Inuppassuit nunatta kangiani suliaqarnitsinni timmisartuusseqqilernissarput anguniarlugu ulluni kingullerni marlussunni suleqataapput. Maanna pilersaarutit iluatsilermata timmisartuussisaqattaarnerlu aallartimmat susoqarnersoq oqaluttuarisinnaanngorparput.

Atuisutta Tasiilamut Tasiilamiillu kiisalu nunaqarfiinukarnerminni nunaqarfinniillu angalanerminni misigisimasaattut sumiiffimmi pineqartumi timmisartorput qulimiguulik pillugu teknikkeqarnikkut unammillernartoqarpugut. Ajoqutip aaqqiivigineqarnissaanut piginnaasat aalajangersimasut pisariaqarput, taannalu pissarsiariuminaatsissimavarput. Taamammat aaqqiissutissanik allanik, soorlu timmisartuutitta qulimiguullit allat ullumikkut arfininngornermi Narsarsuarmiiit Tasiilamut nuutsinneqarneranik tariaqarneranik, iliuuseqarpugut. Tamannali maanna pisariaaruppoq.

Timmisartunut qulimiguulinnut teknikerit marluk najukkami qulimiguulimmik timmisartuussisartoq, Greenland Copter, timmisartuutimi ilaata AS350-iusup Air Greenland sinnerlugu timmisartuussisaqattaarnissamik suliap aallartinnissaannut ikiorniarlugu pingasunngormat Kulusummukarlutik aallarput. Ajoraluartumik sumiiffimmi sila pissutigalugu kinguaattoortoqarpoq, Greenland Copterilli teknikerigut ippassaq tallimanngornermi Tasiilaliaassinnaasimavai, maannalu timmisartoq qulimiguulik ilaasoqarluni timmisartuussinissaminut oqartussanit akuerineqartussanngorlugu piareersarneqarpoq.  (billede)

Air Greenlandip Greenland Copterip timmisartuutaa qulimiguulik AS350 OY-HZN tallimanik ilaasoqarsinnaasoq uagullu timmisartuutitta qulimiguullip piareernissaata tungaanut timmisartuusseqattaartussaq attartorpaa.

Timmisartuussinermik suliaqarnermi isumannaallisaaneq peqqutigalugu malittarisassarpassuit malinneqartussaapput, soorlu timmisartortartut akuersissutertik ataavartumik nutarterartussaallugulu timmisartut qulimiguullillu qangattannginnerminni ataavartumik aserfallatsaalineqartartussaapput. Taamaammat timmisartuussisaqattaarnissamik suliaq kivissinnaajumallugu Greenland Copter timmisartortartumik Islandimeersumik tikisitsivoq.

Ullumikkut timmisartuussinermi piffissaq atorluarniarlugu Air Greenandip Icelandair oqaloqatigaa, taakkulu Keflavikkimiit aallarnissaq akunnermik ataatsimik siuartissinnaallugu ikiuupput. Timmisartuussinissaq teknikkertoqarnera pissutigalugu kinguaattoorpoq, maannali Icelandairip timmisartuutaa Dash-8 -fly FI 103 Kulusummut missimalerpoq. Taamaalilluni Greenland Copterip timmisartoq qulimiguulik timmisartortartumut tunniunniarlugu Tasiilamiit nal. 11.00 qangattarpoq, taamaalillunilu timmisartuussisaqattaarnermik suliaq aallarteqqissinnaanngorpoq.

Timmisartortussanik kinguaattooqqasunik ”katersineq” maanna aallartippoq, ullumilu timmisartuuterput Dash8 Nuummiit Kulusummut nal. 11.40 mippoq. Tassani Kulusummiit nal. 16.40 timmisartuussinissatta tungaanut ilaasussanik utaqqissaaq. Aqagu sapaammi ullumikkut timmisartuussinertulli timmisartuusseqqissaagut, tassani Greenland Copterip Kulusummiit Tasiilamut utimullu timmisartuussisaqattaarnerani Nuummiit Kulusummut timmisartuussisoqassalluni, kingusinnerusukkullu nunaqarfinnut timmisartuussineq malitareqqiivigineqassaaq.

Piumassuseqaraanni aqqutissaqartoq nunatta kangiani pisut ersersippaat. Greenland Coperimik suleqateqarnerup saniatigut Mittarfeqarfiit timmisartunik qulimiguulinnillu isumaginninnerat, Trafikstyrelsenip qinnuteqaatinik isumaginninnera Icelandairillu aallajaarnissamik akuersaarnera erseqqissassallugu pingaaruteqarpoq. Taakku teknikkeqarnermullu immikkoortortarput timmisartuusseqattaarnissatsinnik piviusunngortitsinerannut annertuumik qutsavigaagut.

Malinnaasutsinnut ilisimatitsinitsinni ilaatigullu takisuumik nassuiaasarnitsinni atuisugut ingammillu timmisartortussat kinguaattortut suliamik kivitsinissamut suut pisariaqartinneqarnersut paasisaqarfigissagaat neriuutigaarput.

Sila naalagaaffigisinnaanngilarput, nunamilu maani angalasartut tamanna ilisimalluarpaat. Teknikkeqarnikkulli unammillernartut matumanitut ittut aqqusaarneqartillugit aaqqiiumalluni suliniuterpassuit ingerlanneqartarput.

Timmisartuussinernik taamaatitsiinnarnitta atuisutsinnut akornusiisimasinnaanerat ajuusaarutigaarput, naammagittarnissinnullu qujavugut. Maanna suliap ingerlannerani silap naakkissagaatigut neriuutigaarput.