3177

Timmisartunut orsussamik uumassusillit igitassartaannit sanaamik atuinissamik isumaqatigiissuteqarnerup, Atlantikoq qulaallugu timmisartuussivik nunani tamalaani pitsaanerpaat ilaattut inissippaa

Air Greenlandip timmisartunut orsussamik uumassusillit igitassartaannik sanaamik atuinissamut isumaqatigiissuteqarnera, ingerlatsiviup timmisartuussinerini nungusaataanngitsumik tunngavillit atornerulernissaannik siunertaqarneranut annertuumik alloriarneruvoq, nunanilu tamalaani siuttunngortillugu.

Siunissami Kangerlussuarmiit Københavnimut timmisartuussinerni orsussamik atuinerup 5 procentia orsussamit uumassusillit igitassartaannit pilersitamit, SAF-mit, pissaaq Air Greenlandilu taamatut aningaasaliinermigut Europami silaannakkut angallassisartunit allanit siuarsimanerujussuanngorpoq.

 

Kangerlussuarmiit Københavnip mittarfianut timmisartuussinerit ullumikkumiit nungusaataannginnerusumik orsussamik, Sustainable Aviation Fuel (SAF)-mik atuiffiulissaaq. Tamannalu Air Greenlandip DCC & Shell Aviation Denmarkilu, nunarsuarmi orsussamik pineqartumik sanaartortut annerpaanut ilaasup, akornanni oqaluttuarisaanermi aatsaat taama annertutigisumik isumaqatigiissusiornerup inerneraa. SAF uumassusilinnit igitassanit, iganermut uulia atornikoq aamma ilanngullugu, 100 procentimik sanaajuvoq.*

Bestyrelse Airgreenland 7

- Air Greenlandip siulersuisuisa 2019-mili ingerlatsiviup periusissiaani timmisartuutit qulimiguullillu nungusaataanngitsumik atuiffiusussatut nutarsarnissaat sulissutiga. Orsussamik atuinitta annikillisarneratigut taamaasillutalu CO2-mik aniatitsinikinnerulernitsigut, Nunatta nungusaataanngitsumik atuiffinngornissaanik siunniussaq tapersersorumavarput.  Silaannakkut angallassinermi pinngortitap tunniussinnaasaanik atuinissaq Air Greenlandip kulturiani aammalu ingerlatsinerup nungusaataanngitsumik tunngaveqarnissaa pimoorunneqartuarpoq, tamannalu Atlantikoq qulaallugu timmisartorsuatta A330neo-mik taarserneqarneranut pissutaarpiartut ilagaat, Air Greenlandimi siulersuisunut siulittaasoq Bodil Marie Damgaard oqarpoq.

 

Jacob Nitter Sørensen, Air Greenlandimi pisortaaneq ima itisiliivoq:

Jacob Nitter Med Tuukkaqs Haleror I Baggrunden Mindre

- Atlantikoq qulaallugu timmisartorsuartaatsinnik orsussamik atuinerput annikillisipparput, taamatullu Tuukkap ingerlaarnerisa 5 procentiini SAF-imik atuinissaq pisussaaffigileratsigu, CO2-mik aniatitsinerput suli annikinnerulissaaq. Air Greenlandillu taamatut isumaqatigiissusiornermigut Europami silaannakkut angallassisartuni nungusaataanngitsumik atuisunut siuttunut akuulernera tullussimaarutigaara, oqarpoq. 

Isumaqatigiissutip nassataanik timmisartunut orsussaq SAF atorlugu Københavnimiit tassungalu timmisartortarneq Danmarkimi Eurapimiluunniit allanit annertuneruvoq. Ukiumullu timmisartuussinerit 5 procentii SAF atorlugu pisassapput. Air Greenlandilu taamaasilluni silaannakkut angallassinerup ukiut amerlanngitsut qaangiuppata SAF-mik atuinissamut peqqussutit malinneqalernissaannut nammineq iliuuseqarnermigut annertuumik alloriarpoq, DCC & Shell Aviation Denmarkimi pisortaaneq Ulrik V. Brendstrup oqarpoq.

- EU-milu anguniagaasoq 2025-mi Europami timmisartortitseqatigiit orsussamik atugaasa minnerpaamik 2 procentia SAF-unissaa eqqarsaatigalugu, Air Greenlandilu massakkut annertuumik alloriarpugut. Suliniullu tamanna immikkut iliuusaavoq – aamma nunani tamalaani pissutsit eqqarsaatigalugit. SAF-mimmi pilersuinissamut isumaqatigiissusiorfigisatsinni asseqanngitsumik taanna annertunerpaavoq, oqarpoq.

 

Københavnip mittarfissuani pilersuineq annerpaaq

Air Greenlandip aamma DCC & Shell Aviation Denmarkip isumaqatigiissusiorneratigut SAF-mik Danmarkimi mittarfiit annersaannut tunisisarneq aatsaavissuaq pisussanngorpoq. Air Greenlandimummi SAF-imik pilersuinissaq mittarfimmi attaveqaasersuutinut ilaalissaaq. Isumaqatigiissullu Københavnip mittarfissuata oqaluttuarisaanerani nutaamik pilersitsivoq, Thomas Woldbye, Københavns Lufthavne A/S-mi pisortaaneq nassuiaavoq.

 

- Timmisartummi orsussaannik nungusaataanngitsoq tunngavigalugu pilersitanik atuinerulerneq, silannakkut angallannermi pinngortitap tunniussaanik atuinerunissamik siunniussap anguniarneranut malunnaataasumik iluaqutaassaqaaq, Københavnimilu mittarfissuarmi tassannga atuilernissap ineriartortinneqarnerani suleqataavugut. DCC & Shell Aviation Denmarkillu Københavnip mittarfiani SAF-mik taamatut nittarsaassinera nuannaarutigeqaarput.  

 

Orsussat PtX-it ineriartortinnerinut nalilersorneqarnerinullu sinaakkutissat eqqortut qulakkeerneqarnissaannik utaqqinitsinni orsussat uumassusilinnit pisut aallarniutigineri pitsaasuuvoq, neriuppungalu Air Greenlandip taamatut maligassiuilluni suliniuteqarnera ingerlatsivinnut mittarfimmit sullissisunut isumassarsisitsissasoq. Isumagalu malillugu taamatut allannguinissamut siuttuunissamut silaannakkut angallassisut piareersimapput, Thomas Woldbye oqarpoq.

 

DCC & Shell Aviation Denmark Danmarkimi mittarfinnut orsussamik pilersuisuupput, Sune Petersen-ilu, Head of Sustainability & Strategy-tut atorfeqartoq malillugu, SAF-mut soqutiginninneq annertusiartorpoq.

 

- Silaannakkut angallassineq nukissiutinik allannguinermi immikkut soqutigineqarpoq. Maannakkullu ikummatissamik nunap iluanit pisumik atuiunnaarnissamut SAF pingaartutut inissisimavoq. Silaannakkullu angallassinermik suliallit allat assigalugit, siunissamilu SAF-ip PtX atorlugu sanaap timmisartunik orsersuisalernissamut ikaarsaarnissamut, SAF uumassusillit igitassartaannit sanaaq atussallugu pitsaasuunera isumaqatigaarput.

*SAF-ilu uumassusillit igitassartaat kisiisa atorlugit sanaajummat, ikummatissanut nunamiit pisunut sanilliugu orsussap taassuma atornerani silaannaap kissakkiartorneranut sunniutigisinnaasaai 80 procent tikillugu annikinnerussaaq.

Video uani isiginnaaruk