4513

2025 februaarip 24, ataasinngorneq

Suleqatigiinnissamik isumaqatigiissut ingerlaqqippoq

Air Greenlandip kiisalu Fonden for Entreprenørskab-Kalaallit Nunaat – Kalaallit Nunaanni nutaaliornissamut aningaasaateqarfiup suleqatigiinnissamik isumaqatigiissusertik ilaatigut meeqqat atuarfiani nutaaliornissamik ilinniartitsinissamik siunertaqartoq nutarterpaat.

 

Suleqatigiinnissamik isumaqatigiissut 2025-2026-mut atuuppoq Air Greenlandip nutaaliornissamut aningaasaateqarfik tapersersorlugu, aningaasaliinikkut katillugit ukiumut bilitsit akiisa nalingannut 150.000 koruuninut kiisalu atuartut unammiuaarneranni, ilisimasanik avitseqatigiinnermi kiisalu aningaasaateqarfiup suliaannik nittarsaassinermi.

 

Air Greenlandip Kalaallit Nunaanni nutaaliornermut aningaasaateqarfik 2017-imi Kalaallit Nunaanni pilersinneqarmalli tapersersorsimavaa, ilaatigut meeqqat atuarfiani ilinniartitsisut 800 sinneqartut nutaaliornermik pikkorissarneraneranni, taakkulu meeqqat atuarfiani atuartut nutaaliornermik ilinniartillugit. Suliaq tamanna Air Greenlandip tapersersuinnarniarpaa.

 

- Piujuartitsinermik suliniutit pissanganartut siammarterneranni peqataasinnaagatta tulluussimaarutigaarput, taamaaliornikkut nutaaliorneq aqqutigalugu Kalaallit Nunaat siuarsaaqataaffigalugu. Isumaqatigiissuteqarnitsigut ilisimasanik tunniussinissamik, aaqqissuussani ikiuunnissamik ilaatigullu ukiumoortumik timminissamut bilitsinik tapiinikkut pisussaaffilerpugut, taakkulu angalanermut atorneqassapput ilinniartitaanermi nutaaliorneq pillugu ilisimaneqarneq ilisimasanillu siammarterineq suleqataaffigalutigu, piujuartitsinermi pisortaq Inga Dora G. Markussen oqarpoq.

 

Iliuuseqarneq Air Greenlandip nunarsuarmi anguniagassatut toqqarsimasaasa sisamaannut ”Pitsaasumik ilinniartitsinermut” tulluarpoq tunaartaqarluartumillu meeqqat inuusuttullu inuiaqatigiinni akisussaaqataanissaannut ilaalluni.

 

- Nutaaliornermik ilinniartitsinermi meeqqat atuarfiani atuartut ajornartorsiutini isumatusaartumik eqqarsarnissamut piukkunnarsarneqarput, isumassarsiornikkullu tunisassianik pilersitsinerup naleqassusianik takunnissinnaalerlutik. Siunissaq ungasinnerusoq eqqarsaatigalugu tamanna piumassuseqalersitsisinnaavoq inuunerminni kingusinnerusukkut aallarnisaasunngornissaminnut, suliffeqarfinnillu nutaanik pilersitsillutik, piujuartitsinermut pisortaq nangilluni oqarpoq.

Ilinniartitsisorpassuit ilinniartitsipput

Atuartut nutaaliornissamik aallanisaanissamillu ilinniartinneqaraangata anguniagaasarpoq meeqqat atuarfiini atuartunut 8.-10.-klassit ukiumoortumik aallarnisaasut unammisinneqarneranni ”Arsarnerit Inuusuttai – Young Northern Lights” peqataanissaat.

 

FFE Kalaallit Nunaanni allattoqarfimmi pisortaq Nakappiaraq Kristiansen oqaluttuarpoq unammineq aamma ilinniartitsinerup tunaartaqarluarnissaanut aqqqutaasartoq, taamaalilluni arlaanik ”anguniagassaqarluni”. Nammineq ukiuni kingullerni ilinniartitsisorpassuit ilinniartissimavai, 2022-milu decembarimi allattoqarfimmi pisortanngoramili nunatsinni unammisitsinerit aaqqissuuttarsimallugit.

 

- Naammagisimaarnartaqaaq takullugu ilinniartitsisunut iliuuseqarneq kinguneqartarmat nunatsinni sumiiffinni meeqqat atuarfiiniit aallarnisaanissamut isumassarsiarpassuaqartarnera. Atuartut avatangiisiminni aallaaveqarajuttarput, allat avatangiisit silallu pissusaat sammisarlugit. Ilinniartitsinerup inerneri takullugit pissanganarpoq, atuartullu isumassarsiai pissarsinartut takullugit, Nukappiaraq Kristiansen oqarpoq.

Ajugaavorlu…?

Tallimanngornermi februaarip 14-ani nunatsinni unammisitsineq ”Arsarnerit Inuusuttai – Young Northern Lights” Nuummi NUIF-iup iniutaanni ingerlanneqarput atuarfinnit arfineq pingasuusunit atuartut 24 peqataaffigisaannik.

 

Matumani Air Greenlandimi piujuartitsinermik siunnersorti Qillaq Olsen peqataavoq naliliisussat ilaattut aallarnisaanissamullu isumassarsiat Nuummi meeqqat angerlarsimaffianit Kristian Jensen aamma sunniiniartartoq Qupanuk Olsen peqatigalugit nalileeqataalluni.

 

- Allaanngilaq TV-kut isiginnaagassiami ”Løvens Hule” niuernissamut isumassarsiap aningaasaliiffigineqarnissaa pillugu ”løvenut” ilaalluni, assigiinngissutigaluguli atuartut aallarnisaasunngorniarnermi Danmarkimi pissartanngorniunnermi peqataanissaminnut isumassartik unammissutigalugu.

 

Ukiut arfinillit matuma siornagut nammineq peqataavoq maannakkut Greenland Business Schoolimi taaguuteqalersumi ilinniartuulluni. Eqqaamavaa isumassarsiamik piorsaanermik suliaqarneq qanoq innersoq nunatsinni unammisitsinermi angusarissaartumik.

 

- Uannut ersarippoq inuusuttut isumassarsiaminnik piorsaallaqqissisimaqisut, nunarsuarmioqataasutullu isiginneriaaseqarlutik, Qillaq Olsen oqarpoq.

Image (16)

Air Greenlandimi piujuartitsinermik siunnersorti Qillaq Olsen kiisalu FFE-KN-imi allattoqarfimmi pisortaq Nukappiaraq Kristiansen peqatigalugu ajugaasusatut pointinik kisitsisut.

 

Naliliisussat ilungersuatinneqavissorput nalilersuereeramillu isumaqatigiissutigaat Atuarfik Hans Lyngemiit atuartut unamminermi ”Arsarnerit Inuusuttai – Young Northern Lights” ajugaasuusut, pinnguaasiaminni nutaaliortutut isumassarsiaminnut, atuarfimmi nunalerutinik inuiaqatigiilerinermilu ilinniartitsinerup nuannernerullunilu soqutiginarnerulersinnissaa siunertaralugu.

Image (17)

Arsarnerit Inuusuttai – Young Northern Lights-imi ajugaapput  Atuarfik Hans Lyngemi atuartut.

Unamminermi ajugaanerup saniatigut katillugit 25.000 koruunit nalingannut timmisartumut bilitsinik angalanissamut tunissutisipput, taakkulu atorneqassapput atuartut ilinniartitsisullu angalanerannut aprilip 25-ani Koldingimi Nutaaliornermut Danmarkimi pissartanngorniunnissamut peqataaniarlutik angalanerannut.

Image (15)

Tulliupput Gammeqarfik Aasiannit atuartut, appimik piorsaallutik aallarnisaasutut isumassarsiaminnut inuusuttut CV-mik allannissaannut suliffissarsiornissamullu iluaqutigisinnaasaannik.

 

Air Greenlandip ukiumoortumik aningaasaliissutai 150.000 koruunit avinneqartarput, 100.000 koruunit Kalaallit Nunaanni sammisaqartitsinernut atorneqarlutik angalanissamut tunissutit marluk tamarmik 25.000 koruuninik imaqartut unamminermi ajugaasunut tunngatinneqarlutik.

 

FFE Kalaallit Nunaat pillugu paasisat:

Siunertaraa aallarnisaasutut periarfissat Kalaallit Nunaanni ilinniartitsinermut ilanngunneqarnissaat. Taamatut ilinniartinneqarnermikkut meeqqat inuusuttullu nutaamik eqqarsarsinnaanerat nukittorsarneqassaaq, periarfissanik takunnissinnaalerlutik naleqartunillu pilersitsinissamut isumassarsiat piviusunngortillugit. Kalaallit Nunaanni siulersuisoqarlunilu allattoqarfeqarpoq meeqqat atuarfianni inuusuttullu ilinniartitaaneranni aallarnisaasunngornissamik ilinniartitsinerup siammarternissaanik tunngaviunissaanillu isumaginnittussanik.