Ullumi, sisamanngornermi novembarip 28-ani 2024-mi, ulloq oqaluttuarisaanermut pingaarutilik nalliussineqarpoq. Taamaattumik Air Greenlandimi tamatta Greenland Airports Nuummi mittarfittaarsuup ammarneqarneranut atatillugu pilluaqqungaarparput. 

Ulloq manna uagutsinnut aamma immikkut ittuuvoq, timmisartuni takisuunut timmisartuussisuni siullersaalluni Tuukkaq mittarfimmut nutaarluinnarmut 2200 meterisut takitigisumut missammar. 

Videomi takuneqarsinnaavoq ullormi tassani timmisartorsuaq mittarfimmit nutaamit aallartoq siulleq. Timmisartorput GL 281, DASH-8, nal. 07.35 Paamiunut aallarpoq. Paamiut piffissamut nutaamut assiliartaavoq, Air Greenlandillu timmisartuussinermut pilersaarutaanut nutaamut ikaarsaariarnermut nalunaaqutaalluni. 

Angallassinissamut pilersaarut nutaaq aqqutigalugu aqqutit pilersaarutillu allanngortinneqarput, taamaalilluni nunap immikkoortuini mittarfiit Nuuk aqqusaarlugu angallannermut qitiusutut nutaatut ataqatigiilersinneqarput, ilaatigut angalasunut periarfissaalerluni ullormi angallavimmi ataatsimi apuuffissamut apuunnissaq.  

Timmisartuussinissatsinnut pilersaarut nutaaq pillugu paasisaqarnerujumallutit alakkaruk - Angalassiviit 

Air Greenlandimut nunatta timmisartuutileqatigiiffiatut oqaluttuarisaanermi pingaaruteqarpoq timmisartutta DASH-8-ip siullersaalluni Paamiunut aallarnera, Tuukkallu Nuummut tikeqqaarnera, Nuummi mittarfittaaq atoqqaarfissiorlugu. Taamatulli iliorpugut 1979-imi, taamani t Nuummi mittarfik nutaaq, timmisartoq DASH-7 atorlugu merngaarfigigatsigu. 

Nunatta silaannakkut angallannerata oqaluttuarisaanerani kapitali nutaaq, nunarsuarmut immitsinnullu qaninnerulersitsisoq, tikilluaqquarput. 

Suleqatigiilluarnitta ingerlateqqinnissaanik iluatsitsilluarnissassinnillu kissaalluni Air Greenlandimiit pilluaqqusivugut.