Air Greenlandip isumaqatiginninniarnernut atatillugu akissarsianik qaffaanissamik neqerooruteqarneranut akissutitut suliumajunnaarnissamik ilimasaarutip aappaa Dansk Metal-ip nassiuppaa. Suliumajunnaarneq juunip ulluisa 23-anni aallartinneqarsinnaavoq, aammalu piviusunngussaguni Danmarkip Kalaallillu Nunaata akornanni timmisartuussinernut tamanut eqquisussaalluni.

Siorna Dansk Metal-ip poorskikkunni angallannissap tungaanut suliumajunnaarnissamik ilimasaaruteqareernerata kingorna Air Greenland aamma Dansk Metal piffissami sivisunerusumi Isumaqatigiissitsiniartarfimmut apuunneqartumik isumaqatiginninniareerlutik isumaqatigiissuteqarput. Tassani illuatungeriit 2023-imi naapeqqinniarlutik isumaqatigiipput, Dansk Metal-ip Air Greenlandimi ilaasortaasa, tassalu Timmisartuni Mekanikerit kisimik akissarsiaat isumaqatiginninniarfigineqartussaallutik. Dansk Metal-imiit akissarsianut qaffaatissatut siunnersuutit, Air Greenlandimit saqqummiunneqartut itigartinneqarput, maannalu suliumajunnaarnissamut ilimasaarutip aappaa nassiunneqarpoq, tamatumalu kingunerisaanik isumaqatigiissuteqartoqanngippat, juunip ulluisa 23-anni suliumajunnaarneq aallartinneqarsinnaalissaaq.

Air Greenlandimiit isumaqatiginninniarnernut pisortaasup, HR-imi pisortaanerup Mads Barlach Christensen-ip Dansk Metalimiit ilimasaarineq uggoraa, tassani aamma kalaallit innuttaasut inuussutissarsiortullu sallunaveeqqutitut atoqqinneqalermata.

- Suleqatigiinni immikkoortut pitsaalluinnartunik akissarsiaqareersut matumani eqqartorpagut. Akissarsiaat qallerlugit akissarsianut qaffaatissat pitsaasorujussuit, kalaallit suliffeqarneranni sulisut eqimattakkaat allat pissarsiaannit qaffasinnerusut neqeroorutigaagut. Isumaqarpugut neqeroorutini Dansk Metal-ip ilaasortai ilaatigut Kalaallit Nunaanni aningaasat nalikillinerinut naleqqiullugu ukiunut arlalinnut qulakkeeriffigigivut, tamannalu ukiuni tulliuttuni sulisunut aamma Air Greenlandimut eqqissititsissasoq. Sulisunut eqimattanut taakkununnga pitsaasunik atugassaqartitsinissaq eqqissisimatitsinissarlu, taamaalillutalu tamatta siunissamut piareersimallualernissarput uatsinnut pingaaruteqarsimavoq. Dansk Metal-ip piumasaatut aningaasanik, Dansk Metal-ip piumasaatut akissarsiat qaffaqqinnissaannut atugassanik aallerfissarput ataasiinnaavoq – tassaappullu bilitsit akii, atuisunit akilerneqartussat. Ingerlatseqatigiiffiup ataannarnissaa qulakkeerniarlugu Dansk Metal-imut Kalaallit Nunaanni pissutsinik eqqarsaateqaqqusinerput Air Greenlandimiit aalajangiusimaannartariaqarparput, taamaanngippat allat tamarmik akisussaassuseqarnerunngimmata, HR-imut pisortaaneq nassuiaavoq.

Taamaakkaluartoq Air Greenlandip akissarsiassanut qaffaatissatut siunnersuutit tamarmik Dansk Metal-imit itigartinneqarput, ullorlu 22. maaji 2023 suliumajunnaarnissamut ilisimasaarutip aappaa Air Greenlandimit tiguneqarpoq.

- Dansk Metal akissarsiat qaffaatissaannik naapertuutinngilluinnartunik piumasaqarpoq. Ukiup ataatsip ingerlanerani akissarsiat qaffaatissaannik, allanik suliaqartut ukiut pingasuniit sisamat ingerlanerini anguneqartartut amerlaqataannik piumasaqarput. Ukiut arlallit ingerlanerini akissarsiat qaffaatissaannut najoqqutassianik assigiinngitsunik arlalinnik neqerooruteqarpugut, taamaalillunilu Dansk Metal-ip ilaasortaasa ukiunut arlalinnut siumut qulakkeeriffigineqarnissaat, atuisullu ukiut tamaasa suliumajunnaarnissamut ilimasaarneqarnermik eqqarsaateqartannginnissaat qulakkeerniarneqarpoq.

Air Greenlandip maanna Isumaqatigiissitsiniartarfimmiit aggersaassut utaqqivaa, taassumalu illuatungeriit suliumajunnaarnerup aallartinnginnerani aaqqiissutissamik nassaarnissamut isumaqatiginninniartinniarlugit aggersassagai naatsorsuutigineqarpoq.

- Nalunngilarput, suliumajunnaarneq piviusunngussappat inuiaqatigiinni suliassaqarfiit annertuut sunnerneqartussaasut. Dansk Metal-imiit piffissaq, atuisut amerlasuut sulinngiffeqarlutik angalanissaminnik pilersaarusiorfigisaat eqqorneqarpoq, aammalu angajoqqaarpassuit meeqqatik efterskolereerlutik ilinniareerlutillu angerlarpata takunissaannut qilanaarput. Dansk Metal suliumajunnaarnissamik ilisimasaarummik nassiussinermini piffissamik eqquinerluttorujussuuvoq. Taamaattumik bilitsinut piumasaqaatitsinnik oqilisaalluta, aammalu atuisut suliumajunnaartoqaraluarpat suliumajunnaartoqanngikkaluarpalluunniit qanoq iliorsinnaanerinik erseqqissaalluta sulianik aallartitsereerpugut. Kisiannili erseqqissaatigineqassaaq, suli Dansk Metal-imut isumaqatigiissuteqarnissarput, taamaalillutalu suliumajunnaarnissamik pinngitsoortitsinissarput neriuutigaarput, HR-imi Pisortaaneq erseqqissaavoq.

Air Greenland piaartumik atuisut juunip ulluisa 23-ata kingorna angalasussat qanoq iliornissaannut paasissutissanik amerlanerusunik nalunaaruteqarumaarpoq.

Maaj-ip 22-iat 2023