Qulimiguulik sermimik qallersimasoq qaqqap qaavani unittooqqavoq. Motooria aserorsimagami asimi unittooqqaffimmi taarserneqartariaqarpoq.

Ukiarli sila allanngorartorujussuuvoq. Air Greenlandillu teknikeriisa motoori taarseriartorlugu sakkortusaavimmut apuutileramik Air Greenlandip qulimiguuliutaa takujuminaatsippaat.

Qulimiguulimmi sermimik 5 centimeterinik silitsigisumik qallersimagami qalipaataa aappaluttoq takuneqalaaginnarsinnaavoq.

Tamanna Air Greenlandimiittut pissutsini immikkut ittuni sulinerannik takutitsisoq, Chief Pilot AS350, Daniel Skoglund isumaqarpoq.

- Kalaallit Nunaanni sulineq immikkoorluinnartuuvoq. Suliassat attaveqaatit taamaanneranni, soorlu sakkortusaavimmut aqqusineqannginnerani, suliassarujussuanngoriaannaasarput, taanna oqarpoq.

Qulimiguugik sermimik qallersimanngikkaluarpat, suliaq suli nalinginnaasuunavianngilaq. Hangarip kissalaartup suliffissaqqittullu avataani motoorimik taarsiineq immikkut ittuusoq, Chief Pilotip nassuiaatigaa.

Taamaammat suliaq aamma ukiumut timmisartortarunnaarfiungajalernermiittoq unammillernarpoq. Aircraft Technicianimulli Nicki Sarkov Petersenimut motoorimik taarsiiartoqataanissaq annilaanganaqqajanngilaq.

- Sakkortusaavik. Immap qaavanit meterit 800-nik qaffasitsigisoq, Sermersuullu eqqaaniittoq. Uummannap kujataata kangisissuani 70 kilometerinik ungasitsigisoq. Ingerlaannangajallunga akuersivunga. Nuannerunarpaluttupilussuuvoq, teknikeri oqarpoq.

Taanna suleqataalu sakkortusaavimmut misissueqqaariartorlutik oktobarip ulluisa 14-ianni apuukkamik qulimiguullip qaqqap qaavani unittooqqasup saniatigut eqqumiitsumik takusaqanngillat.

Silarluttussaanerali ilimasaarutigineqarmat, motoori ulloq taanna taarsinngilaat.

- Kiassuariarluni siallilertussaavoq, kingornalu imalilioriarluni issilertussaalluni, Nicki Sarkov Petersen oqarpoq.

Qulimiguullip suluusai piiariarlugit Ilulissanut uterput. Illoqarfimmiinnerminnilu silap qanoq innera maluginiarpaat. Siullermik siallerujussuarpoq, kingornalu issilerluni.

Taamaammat teknikerit qulimiguullip sermermik qallersimanissaa ilimagereerpaat. Sakkortusaavimmulli oktobarip ulluisa 20-anni uteramik takusartik suli tupaallaatigaat. Napparutit apummik sermimillu qallersimagamik qaqortuinnaapput, qaqqallu aamma apiffiusimaqisut tunuanniimmata, napparutit takujuminaallutik.

- Qaqortuinnaavoq. Anorip sammivianeeratta takusinnaasagut apummik sermimillu qalleqqapput, sakkortusaavillu takusinnaanngingajallutigu. Aallaqqaammut takusinnaanngilarput, qanilligattali radarit qulimiguulillu takusinnaalerpagut.

Suli silarluppoq. Teknikerit arfineq-pingasunik issittumi sulipput, anorilu piffissap ilaani sekuntimut 20 meterinik sukkassuseqarluni. Taamaammat anorlerunnaaminngippat, teknikerit suliunnaarallaqqittariaqassapput. Ulloqeqqasioreeramilli anorlerunnaarpoq. Motoorillu taarsernissaanut sulinerup aallartinneranit nalunaaquttap akunneri qulingiluat qaangiuttut qulimiguulik nutaamik motooreqalereerpoq, angerlamullu ingerlanneqareerluni.

Tamannalu torrallaanerusoq, Daniel Skoglund isumaqarpoq.

- Qulimiguullip sakkortusaavimmi unittooqqasup motooriata nutaamik ullualunnguit ingerlanerani taarsernissaanut Air Greenlandimi sulisussaqarnerput, ilisimasaqarnerput, piginnaaneqarnerpullu kakkaginarsinnaanngitsuunngilaq, Daniel Skoglund oqarpoq.

- Tamanna Air Greenlandip pissutsini ilungersunarluinnartuni sulinissaminut ilisimasaqarneranik misilittagaqarneranillu takutitsivoq, Chief Pilot oqarpoq.