GL502-mut nal. 08.05 ilaallutik aallartussat Nuummi mittarfimmi aniartortarfimmut 2-mukaqqusaagamik tupaallatsinneqarput. Angutinit isumannaallisaanermi atorneqartartunik sungaartunik aatsulinnit  tikilluaqquneqarput, puussiaaqqamillu ullaakkorsiutinik imalimmik tunineqaramik, ilaasunit siullerpaallutik mittarfittaassamiit aallartussaasut paasitinneqarput.

Nunatsinni silaannakkut angallassinerup oqaluttuarisaanerani killiffik nutaaq nalliussineqarpoq, mittarfillu nutaanngitsoq 1979-mi septembarimi atulersoq atorunnaassaaq. Ullumi timmisartup siulliup mittarfittaamiit qangattarnissaa allallu minnissaa Mittarfeqarfinni, KAIR-mi Air Greenlandimilu sulisut pissanngatigisimaqaat, najuuttunilli ikittuaraannaat 1979-mi septembarimi timmisartup siulliup tikilluaqquneranut peqataasimapput.

Taakku ilagaat Jørgen Erik Andersen, 1979-mi septembarimi AFIS-imi sulisuusoq. Taassumalu Grønlandsflyp Dash-7-utaa OY-CBT ‘aallartikkamiuk’ eqqaamalluarpaa. Ullumilu timmisartuussinermik siunnersortitut Dash-8 OY-GRG ’aallartinneqarmat’ aamma peqataavoq. Jørgenilu eqqaamasat qaffakaammata killitsilaarpoq, taamatullu aamma ullumi mittarfittaami timmisartup aallarlup siulliuup allallu minnerani Air Greenlandip timmisartuini sulisut siunissami aamma eqqaamasassinneqarput.

Ullumi GL502-p Nuummiit Kangerlussuaq aqqusaarlugu Ilulissiartup inuttarai timmisartup naalagaa Mikael Jakobsen, timmisartup aquttua Peter Sarkov timmisartumilu saqisoq Sara Hansen, taakkulu timmisartuussinissamut qilanaarsimaqaat. Qujanartumik sila ulluni makkunani unerisimavoq, issilluni ullaarlu manna sila kusanarluinnarluni. Timmisartup allannginnerani pisarneq malillugu suleriutsit tamaasa ataasiakkaarlugit qulakkeerneqarput, ilaasullu tikilluaqqoreerlugit, ”Suloraq” mittarfittaap tungaanut ingerlavoq. Misigisaq nuannersoq, timmisartortartunullu aamma sungiusimasatut atuligassaq, timmisartullu iluaniit mittarfik assilineqareermat qangattarnissamut piareerput.

Timmisartorlu mittarfiup isuatungaatigut Borgmester Anniitap aqqutaata tungaanut nal. 08.08 qangattarmat, mittarfittaaq pisortatigoortumik atulerpoq.

Timmisartortartut qangattareernermi ileqquusutut suliassat naammassigamikkit aatsaat misigisaminnik  eqqartuisinnaalerput. Mittarfimmiit qangattaliivinnermi pissanganerup pianik qiiaammiallannermik misigissangasimanngikkaluarnertik timmisartup aquttarfianiittut isumaqatigiissutigaat. Misigisaq immikkut illuinnartoq, ilaquttanut ikinngutinullu oqaluttuarisassanngorpoq.

Ilaasulli immikkut malugisaqanngillat, timmisartup qangattariartornerani mittarfittaap illorsuartassaata tungaanut isikkiveqarneq eqqaassanngikkaanni. Ataatsip mittarfiup maninnerunera malugisimanerarpaa. Minutsit 45-t silagissuup ataani ingerlaareerluni GL 502 Kangerlussuarmut issillunilu erseqqarissumut mippoq. Ilaasullu taakku ulloq taanna Kangerlussuarmut aqqusaartussarpassuarnit siulliupput.

Kingusinnerulaartukkut GL540 Nuummiit assigiinngitsunut ingerlaqqittussanik ilaasoqarluni Kangerlussuarmut tikippoq. Timmisartorlu taanna GL541-mik normoqarluni Nuummut uterpoq. 

Timmisartumi tassani inuttaapput timmisartup naalagaa Edd Arne Lund, aquttoq Benjamin Krarup Hammeken timmisartumilu saqisoq Lisbeth Vængtoft Noahsen. Taakkulu tassaapput Nuummi mittarfittaamut siullersaallutik mittussat, pissangaammertarput aappaatigullu tussunngullutik. Timmisartup naalagaata tuusintileriaqaluni Nuummut missimasup nassuiarpaa, mittarfimmik nutaamik misiliisarneq misilittagartuunut taamaattussaannartut misiginartartoq, timmisartulli aquttuata mittarfimmi nutaanngitsumi siullerpaamik qangattarneq aammalu minneq misigisimagamiuk atorunnaarnissaa tussunngussutigilaarpaa. Minnissaq minutsinik 25-nik sioqqullugu timmisartortartut malittarisassat malillugit minnissamut piareersarput.  

Sermitsiap tungaaniit minnissaq pilersaarutaavoq, mittarfiulli tungaanut apparsarnerup nalaani mittarfimmi biileqarmat, timmisartortartut aalajangerput illoqarfik qulaateriarlugu mittarfiup kujataatungaatigut Borgmester Anniitap aqqutaata nalaaninngaaniit timmisartoq missasoq. 

Mittarfittaap, maannakkjht taamaallaat 930 meterinik takissuseqartup, siullermeerluni qangattarfiullunilu miffigineqarnerani timmisartortartuusut mittarfimmik iluarisimaarinnipput. Nunatta silaannakkut angallassinermi oqaluttuarisaanerani nutaamik pisoqarpoq, mittarfillu 2024-mi naammassiguni 2200 meteritut takissuseqassaaq. Taamanikkussamut mittarfik timmisartunit nunanit tamalaaneersunit atorneqarsinnaasoq ammarneqarpat timmisartunit anginerusunit miffigineqarpat immikkut malunnartitsineq pissaaq, immaqa uffa atlantikoq qulaallugu timmisartortaassarput Tuukkaq siulliulluni missasoq.   

Ullumi timmisartup qangattarneraniit timmisartullu allap minneraniit assit videoliallu aajuku.