3658

2023 oktobarip 26, sisamanngorneq

Air Greenland aamma Greenland Travel Timersoqatigiit Assammik Arsartartut Kattuffiat suleqatigiinnissamik isumaqatigiissusioqatigaat

Air Greenlandip Greenland Travelillu tulluussimaarutigaat Timersoqatigiit Assammik Arsartartut Kattuffiannut, TAAK-mut, 2023-miit 2025-mut tapersersuisinnaagamik. Isumaqatigiissuteqarneq assammik arsarnerup nukittorsarneqarnissaanik aammalu nunatta nunanit tamalaanit tikitassatut nittarsaanneqarnissaanik siunertaqarpoq.

 

Nunatta assammik arsarluni unammisartuisa arnat ukioq manna VM-mut, Norgemi Sverigemi Danmarkimilu novembarip 29-niit decembarip 17-anut ingerlanneqartussamut, peqataanissamut piareersarnerat ilutigalugu tapersersuinissamut isumaqatigiissuteqarneq pivoq. Taamatut unammiuaarneq timersornikkut nunatsinnik nittarsaassinerinnaanani nunatsinni innuttaasut ataatsimoorsinnaassusaanik assamillu arsarnermik pingaartitsinitsinnik takutitsiviussaaq.

 

Nunatta assammik arsarluni unammisartuisa arnat VM-mi peqataanissamut piareersarnerinut tapersersuinerup saniatigut isumaqatigiissummut aamma ilaatinneqarpoq piffissami 2023-mit 2025-mut assammik arsarluni unammisarnernut aaqqissuussisarnerni tapiissuteqartarnissaq. Assammik arsarluni kattuffiup ilaasortatik 1200-t missaaniittut sinnerlugit unammisarnernut aaqqissuusseriaatsit allanngortinneqarnissaat kissaatigaa, tamatumalu ineriartortinneqarnissaanut Air Greenland Greenland Travelilu peqataasinnaapput.

 

Bilitsit Ilik-mik taaguutillit, peqatigiiffinnut atugassatut naatsorsuussaasut, saniatigut, angalanissanut inniminniinernik pitsaasunik atugassaqassapput. Peqatigiiffiit angalanerinut, siusissukkullu pilersaarusiukkanut, akit nalinginnaasut 75%-ii tikillugit akikilliliisoqartarpoq, taamaasillunilu timmisartuni inissaqalernera peqatigiiffiit allat aamma iluaqutigilluarluarsinnaassavaat.

Air Greenland Groupip pisortaanerata Jacob Nitter Sørensenip, tapersersuinissamik isumaqatigiissut TAAK-ip siulittaasuanut tullermut Arnanguak Steenholdtimut siulersuisunilu ilaasortamut Eqalunnguaq Abel Kristiansenimut tunniuppaa. Ass.: Emil Stach

Air Greenland Groupip pisortaanerata Jacob Nitter Sørensenip, tapersersuinissamik isumaqatigiissut TAAK-ip siulittaasuanut tullermut Arnanguak Steenholdtimut siulersuisunilu ilaasortamut Eqalunnguaq Abel Kristiansenimut tunniuppaa. Ass.: Emil Stach

Stavangerimut VM-mut timmisartoq

Assammik arsartartut kattuffiannik isumaqatigiissummut ilaavoq Air Greenlandip Stavangerimit Kangersussuarmut immikkut timmisartuussinissaa, tassanilu nunatsinnit isiginnaariat, nunatta assamik arsartartuisa arnat VM-imi unamminerni tapersersuereerlutik nunatsinnut toqqaannaq uternissaat qulakkeerneqarpoq.

 

Air Greenlandip Greenland Travelillu taamatut tapersersuinikkut nunatta tikitassatut pissanganartutut ussassaarutiginerata saniatigut assammik arsartartut nunani tamalaani assammik arsartartut akornanni angusarissaarluarnissamut kajumissuseqalersinnissaat tapersersorpaa. Assammik arsarnerup ingerlanerani  ataatsimooqatigiinnissaq misigisaqaqatigiinnissarlu qilanaaraarput.

G65A4347

Air Greenland Groupimi CEO Jacob Nitter Sørensen oqarpoq:

- Periarfissamut immikkuullarissumut akuusinnaanerput nuannaarutigaarput. Assammik arsarneq, nunatsinnilu meeqqat, inuusuttuaqqat, inuusuttut inersimasullu  pissartanngorniunerini tamatta ataatsimoorfigisarpavut. Assammik arsartartutut aallartinnermiit nunatta arsartartuinut ilaalerneq tikillugu ineriartortitseqataaneq pitsaasumik sunniuteqaqataaffigissavarput.

Nunarput sinnerlugu assammik arsartartut, angutit arnallu, nunatta avataani unammersuarnerni peqataanerat timersornikkut angusaasarpoq annertooq. Suleqatigiilernermi uani Nunatsinni assammik arsartartut kattuffiat aamma Greenland Travel peqatigalugit nunani tamalaani nunarput sinnerlugu timersortartunut aaqqissuusseriaatsip nukittorsarneqarneranut suleqataassaagu.  

Ass.: Emil Stach 

G65A4369

TAAK-mi siulersuisup tullia Arnanguak Steenholdt, kattuffik sinnerlugu tapersersuisutut isumaqatigiissut atsiorpaa. Tapiissuteqartarnissamullu isumaqatigiissut nuannaarutigeqaa.

- Air Greenlandimik Greenland Travelimillu isumaqatigiissuteqarnerput nuannaarutigeqaarput. Isumaqatigiissut kattuffimmi anguniakkatta takorluukattalu anguniarnerinut iluaqutaassaqaaq. Pingaartumik siunissami nunatta iluani aammalumi nunarsuup sinneranut nunarput sinnerlugu unammisartut sungiusaasullu angalasarnissaat ajornannginnerulissaaq.

Air Greenlandip Greenland Travelilu suleqatigilerneri siunissami kattuffimmut iluaqutaassaqaaq. Air Greenlandip aammalu Greenland Travelip ilisarnaataat tulluussimaarluta tujuuluaqqatsinni nittarsaatissavavut, Arnanguak Steenholdt oqarpoq.

Ass.: Emil Stach