassisartuussaaq Boeing 737-800 NG 180-inik ilaasoqarsinnaasoq timmisartoralugu, 2027-mi upernaakkut Air Greenlandip Unaaq A320neo-p tigunissaata tungaanut, tamatuma kingornatigut ingerlatsilersussaasoq. Ukiuunera angalanissamut pilersaarut nutaaq tassaavoq angalanissamut pilersaarummut pioreersumut, ullumikkut angalasartunit ilisimaneqareersoq. 

- Angalaffiup nutaap Avannaata tikinneqarsinnaanera pitsanngorsassavaa, tamanna nuannaarutigaarput tassuunami angalasunut toqqaannartumik angalanissat amerlanerusut qulakkeerneqassapput, takornariaqartitsinermut taamatullu inuussutissarsiortunut iluaqutaasumik, CEO Jacob Nitter Sørensen, oqarpoq.

Ammarnerata kingornatigut Ilulissat aamma Københavnip akornanni sapaatit akunnerannut ataasiarluni toqqaannartumik timmisartoqartassaaq, pingasunngornerit tamaasa. Juullimut aamma ukiortaamut atatillugu aammattaaq ukiuunerani takornariaqartillugu 1.-27. marts sullissineq annertusineqassaaq sapaatit akunnerannut marloriarluni, tassalu ataasinngornikkut aamma pingasunngornikkut.

Sapaatit akunnerata sinnerani Københavnimut angalasarneq Nuuk aqqusaarlugu ingerlanneqartassaaq. Ilulissaniit Nuummut Københavnimut ingerlaqqittumik timmisartoqartassaaq ataasinngornikkut, marlunngornikkut, sisamanngornikkut aamma tallimanngornikkut.

Ukiuunerani 2026-mi angalanissamut pilersaarummut nutaamut atatillugu Avannaani illoqarfinnut allanut taakkunanngaanniillu atassuteqarnerit aaqqissuunneqarput, tassani qitiutinneqarpoq angalanerup ingerlanera ataqatigiissoq aamma pitsaanerusumik ornitanut apuussinnaaneq. Matuma kinguliani atassuteqarfiit atuuttut aammattaaq Ilulissani unnuisinnaanermut pisariaqarsinnaasut. 

Aasiaat
Københavnimiit Aasiannut ullormi tassani pingasunngornikkut atassuteqartassaaq.

Uummannaq aamma Qaarsut
Marsip aallaqqaataaniit Københavnimiit Uummannamut aamma Qaarsunut ullormi tassani pingasunngornikkut atassuteqartassaaq.

Upernavik
Taamatut aammattaaq Københavnimiit Upernavimmut ullormi tassani pingasunngornikkut atassuteqartassaaq. Taamaattorli Upernavimmiit Københavnip tungaanut angalasussat Ilulissani unnuinissartik naatsorsuutigisariaqarpaat.

Qaanaaq
Københavnimut imaluunniit tassanngaanniit Qaanaaq aqqusaarlugu ullormi tassani attaveqartassanngilaq. Angallavik Ilulissat – Upernavik – Qaanaaq marlunngornerit tamaasa timmisartorfigineqartassaaq, tamatuma kinguneraa avannamut aamma kujammut angalasussat Ilulissani unnuisarnissaat.

Bilitsinik tuniniaaneq maannakkut ammavoq aamma bilitsit Air Greenland.gl aammattaaq Club Timmisa aqqutigalugit pisiarineqarsinnaapput.

Naatsorsuutigineqarpoq Air Greenland 2027-mi upernaakkut ingerlatsiviup timmisartussani  Airbus A320neo, Unaaq tigussagaa. Timmisartup angalanermut ilanngunneqarnermi Ilulissat aamma Københavnip akornanni ingerlavimmi sullissineq ingerlatilissavaa. Tamatuma saniatigut A320neo aammattaaq Nuup aamma Københavnip akornanni attaveqarnermut ilanngunneqassaaq. Angallavimmi tassani angalanissamut pilersaartut kingusinnerusukkut tamanut saqqummiunneqassaaq.