Ullumi decembarip 21-ani Namminersorlutik Oqartussat aamma Air Greenlandip inuussutissarsiutigalugu pilotit ilinniartitaanerat pillugu nutartikkamik isumaqatigiissuteqarput.

Isumaqatigiissuteqarnerup kingunerisaanik Air Greenland Center Air Pilot Academy Danmarkimiittoq aqqutigalugu ukiumut inuussutissarsiutigalugu pilotitut ilinniartut arfinillit ilinniarnissaannik aqutsisinnaalissaaq, taamaalillunilu ukioq 2030 tikillugu inuussutissarsiutigalugu ilinniartut 36-t ilinniarnissaannut aqutsinissaq periarfissaqarfigilissallugu. Siornatigut isumaqatigiissutaasumi pilotit sisamat ilinniarnissaat pineqarsimavoq.

Pilotitut ilinniarnermut aningaasartuutit affaasa Namminersorlutik Oqartussanit matussuserneqartarnerat, affaasalu ilinniartut ataasiakkaat ilinniarnermi taarsigassarsianut allanngortinneqartarnerat suli isumaqatigiissummut ilaavoq.

”Namminersorlutik Oqartussanut isumaqatigiissuterput nuannaarutigaarput. Pilotitta sulinerisa sivitsoriartornera takusinnaavarput. Taamaattumik isumaqatigiissummi matumani avataaniit tikisitsisarnermut taarsiullugu pilotinik nammineerluta atorfinitsitsisinnaalernissarput qulakkeerneqassaaq, tamatumalu peqatigisaanik pilotigut misilittagaqarnerusut soraarninngortarnerini pilotit naammannissaat qulakkeerneqassalluni”, HR-imi pisortaaneq Mads B. Christensen oqarpoq.

Air Greenlandip 1981-imili Namminersorlutik Oqartussanut isumaqatigiissut aqqutigalugu inuussutissarsiutigalugu pilotit ilinniartitaanerat aqutarisimavaa, aammalu inuussutissarsiutigalugu ilinniartut katillugit 34-t ilinniarneri aqutarisimallugu.

”Nunatsinni ataqatigiissumik attaveqarneq qulakkeerniarlugu Air Greenlandip tunisassiorsinnaanermut pisariaqartinneqartutut naatsorsuutigisaasa naammassinissaat pingaaruteqarpoq. Tamanna tunngavigalugu Naalakkersuisut aalajangerput, 2030 tikillugu inuussutissarsiutigalugu pilotitut ilinniartut aningaasaqarnikkut taperserneqarnissaannut immikkut ittumik periarfissiisoqassasoq”, Ilinniartitaanermut Naalakkersuisoq Aqqaluaq B. Egede oqarpoq.

Air Greenland inuussutissarsiutigalugu pilotit ilinniartitaanerinik eqqortumik ataqatigiissaarinissamut pisariaqartinneqartunik piginnaaneqarpoq isumalluuteqarlunilu. Taamaattumik Timmisartuussisarnernut Pisortap isumaqatigiissut nuannaarutigaa.

”Isumaqatigiissuteqarnikkut pilotinngortussanut ilinniartitaanerup pitsaassusiata qaffasinnissaa qulakkiissavarput, tamannalu silaannakkut angallassinermut pingaaruteqarpoq. Tamatumunnga tapersiisinnaagatta nuannaarutigaarput”, Timmisartuussisarnernut Pisortaq Ove Heilmann Grødem oqarpoq.

Suliffeqarfimmi assigiinngisitaarnissamik anguniagaqarnitsinnut ilaatillugu sapinngisamik arnat angutillu katitigaanerisa oqimaaqatigiissinnissaat ilinniartussarsiortarnitsinni anguniagarissavarput.

Inuussutissarsiutigalugu pilotit ilinniartitaanerat pillugu isumaqatigiissut januaarip aallaqqaataani 2024-mi atuutilissaaq, apriilillu aallaqqaataata 2030-ip tungaanut atuutissalluni. Pilotitut ilinniartitaanermut qinnuteqarnissarsi soqutigigussiuk link-it uku aqqutigalugit annertunerusumik atuagaqarsinnaavusi qinnuteqarsinnaallusilu.