World of Greenland Hotel Arctiilu ingerlatseqatigiiffimmi nutaami – taaguutilimmi Arctic Hospitality Cooperation – kattunneqassapput sammivillu allanngortillugu. Maaji 2025-miit World of Greenlandip pingaarnertut suliassarilissavaa unnuisarfinnik tassalu akunnittarfinnik illuaqqanillu ingerlatsineq piorsaanerlu

World of Greenlandip angallassinermik suliaqarunnaarnissaanik aalajangiineq pivoq juunimi periusissiorniarluni isumasioqatigiinnermi, tamannalu Ilulissani angalanissanik aaqqissuussisartut ima amerlatigilersimaneranerisa inerneralugu, World of Grenland tassani peqataasariaarulluni.

- Taamani Topas pisarigatsigu illuaqqanik nunarsuarmit tamarmit ornigarneqarusussinnaasunik ingerlatsineq piorsaanerlu siunertaasimavoq, sulilumi siunertaalluni. Tamanna aningaasaliineruvoq annertooq sumiiffinnilu inissisimaffigisatsinni takornariaqarnermik aamma kivitseqataasoq. Tunisassianik takuniarneqarusuttunik amerlanernik pilersitsinissaq anguniarsimavarput, Jacob Nitter Sørensen oqarpoq.

World of Greenland suliffeqarfissuarmit Air Greenlandimit pigineqarpoq, Ilulissaniit 80 kilometerit missaannik ungasitsigisumi iigartartup Eqip eqqaani illuaqqanik piginnittuullunilu ingerlatsisoq, tassalu Igloo Lodges, illoqarfimmit 15 kilometerit

2026-imi Ilulissani mittaarfissuaq atorneqalerpat Ilulissat eqaannerusumik tikinneqarsinnaalissapput. Takornariat amerlissapput, illoqarfimmi siniffiusinnaasut amerlisariaqarnerannik kinguneqartumik, avannaalu tikiffissatut piorsartariaqarluni.

- Ullumikkut inissatigut ima tatineqareersimavugut silarlukkaangat inerujussuarni siniffilersuisariaqartarluta. Tamanna takornariarfissamik piorsaanermut iluaqutaanngilaq. Tikikkuminarnerulernernissaanut maannakkut iliuuseqartariaqarpugut, suleqatigiiulluta, takornariarfissamik piorsaataasinnaasumik, Jacob Nitter Sørensen oqarpoq nangillunilu:

- Ingerlatseqatigiiffittut inuiaqatigiinnit pigineqartutut piginneqataanissatsinnut pisussaaffeqarpugut, taamaalilluta suleqataalluta takornariaqarnerlu piorsarlugu, Ilulissaniinnaanngitsoq aammali avannaani tamarmi ornigassanik. World of Greenlandimi misilittakkat ilisimasallu pigilikkat atorluarniarlugit aalajangerpugut ingerlatseqatigiiffiup Hotel Arctic peqatigalugu ingerlatseqatigiiffimmut ataatsimoortumut kattunneqarnissaa,  Arctic Hospitality Corporation,  taaguutigalugu.

Ingerlatseqatigiiffiit Hotel Arctic aamma World of Greenland ingerlaannassapput ilisimaneqarnertik suliatillu atorlugit, taakku iluaquseeqatigiinnerat pingaaruteqalissalluni, septembarip naalernerani Ilulissani akunnittarfimmik nutaamik pilersitsinissamut ingerlatseqatigiiffik nutaaq akuersissuteqalerpat

- Mittarfissap nutaap ineriartornissaanut atatillugu, pingaaruteqarpoq illoqarfimmi unnuinissamut periarfissat amerlinissaat taamaalillunilu nunamut tamarmut iluaqusiilluni, oqarpoq nangillunilu:

- Unammillernerup ilungersunarsinissaanut maannakkut piareersimanissarput pingaaruteqarpoq. Ataatsimoorluta soqutigisaqarpugut, tassalu nunap immikkoortuani angallannermik ingerlatsisut suleqatigalugit Kalaallit Nunaata siuarsarnissaanik. Tamatta naammattunik suliassaqassaagut, Jacob Nitter Sørensen erseqqissaavoq.