Air Greenlandip Nuummi Eqaarsaartartut DGI Verdensholdi peqatigalugu angalaneranni tapersersorpai, taakku sapaatit akunnerini makkunani Kalaallit Nunaanni illoqarfinnut nunaqarfinnullu tikeraarput. 

Sapaatit akunneri sisamat ingerlaneranni Verdensholdip Ilulissat, Sisimiut Nuullu tikissavai – kiisalu Kapisillit Qeqertarsuatsiaallu – tassani meeqqat inuusuttullu workshoppertitsinerit aqqutigalugit ataatsimoorfigissallugit, aalaneq, timimik ilisimaarinninneq ataatsimoornerlu ukkataralugit. Tikeraarnerit tamanut akeqanngitsumik takutitsinernik naggaserneqassapput.  

Angalaneq Timersoqatigiit Kattuffiata “Ataatsimoorluta Aalasa”-mik suliniutaanut ilaavoq, nunatsinni tamarmi inuulluataarnermik timigissarnermillu siuarsaanissamik siunertaqartoq.  

DGI Verdenshold ukiut marlukkaarlugit nunarsuaq tamakkerlugu angalasarpoq meeqqanillu inuusuttunillu naapitsisarluni, workshoppertitsinerit, atuarfinnut pulaarnerit takutitsinerillu aqqutigalugit. Kalaallit Nunaanni pingaartumik meeqqat atuarfianni atuartut namminneq aalasaqatigiinnissamut periarfissaqarnissaat aammalu aalannermit nuannaaruteqarnermik misigisaqarnissaat ukkatarineqarpoq.  

– Suliniut isumalimmik imaqarpoq, amerlasuunillu tikinneqarsinnaatitsilluni meeqqanullu inuusuttunullu namminneq peqataallutillu aalasaqatigiinnissamut periarfissiimmat. Tamanna angalanermut tapersersuinitsinni aalajangiisuulluinnarsimavoq, Air Greenlandimi attaveqaqatigiinnermut piujuartitsinermullu pisortaq Inga Dóra G. Markussen oqarpoq.  

Angalaneq maanna Ilulissani aallartereerpoq, tassani timersortarfimmi unnugu, marlunngornermi juunip 9-anni, takutitsisoqassalluni. Tamatuma kingorna holdi Sisimiunut ingerlaqqissaaq, tassanilu workshoppertitsillunilu takutitsissalluni tallimanngornermi juunip 12-anni.  

Juunip 15-anniit 17-ata tungaanut meeqqat inuusuttullu 1.200-t tungaanut amerlassusillit Nuummi Inussivimmi Verdensholdimik naapitsinissaat naatsorsuutigineqarpoq. Tamatuma kingorna innuttaasut tamarmik juunip 18-anni aammalu juunip 27-anni akeqanngitsumik takutitsinernut tikilluaqqusaapput.  

Akunnermili Verdensholdip aamma Kapisillit Qeqertarsuatsiaallu tikeraassavai, tassanilu workshoppertitsissallutik.  

- Air Greenlandip, Lionsip Nunafondenillu tapersersuinngikkaluarpata  angalaneq  piviusunngorsinnaasimassanngikkaluarpoq. Tamanna Kalaallit Nunaanni amerlanerpaanut anngussinnaanitsinnut periarfissiivoq, Nuummi Eqaarsaartartut siulittaasuat Line Poulsen oqarpoq.  

Takutitsinerit tamarmik akeqanngillat tamanut ammasuullutik.