Allattoq: Poul Krarup

Mekanikeritta ilaat qulimiguulimmik Bell-212-mik sivisunerpaamik ’paarsisimasoq’ taamaattumillu tassannga ilisimanneqqissaartoq tassaavoq Finn Lennert. Taannalu qulimiguulik Air Greenlandimi ilaasunik naggammeerluni angallassisoq pillugu oqaloqatigaaga

- Motoriata aallanngitsoornera misigisimanngisaannarpara, 1981-mi Bell-212-p siulliup Texasimiit tikinneraniilli tassani sulisuusoq, Finn Lennert, oqarpoq. Qulimiguulillu pisoqaanerpaaq ukiunik 42-nik pisoqaassuseqarpoq.

- Nunatsinni qulimiguulik taanna suliffigalugu nunap immikkoortui assigiinngitsut tamangajaasa suliffigisarsimavakka, silalu qanorluunniit ikkaluaraangat aallartissinnaajuarsimavara. Qulimiguulik qajannaatsuuvoq, nunatsinnilu annertuumik pingaaruteqarsimavoq, oqaluttuarpoq.

Bell-212-ip nunatsinnut timmisartuunnera sivisoqaaq, tassa  USA-mit Texasimiit USA aqqusaarlugu, Canadami Nunavumi Iqaluit aqqusaarlugu Davis Stræde ikaariarlugu Sisimiut aqqusaarlugu Nuummut tikipput, oqaluttuarpoq. Ukiorlu taanna, tassa 1981-mi Finn Lennert taamanikkut Grønlandsflymi ilinniartunngorpoq, Bell-212-illu ilinniarfigai, 1985-milu ilinniakkaminik naammassinermini allagartartaarpoq.

- Taamani qulimiguulik ilaatigut GLACE-mit (Greenlandair Charter) attartortitsinermi atorneqartarpoq, pingaartumillu Tele Greenland,1980-ikkut qiteqqunneranniit 1990-kut qiteqqunnerannut nunatta kitaata sineriaani qaqqat qaavini Ikerasassuarmiit (Prins Christians Sund) Kullorsuaq tikillugu oqarasuaateqarnermut atortulersuutinik ikkussuisoq timmisartuussissuttarparput.

B212 naggammik innuulluaqqusinera pillugu atuaruk. Toortagaq aappaluttoq tooruk. 

- Aamma Amerikamiut uuliasiornermik ingerlatsiviat Arco, Jameson Landimi uuliaqarneranik misissuisoq 1986-miit 1991-mut timmisartuussissuttarparput. Ukiukkullu Qeqertarsuup tunuani, Uummannami aammalu Upernavimmi nunaqarfinnut timmisartuussinerit pisarput, aammalu minnerunngitsumik Tele Greenland timmisartuunneqartarpoq.

- Aamma Nerlerit Inaata (Constable Pyntip) ammarneqarneranut ilaavunga. Aallaqqaammullu ineqarfiusinnaasut amigarneri pissutigalugit tuperni ineqarpugut. Bell-212-it pingasut sisamalluunniit atorlugit assartugassat timmisartup ataani kivillugit ullut tamaasa timmisartuussinerit ingerlattarpavut. Ullaakkut arfineq marluniit aallartikkaangatta unnukkut qulinut taamaatittarluta. Piumasaqaataavorlu qulimiguullit ullaakkut nal. arfineq marlunut piareeqqanissaat. Ukiumullu nal.ak. 3600-t 4100-llu missaanni timmisartuussisarpugut. Isumaqatigiissutit malillugit qulimiguulik ataaseq qaammammut ulluni pingasuni uninngasartussaavoq. Ukiut taakku tallimat ingerlanerini qulimiguulik ataasiinnaq tassunga eqqortitsivoq. Tassanilu Bell-212-it tatiginassusertik takutippaat, Finn Lennert oqarpoq.

Arcomut isumaqatigiissut naammat, Glace Afrikami Zimbabwemi ukiuni marlunni attartornissamut isumaqatigiissusiorpoq, tamatumalu aamma ukiuni marlunni Yemenimi isumaqatigiissusiorluni, taamanili inuiaat tassani imminnut sorsuutilermata, isumaqatigiissut piffissaq sioqqullugu atorunnaarpoq. 

- Taamani aamma Telep stationit qaqqat qaavini pilersiortormagit timmisartoq atorluarneqaqaaq. Bell 212-ilu qajannaatsuugami sulerulussinnaallunilu sila apeqqutaatinnagu ajornartorsiutiginngivillugulu qaqqat qaavinut stationit illutassaanut atortussat assartortarpavut, Finn Lennert oqaluttuarpoq.

1991-milu pisoq Innaarsunni 36-nik issittumi unnuisimanertik eqqaavaa

- Batteri illup iluanut kiattumut eqquppara. Aqaguanilu ullaakkut uulia aasserniarlugu qulimiguullip kaavittui nammineq nukigut atorlugit kaaviteqqaarparput, gearkassip uuliaa aasserlugu. Arfinileriarluta arfineq marloriarlutaluunniit taamaasioreeratta batteri ikkukkatsigu, motoria aallarpoq. Motori sila qanorluunniit ikkaluaraangat aallartinneqarsinnaasarpoq, oqareernittullu aallarsinnaannginnera misigisimanngisaannarpara, Finn Lennert oqaluttuarpoq.

Timmisartortartoq B212 pillugu qanoq oqarpa? Toortagaq aappaluttoq tooruk.

- Aamma Ilulissat mittarfeqanngikkallarmata Greenex-ip Maarmorilimmi aatsitassarsiorfanut timmisartuussinikkut sullissisarpugut, sap.ak. marloriarluta Maarmorilimmiit Kangerlussualiartarluta. Taamatullu Uummannap nunaqarfiinut aammalu Qeqertarsuup tunuani illoqarfinnut assigiinngitsunut inuttat nunatsinneersut taarseraangata timmisartuussisarluta.

- Avannaani Qimussersuaqarnerani aamma Upernavik kujallermiit Nuugaatsiamut qimminik qimuttunik assartuinermut atorneqarnikuuvugut. Ataasiarluta qimmit 27-it qamutillu marlussuit qimussiussisullu assartorpavut. Aappassaanillu taamaasioratta qimmit 31-t qamutit qimussiussisullu assartorpavut. Misigisat immikkuullarissut, suliassarli Bell-212-p naammassivaa.

- Bell-212 aamma nunaqarfinnut timmisartuussinernut kiisalu napparsimasunik angallassinermut aammalu Tusassimik timmisartuussinernut atorneqartarpoq, tamannalu pingaartumik ukiuni kingullerni atugaavoq.

Finn Lennert isumaqarpoq Air Greenland Bell-212-nik aqqanilinnik peqarnikuusoq, pingasullu ajutoorsimasut. Finn Lennertip Bell-212-i taartaanut H155-mut assersuummagu malunnarpoq sorleq uummateqarfigigaa. Qulimiguullillu taakku sanilliukkamigit ima oqaasertaliivoq:

- Bell-212 tassaavoq sulerulussinnaasoq, H155-ilu arnaalluni kimmikkaalik.

Air Greenlandip pisortaanera Jacob Nitter Sørensen B212 pillugu qanpoq oqarpa? Toortagaq aappaluttoq tooruk.