Nuup Iqaluillu akornanni ukiup matuma aallartinnerani pilersaarutaasumik timmisarnissap aallartinnera uggornalaaraluartoq maanna Air Greenlandimit nalunaarutigisinnaavarput, illoqarfiit pingaarnerit marluk akornanni angalanissamut pilersaarutit apriilimi atuutileqqissamata. Uani sapaatit akunnerani angalanissaq sulissutigineqarpoq, aqqummi angalanissamut pilersaarutit sinneri allanngortinneqaratik oktobarip 22-at tikillugu pingasunngornerit tamaasa ingerlanneqassallutik.

Ullumikkut apriilip 9-ani 2025-mi Air Greenlandimik angalasussat angalanissamut pilersaarutinik nutaanik neqeroorfigineqassapput, apriilillu 16-ani, 23-ani 30-anilu uagutsinnik timmisussat naatsorsuutigisinnaallugu, ullut tulliuttut marluk ingerlaneranni angalanissamut pilersaarummik nutaamik tunineqarnissartik.

Air Greenlandimi nalunaarut ataasinngornermi apriilip 7-ani angalasussanut nassiunneqartoq ajuusaarutigaarput. Air Greenlandimit nalunaarutigineqarpoq apriilimi timminissat taamaatinneqartut aqqummi ilimaginngisamik aningaasartuuteqarnissaq peqqutigalugu angalasussallu ikippallaarlutik. Apriilip 2-ani siullermik timminissaq aqaguttoq Air Greenland Canadami ilanngaaserisunit ilimaginngisamik akiligassinneqarpoq, taamaalilluni aqqut oqimaaqatigeeqqalaareersoq amigartoorutaassalluni, taamaattumillu aalajangerneqarluni, timminissat siulliit marlussuit taamaatinneqassasut, pisut aaqqissuunnissaat pillugu.

Ullumikkut aalajangerpugut apriilimi oktobarillu tungaanut angalanissamik pilersaarutit ingerlanneqassasut, sulissutigineqarporli siunissami aqqutip tapersersorneqarnissaa.

Angalasussat taamaatitsinermik nalunaarfigineqaramik paasitinneqarput bilitsip akia utertissinnaagaat. Ajoraluartumilli nalunaarummi allassimanngilaq, angalasut angalanissamut pilersaarummik nutaamik neqeroorfigineqassasut, soorlu aamma ilaasut ullumikkut apriilip 9-ani timmisartortussaagalugit unnuisariaqarsinnaasut Nuummi Air Greenlandip allaffia attavigisinnaagaat imaluunniit Iqalunni Canadian North, taakku taamaatitsinerni ilaasutsinnik ikiuuttarmata.

Air Greenlandimi ajuusaarpugut paatsoorneqarsinnaasumik nalunaarutip kingunerinut, erseqqissarlutigulu timmisartuutileqatigiit ilaasunut maleruagassat assigiinngitsut atuuttut malimmagit. Aamma erseqqissarneqassaaq Air Greenland politikkeqarmat ilaasut taamaatitsinerni eqqugaasut isumagineqarnissaannik, angalanissamut nutaamik pilersaarusiuullugit, nerisat ineqarnerlu isumagalugit. Tamanna Air Greenlandimi Kalaallit Nunaanni inatsisit malillugit piumasaqaataanngikkaluarpoq, taamaaliornissarli aalajangersimavarput, Issittumi, taamaalillunilu Iqalunnut Iqalunniillu, timmisartukkut angallassinermi ingerlatsinermi atukkat ilisimagatsigit.

Timminissap inissinnissaata Nuummiillu tinginissaata nalunaarutiginissaanut qilanaarpugut, taamaalillutalu Nunavummi sanilitsinnut silaannakkut ikaartarfimmik pilersitseqataalluta, tassanngalu Canadian North suleqatigalugu ornigassanut allanut ingerlaqqilluni.