Nalitsinni piujuartitsisumik anguniakkat siunertatsinniipput, aammali siunissami kinguaariit takkukkumaartut inuunermik pitsaasumik inuuneqarnissaat sulissutigerusupparput.

Taakkununnga anguniakkanut ilaatillugu suliffeqarfissuarmi kajumissutsimik sulineq siuarsaaffigerusupparput, nunatsinni peqatigiiffilerineq kivitseqataaffigerusullugu.

Suleqatigiinnerit aqqutigalugit suliakkiutit piujuartitsinermut tunngasut, aallarnisaanernik siuarsaasut, nunagisamut attaveqarneq aamma uatsinnut niuernikkut attuumassuteqartunut immikkut isiginiarusuppugut. Tapiisarnitsinni piffimmiit piffimmut assigiinngiiaartunik suliassaaqanut siunertanullu tapiipallattarneq qimakkiartuaarparput, suleqatigiinnerilli sivisunerusut piujuartitsinerusumillu nunami nunarsuarmullu ineriartorfiusut pilersikkusunnerungaarlutigit.

Piujuartitsisumik takornariaqarneq tapersersorparput tapersersuinerpullu piumasaqaatinik arfinilinnik tunuliaquteqartipparput soorlu siunissaq ungasinnerusoq isigalugu isumaqatigiissutip iluaqutissartai isiginiarlutigit aamma ilaanerput nuna tamakkerlugu piujuartitsisumik takornariaqarnermut ineriartortitsinermut iluaqutaassanersoq.

Fonden for Entrepenørskabi

2017-imili Fonden for Entreprenørskab Kalaallit Nunaanniittup meeqqat atuarfianni atuartut ilinniartullu nutaaliorluni aallarnisaanermik atuartitaanerminni ilikkagaqarnissaat sulissutigisimavaa, namminneq nutaaliorlutik kingornalu suliffeqarfiliorsinnaanerat annertusarniarlugu.

Kalaallit Nunaanni suliassat piujuartitsisumut tunngasut pissanganartut tapersersornissaat tulluusimaarutigaarput, taamaalillutalu aamma nunatsinni nutaaliorluni aallarnisaanerit qaffassaaqataaffigisinnaallugit.Suleqatigiinnissamik isumaqatigiissummi Air Greenland ilisimasanik, aaqqissuussani ikiuunnernik, ukiumullu billetsinik angalanissanut tapiinernik tapersiinissaminik pisussaaffeqalerpoq. Angalanerit meeqqat atuarfianni nutaaliorluni aallarnisaanerit ilisimanerulerlugillu paasisaqarfiginerulersitsissapput.

Air Greenlandip Fonden for Entreprenørskab-Kalaallit Nunaata suleqatiginissaanut isumaqatigiissut ukiunik marlunnik sivitsorpaa.

Visit Greenlandilu suleqatigiilluarneq

Air Greenlandip Visit Greenlandillu nunatsinni piujuartitsisumik takornariaqarnerup annertusarnissaa assigiimmik anguniagaraat. Taamaattumillu suleqatigiinnermik pilersitsivugut tusagassiuutit assigiinngitsut tulluartullu nunatta avataaneersut nunatsinni takornariaqarneq piujuartitsinerusoq anguniarlugu suliniutigineqartut assigiinngitsut nunarsuarmioqatitsinnut takutikkusullugit nittarsaakkusullugillu.

Suleqatigiiffigisarpullu aamma alla pingaaruteqarluinnartoq tassaavoq Greenland Businessilu nersornaatip Greenland Tourism Awardip agguaattarnera.

Nersornaat nunatsinni najugaqartumut piujuartitsisumik aallaaveqartumik tunisassiamik ineriartortitsisimasumut nersornaasiunneqartarpoq. Takornariartitsinermi piujuartitsineq sorpassuusinnaavoq, ajugaasorli toqqarneqartarpoq najukkamini suliffissanik pilersitseqataasimanersoq apeqqutaalluni, ineriartortitsinerlu pinngortitamut nunallu pissarititaanut ataqqinnilluni suliaanersoq, nutaaliornermik isumannaallisaanermillu toqqammaveqartumik.

2021-mi Diskobay Tours pingaarnertut akissarsivoq, taanna Nivé Heilmannimit Frank Larsenimillu ingerlanneqarpoq, Travel by Heartilu, Elise Bruunimit ingerlanneqartoq Peoples Choicemik nersornaatisilluni.

Greenland Tourism Award COVID-19 peqqutigalugu 2020-mi agguaanneqanngilaq, 2019-imili Arctic Dream, Lars Peter Anker Møllerimit ingerlanneqartoq akissarsisuuvoq.