Ullumi arfininngorneq apriilip 26-at nunarsuaq tamakkerlugu timmisartortartut ulloraat, ”International Pilots’ Day”, siunertaalluni nunarsuarmi tamarmi timmisartortartut ataqqiniarlugit illoqarfiit nunallu akornanni attaviliisutut pingaarutilimmik inissisimanerannut, inuit assartukkallu isumannaatsumik apuuffissaannut apuuttarmatigit.

Air Greenlandimi neriuutigaarput timmisartortartutta nersorniarneranni peqataarusussasusi, taakku mekanikerivullu ullut tamarluinnangajaasa Air Greenlandip timmisartui qulimiguuliutaalu ingerlatittarmatigit. Timmisartortartut silaannakkut angallannerup imaannaanngitsup iluani immikkut ataqqisariaqartutut sulipput, ingammik nunarsuarmi inissisimanerput silallu pissusaa eqqarsaatigalugit nunatsinni tamarmi Air Greenlandip suliffigisaani.

Nunarsuaq tamakkerlugu timmisartortartut ulluat periarfissatsialaavoq paasinialaassallugu timmisartortartuvut ulluinnarni sunik naapitaqartarnersut.

Siullermilli paasissutissat tunngaviusut naatsumik oqaluttuarilaarniarpavut, nunatsinni mittarfinni heliportinilu tamani maleruagassaqarmat, atukkat assigiinngitsut pillugit aalajangiisuusartunik. Silamut tunngasinnaavoq, soorlu isikkiviginnera, anorip sammivia sakkortussusaalu, kissassusaa, mittarfiup qanoq ittuunera upalungaarsimanerlu – soorlu aamma timminermi silaannaq aalarulussinnaasoq.

Naatsumik oqaatigalugu sorpassuit apeqqutaasarput Air Greenlandimi qulimiguullit timmisartullu aallartinnagit, timminerni isumannaatsuunissaq apeqquserneqarsinnaassanngimmat. Tingeqqaarnermi timmineq pilersaarutit malillugit ingerlasarpoq, ilaannili aqqutaani allannguisariaqartarput, timmisartortartoq eqqissisimasariaqarluni, misilittakkani aalajaassutsinilu atorlugit isumannaatsumik missinnaalluni, mittarfik heliportilu sumiikkaluarpat.

Suna pineqarnersoq erseqqissalaarniarlugu marlunngornermit apriilip 22-anit pingasunngornermillu apriilip 23-anit assit videollu takutippavut, videomi kingulianiittumi takutinneqartutuut. Ullormi tassani Nuuk Kangerlua appasissumik pujorpoq mittarfiullu eqqaa putsumik poorsimalluni.

Silap pissusaata kingunerisaanik GL1781, Air Greenlandimit A330neo ”Tuukkaq” apriilip 22-ani Københavnimut utertariaqarpoq, timmisartorsuaq Tunumut killittorlu. Københavnimiit akunnerit pingasut affarlu qaangiummata aquttarfimmi inuttat, timmisartortartoq Thomas aamma aquttoq Otto Air Greenlandip timminermik aqutsisoqarfianit nalunaarfigineqarput Nuummut silassaq nutarterneqarsimasoq. Piffissami timmisartup miffissaata nalaani isikkiviluppallaarpoq, taamaalilluni pitsaanerpaatinneqarluni Tuukkap Københavnimut uternissaa.

Qujanartumik ilaasut aalajangiineq paasilluarsinnaavaat, naak akunnerni sisamani affarmilu timmeqqittussaallutik, taamaalillunilu akunnerni arfineq marlunni. Isumannaatsuunissaq pingaarnerpaavoq. Københavnimut tikikkamik ilaasut aqaguani pingasunngornermi apriilip 23-ani GL3781-imi ilaanissaminnut nutaamik pilersaarusiuunneqarput.

Soorunami ilaasut pissangarpaloqaat maanna timmineq iluatsissanersoq, kingumummi silassaq nalunaarutigineqarpoq, appasissunik nuiaqarluni pujorlunilu, timmisartoq aqqarnup missaani Københavnimit tingimmat.

Ullormi tassani kingumut timmisartup naalagaraa Thomas Kjærulff, aquttoq tassaalluni Sten Andersen, taassuma ilaasut silassamik nassuiaallugit. Timmisartoq naammattumik ikummatissaqarpoq pisariaqassagaluarpat akunnerit marluk angullugit minnissamut qulaavaartariaqarnissamut – imaluunniit kingumut Københavnimut uternissamut Keflavik aqqusaarlugu orsertariaqassalluni.

Kangerlussuup mittarfia periarfissaanngilaq, naak ukiuni qulikkaani nunat tamat akornanni timmisartornikkut qitiusaraluartoq. Ullumikkut mittarfik nukissaqanngilaq taamaattunik suliaqarnissamut, pisariaqarmat timmisartup widebody soorlu A330-800 usilersornissaanut.

Tuukkap aquttarfiani inuttat ilaasut timmisartunik allanik marlunnik ilisimatippaat pujoq ussiillippat minniartunik, timmisartorlu ambulance missimasoq. Maanna Tuukkaq misiliisussanngorpoq, aqumiullu minnissamut piareersaapput. Pissanganeq annertusiartorpoq timmisartoq nuissakkut ammukarmat ilaasorpassuillu igalaaqanngitsumiittut issiaviup saaminniittup tunuani tv malinnaavigaat. Tuukkaq ”landscape cameraqarpoq” timmisartup siuaniittumik allalu timmisartup ataaniilluni.

Flightradar24.com-ikkut Greenland Airportsillu toqqaannartumik YouTubekkut aallakaatitsinerani malinnaasut saniatigut Nuup mittarfiata eqqaaniittoqarpoq. Taakku ilagaat Varvara Holm, mittarfiup avannaatungaaniittoq, Tuukkarlu qanilliartorpaluttoq tusaasinnaallugu, nalunaaqutarlu nunatsinni 13.45-nngortoq timmisartoq tassanngaannaq putsumit anillappoq meriaraluarlunilu. Iluatsinngilaq, taamaattumik qangattapilooqqittariaqarluni.

Air Greenlandip qullersaqarfiani suligaanni Tuukkaq mittoq qangattartorlu tusaaneqarpiarneq ajorpoq motoorii Rolls-Royce Trent 7000 peqqutigalugit. Timmiartortartulli sukkatsippallammassuk tusarsaalluarpoq. Ilaasuulluni motoorit sakkortussusaat malugineqarsinnaasarpoq, timmisartumilu pissangaammerpallattoqartoq tusaaneqarsinnaavoq – oqiliallannerunersoq ernumaammernerunersorluunniit nalunarluni.

Maanna apeqqutaaginnalerpoq ”nukappiaraanersoq niviarsiaraanersorluunniit” – tassalu timmisartoq missanersoq uterluniluunniit. Misileeqqinnissamulli suli ikummatissaqarpoq. Nalunaaqutaq 13.59, tassalu misiliigaluarnermit minutsit 14 missaat qaangimmata aquttarfimmit nuannersumik nalunaartoqarpoq: Timmisartut Dash8 ilaat meqqammertoq, mitsitsisarfimmilu minnissamut periarfissaginnerusoq nalunaarutigineqarluni.

Qullersaqarfimmi suleqatit sumiiffinni assigiinngitsuni katersuupput. Ilaat saaffiginnittarfimmiipput minnissaa YouTubekkut malinnaaviginiarugu, allat Call Centerimiillutik mittarfimmut sammisumi.

Minnissamut kingullerpaamik piareersartoqarpoq, videomilu pissanganeq nuannaarnerlu takuneqarsinnaavoq – timmisartumiiginnanngitsoq aammali silataaniiit – timmisartoq GL3781 nunatta nalunaaqutaa malillugu 14.15 isumannaatsumik Nuummut mimmat.

Taamatut oqaluttuassarpassuit ilaattut oqaluttuarnitsinni timmisartortartuvut nersorniarpavut ukioq kaajallallugu ornigassatsinnut isumannaatsumik apuussisarnerannut – aamma atukkani imaannaanngitsuni.

”International Pilots’ Day”-imi pilluaritsi!