Allattoq: Poul Krarup 

- Qulit missaannik ukioqarlunga 1985-86-mi Bell-212-mut ilaaqqaarpunga. Juullip inuata mittarfimmiit Dronning Ingridip napparsimavissuarmut timmisartuunneqarnerani ilaagama.

- Misigisaq uannut nuanneqaaq, taamanimiillu timmisartorneq nuannarilerpara. Tamannalu ilaatigut timmisartortartunngorninnut peqqutit ilagaat, Jacob Nitter Sørensen, timmisartortartunut pisortaasimasoq maannalu Air Greenlandimi pisortaaneq oqarpoq.

- Bell-212-ip naggataamik timmisartuussinerani timmisartoq taana, Sikorsky-61-tuulli nunatta oqaluttuarisaanerani pingaarutilimmik sullissilluarsimasoq inuulluaqquarput, Jacob Nitter oqarpoq

- 212-i nunatta immikkoortuini tamani atuussimavoq, isorliunerusuni aamma sullissisarsimagami.

- Timmisartorlu taanna tassaagunarpoq nunatsinni napparsimasunik angallassinernut, annaassiniarnernut aammalu ujaasinernut atorneqarnerpaasimasoq, oqarpoq.

Nuannarineqarsimava?

- Suliffeqarfittut annertuumik iluarisimaarparput. Timmisartortartut sullitallu iluareqaat isumannaatsuutillugulu, Jacob Nitter oqarpoq.

- Qularinngilaralu Bell-212-ip nipaa amerlaqisunit maqaasineqassasoq. Nipaami immikkuullareqigami, nipi qulimiguulimmut ilaaqqaarninniit puigunngisaannagara.

- Eqqaamaneqaatissaasali pingaarnersaraat assigiinngitsorpassuarnik timmisartuussisarnerni tatiginarluarluni sullissilluartuusimanera. Allakkat ilaasullu, aammalu napparsimasut naartusullu timmisartuunnerisa saniatigut snescooterinik, qimminik qimuttunik, sanaartortunut kingoraartissanik allarpassuarnillu assartuinerni atorneqartarsimavoq. Tassa nunaqarfinnguani atortussat suulluunniit, umiarsuup tulliani tikinnissaannut utaqqissunneqarsinnaanngitsut, tikisinnissaat isumagisarsimavaa

Naggammik inuulluaqqusinera pillugu atuaruk. Aappaluttoq toortagaq tooruk. 

Soormiuna atorunnaassasoq?

- Ilaatigut naammassisinnaanngisaqartarmat, sanaartorneqarunnaarmat kingoraartissaanillu pissarsiniarneq ajornakusuulermat. Autopiloteqanngilaq timmisartullu sumiissusersiutai atorlugit timmisartuussisinermik ingerlatsisinnaanani. Tamakkulu ilaatigut peqqutigalugit timmisartuussinerit tamaasa timmisartortartut marluusariaqartarput. 

- Ukioq 2017 tikillugu atornissaanut immikkut akuersissuteqarpugut. Silaannakkullu angallassinermut oqartussat taartumi silarluttumilu timmisartuussisarnerit ukioq taanna sukateriffigimmatigit, timmisartumillu atuineq killeqalermat naammagittaalliortoqartalerpoq. Taamatullu ingerlaannarsinnaannginnatta taarsertariaqalerparput.

Qanoruna pisoqaatigisoq?

- Bell-helikopterit siulliit 70-ikkunni pigilerpavut. Tassa Bell-204, Vietnamimi sorsunnermi atormeqarsimasut. Oqaluttuarineqartarporlu qulimiguullit siulliit pigisatta ilaat timitamigut aallaasersorfigineqarnerup kingorna putoqarsimasoq. Uangali takunikuunngilara. Bell-204 aamma Bell-212 imminnut assingupput. Assigiinngissutigaallu 204-t ataatsimik motooreqartut 212-t marlunnik motooreqaramik.

- 80-ikkunni 212-it pigisagut ilapput. Ukiut ingerlanerini 212-it assigiinngitsut qassit pigisimanerigut ilisimanngilara, amerlanerpaagamilli arfineq pingasuupput. Maanakkullu pigiunnaalikkagut kingulliit ukiut 40-t sinnerlugit pisoqaassuseqarput. Taakku Airbus-imeersunit H155-nit taarserneqassapput, pisiassatsinnillu arfineq marluusunit tallimat pigilereerpavut, oqaluttuarpoq.

Timmisartunik iluarsaasartoq qulimiguulik B212 pillugu qanoq oqarpa? Aappaluttoq toortagaq tooruk.

Qulimiguulik nutaaq isornartorsiorneqangaatsiarpoq?

- Aap, isornartorsiuinerlu uanga aamma paasisinnaavara, tassami Upernaviup pigisaani aallarniarneq ullut 14-t tikillugit utaqqiffiusimavoq. Aamma kujataaniit, taamatullu borgmesterimit, isornartorsiuineq paasisinnaalluarpara.

- Tamannalu ajuusaarutigeqaara.

- Isornartorsiutillu assigiinngitsunik peqquteqarput, ilaatigut 2017-mi sukaterinerit H155-ip taartumi timmisartuussisinnaassusaanik eqquimmata.

- Kiffartuussinissamullu isumaqatigiissutinut akiliutaasoq peqqutigalugu, qulimiguulinnik akisunernik pisinissaq periarfissaasimanngilaq.

- Nunattali avannaani kujataanilu silaannakkut angallassinermi inuuttaasunut atugassarititaasut pitsanngornissaat anguniarlugu suliniartuarpugut.

- Suliniuteqarfivullu pingasut ukuusut taarusuppakka:

- Piffinni assigiinngitsuni teknikkikkut silamilluunniit ajornartoortarnernut ikiuuttussamik qulimiguulimmik nutaamik juunip aallaqqaataani pisaassaagut.

- Nunatsinnilu kingoraartissanik uninngasuuteqartarneq pitsanngorsaaffigissavarput. Maannamut Airbusimik isumaqatigiissuterput malillugu kingoraartissanik pisariaqartitsileraangatta taakkununga piniartarpugut. Aaqqiissulli taanna uagutsinnut sullitatsinnulluunniit naammaginarsimanngilaq. Kingoraartissat ingerlaannaq pisariaqartitat isumaginissaat Airbus-imit eqqortinneqarsinnaasarsimanngimmat. Tamannalu tunngavigalugu kingoraartissanik 15 miliuuninik nalilinnik pisivugut, taakkulu nunap immikkoortuni tamani kingorartissaasivinnut inissinneqarnerini qulimiguullit ingerlaannaq suliarineqarsinnaalissapput.

- Naggataatigullu taassavara teknikeritta timmisartortartuttalu maannakkut qulimiguullit sungiunniarnerat qanorlu pisoqartarnera sungiunniarsaralugu iliuuseqartuarmata. Taamaasillutik paatsoornerit ikinnerulissapput pisullu ingerlanerini piaarnerpaamik qanoq qisuariartarnissaq ilisimalissavaat. Ingerlatsivimmi uagutsitut ittumi qulimiguullit ukiuni 10-15-ni sungiunniarnerat nalinginnaavoq. Tamannalu sulisutta pikkorissut maanna angulerpaat.

- Iliuutsillu taakku pingasut H155-ip atorneqarnerisa pitsanngornerinik kinguneqassaaq, Jacob Nitter neriorsuivoq.

Qulimiguulik B212-mi timmisartartuusimasoq qanoq oqarpa? Aappaluttoq toortagaq tooruk.