Air Greenlandimiit Dansk Metal-imiit aaqqeeqatigiissinnaanermik nassaarniarnissaq siunertaralugu Isumaqatigiissitsiniartarfik 1. apriilimi aggersarneqarpoq. Taamaattumik maanna Dansk Metal-ip oqaloqatigineqarnera tusagassiorfitsigut ingerlanneqarmat uggornarpoq. Tamanna angalasussarpassuarnut, piffissami aaqqiagiinngiffiusumi eqqorneqartussanut toqqissisimajunnaarsitsivoq.

Tamanna pissutigalugu aaqqiagiinnginnermut tunuliaqutaasup mattussinissamillu ilimasaaruteqarnerup tunuliaqutaa pillugu nassuiaanissaq pingaaruteqarpoq.

- Siullermik Dansk Metal-ip suliumajunnaarnissaq, Imarpik qulaallugu angallavimmik matusisussaq ilimasaarutigaa. Tamannalu ukiuni marlunni Covid-19 nunarsuarmi tuniluutereersoq, nunatsinni pissutsit nalinginnaaleriartornerisa kinguninngua pivoq. Taamaalilluni aamma piffissami sivisunerusumi aaqqiagiinngissuteqarneq, arriitsumik, kisiannili qularnaatsumik inuiaqatigiinnut kalaallinut ipisitsiartuaartussaq Dansk Metal-imit siunnerfigineqarpoq, Mads B. Christensen, HR-imi pisortaaneq oqarpoq nangillunilu:

- Tamannarpiaq peqqutigalugu Air Greenland sulisitsisutut, aaqqiagiinngissuteqarnissamik ilimasaaruteqarnermut atatillugu sakkussatuaminik atuisariaqalerpoq, tassalu suliassaqarfimmi sulisunik tamanik mattussinissaq, Dansk Metal-ip suliumajunnaarnissamik ilisimasaaruteqarneranut akissutaasussaq.

Air Greenland mattussinermigut piumasaqaatit, Dansk Metal-imiit saqqummiunneqartut, Nuummi, ilulissani Qaqortumilu mittarfiit nutaat ammarpara piffissamut silaannakkut angallannermi Air Greenlandip annertunerusumik unammillerneqarfissaanut naleqqiullugu qaffasippallaarnerat oqariartuutigisussaavaa. Ukiuni tulliuttuni bilitsinut akit apparnissaannut akissaqarnissaq pingaaruteqartorujussuuvoq. Taamaattumik aamma akissarsiat piviusorsiortumik ineriartornissaat pingaaruteqarpoq – aamma Dansk Metal-ip ilaasortaanut. Paasivarput, Dansk Metal-ip Danmarkimi akissarsiat ineriartorneri aallaavigigai, Kalaallit Nunaat, sulisut tamarmik ulluinnarni suliffigisaat aallaaviginagu, Mads B. Christensen oqarpoq nangillunilu:

- Air Greenlandimiit maani nunatsinni ineriartornermut naleqquttumik, aammalu sulisutsinnut, SIK-p HK-llu ataanni atorfilinnut isumaqatigiissutaareersunut, aammalu sulisunut ataasiakkaanut, katillugit 275-it isumaqatigiissutinut naapertuuttumik isumaqatigiissusiornissaq isumaqatigiissusiornissaq neqeroorutigaarput. Taanna akissarsiat ineriartornerannut piviusorsiortumut naleqquppoq, tamatumalu peqatigisaanik bilitsit akikinnerulernissaannik anguniagaqarnerput angusinnaavarput, Mads B. Christensen oqarpoq.

Island aqqusaarlugu timmisartuussisarnissaq piviusorsiunngilaq

Dansk Metal Kalaallit Nunaata Danmarkillu akornanni aqqut toqqaannartoq matuniarlugu aalajangeramik, tamanna aamma nunatsinni timmisartukkut angallassinermut pingaarutilimmik sunniuteqassasoq Dansk Metal-imiit ilisimaneqarpoq.

- Tamannami inuiaqatigiinnut kalaallinut Europami Danmarkimut aqqutit assartuussiffiusut (qimuttuitsut aqqutaasa, ikaartarfiit/aqqusernit, umiarsuit ikaartaatit timmisartullu aallartussat) tamangajaasa ullormiit ullormut Dansk Metal-imiit matuneqarnerinut assersuunneqarsinnaavoq, HR-imi pisortaaneq Mads B. Christensen oqarpoq nangillunilu:

- Dansk Metal-imiit nunarsuarmi avatangiisitsinnut ersersinniagaa tassaavoq, nunatsinnut nunatsinniillu assartuussinermik pisariaqartitsineq Islandimut angallavik, sapaatit akunnerannut marlussoriarluni timmisartoq 37-nik ilaasoqarsinnaasoq atorlugu angallavigineqarsinnaasoq aqqutigalugu naammassineqarsinnaasoq. Pissusiviusut tassaapput, ullumikkut suliassaq Airbus 330-220, sapaatit akunnerannut sisamaniit arfineq marluk tikillugit timmisartuussisartoq, 278-inik ilaasoqarsinnaasoq, taakkulu saniatigut nassiussanik, soorlu nakorsaanermi misissugassanik, pilersuinermi, kingoraartissaqarnermilu il.il. pisariaqartinneqartunik, ullormiit ullormut allamut kinguartinneqarsinnaanngitsunik suleriaaseq atorlugu siumut utimullu assartugassanik nassarsinnaasoq atorlugu pisariaqartitsineq taanna naammassineqartarmat.

Naatsumik oqaatigalugu Island aqqutigalugu aammalu Icelandair atorlugu nunatsinnut nunatsinniillu ilaasunik, nassiussanik, attaveqaatinillu pisariaqartunik angallassinermi sullissinissamut pisariaqartitsinerullu matussusernissaanut pisinnaasat naammanngillat. Aamma Island aqqutigalugu Danmarkimut Europamullu angalanermi amerlanertigut unnuisoqartartussaavoq, tamannalu angalanermik ajornarnerulersitseqqittussaavoq akisunerulersitseqqittussaallunilu.

- Tassanilu Dansk Metal-ip aammaloorlutik attaveqaatitta ilusiinut ilisimasaqannginertik takuteqqippaat, erseqqissaavoq.

Tusagassiorfiit aqqutigalugit oqallinneq toqqissisimajunnaarsitsivoq

Piffissami kingullermi suliumajunnaarnissamik ilimasaarinernut atatillugu nalunaaruteqarnerit taamaattaat danskit kalaallillu tusagassiorfiisigut saqqummiunneqarsimapput. Taamatut ineriartortoqarnera Air Greenlandimiit uggorineqarpoq.

- Tusagassiorfitsigut ingerlatsineq uggorisorujussuuarput. Tamanna angallatassatsinnut toqqissisimajunnaarsitsingaatsiarpoq, maannalu ilaqutariit angalanissaminnik taamaatitsisalereerput, angalanissaminnullu pilersaarutiminnik sivisuumik utaqqisimasaminnik allanngortitsisalereerlutik – aammaloorlutik. Timersoqatigiiffiit ernumapput, piffissami suliumajunnaarnissamik ilimasaaruteqarfiusumi nunatsinni pissartanngorniunnerit ingerlanneqartussaammata, aammalu umiarsuaatileqatigiiffiit periarfissanik allanik ujartuilereerput. Suliumajunnaartoqassappat, tamannalu neriuutiginngilarput, suliumajunnaarnerup sapinngisamik sivikitsuunissaa inuiaqatigiinnut pingaaruteqartorujussuuvoq. Tamanna pissutigalugu matusinermik akissuteqaqqinnissarput aalajangiupparput, HR-imi pisortaaneq Mads B. Christensen oqarpoq.

Air Greenlandimiit matusinissaq ilimasaarutigineqartoq 11. apriilimi aallartissaaq. Kisiannili illuatungeriit Isumaqatigissitsiniartarfik aqqutigalugu isumaqatiginninniarlutik 1. apriilimi naapissapput, tassanilu illuatungeriit isumaqatigiinnissaq anguniassavaat.

21. marts 2022, 12:45