Air Greenland Visit Greenlandilu ukiuni pingasuni atuuttussamik Kalaallit Nunaanni takornariaqarnikkut siuarsaanissamik 2025-2027-mut atuuttussamik ataatsimut anguniagassat pillugit isumaqatigiissuteqaqqammerput.

Isumaqatigiissummi ukioq kaajallallugu takornariaqarneq siuarsarniarneqarpoq, Kalaallit Nunaata takornariarfissatut soqutigineqaleriartornera angalaffissanit amerlanerusunit iluaqutigineqarnissaa anguniarlugu.

Tallimassaanik suleqatigiinnertik sivitsorpaat, takornariat amerlanerulernissaannik takornariaqarnerullu nukittorsarnissaanik siunertaqartoq. Ataatsimoorluni nittarsaassinermi sumiiffinnilu takornarialerisut nunarsuarmilu suleqatigisat akornanni attaveqarnerit nukittorsarneranni suleqatigiinneq niuernikkut periarfissanik nutaanik takornariaqarnermullu tunngavissamik nukittunerusumik pilersitsissaaq.

Suliffeqarfissuarmi Air Greenlandimi pisortaanerup Jacob Nitter Sørensenip Visit Greenlandimik suleqatigiinnerup ingerlaqqinnissaa isumaqatigiissummilu takornariaqarnikkut angalasunullu periarfissat nutaat qilanaarai.

- Mittarfinni arlalinni nutaani siullersaalluni Nuup mittarfissuata ammarneratigut takornariat amerlinissaat naatsorsuutigisinnaavarput. Taamaattumik piujuartitsineq aallaavigalugu ataatsimoorluta takornariaqarnermik siuarsaanissarput pingaartuuvoq.

Taamaaliorpugut ilaatigut takornariat nunatsinni siammarnerisigut. Mittarfiimmi nutaat takornariaqarnerup siuarsarnissaani pitsaasunik tunngaveqarnissamut akisussaaffimmik pilersitsipput.

Takornariat ornigassaasa amerlinerisigut aamma nunap iluani angallannermi ilaasut amerlanerulissapput tamannalu inuiaqatigiinnut tamarmiusunut iluaqutaassaaq, Jacob Nitter Sørensen oqarpoq.

Suleqatigiinnissamik isumaqatigiissut ussassaarinermi ilisimasanillu siammarterinermi nukittorsaanissamik tunngavissiivoq, taamaalilluni Kalaallit Nunaata angalaffissatut pilerinartutut inissisimanera nukittorsarneqarluni.

Visit Greenland kiisalu Air Greenland niuerfimmik misissuinernik ataavartunik, isumasioqatigiittarnerniillu misilittakkanik nunallu tamalaat akornanni aaqqissuussinernit ilisimalikkanik avitseqatigiittassapput takornariaqarnerup siuarsarnissaa siunertaralugu.

Suleqatigiinnermi qitiusut ilagaattaaq nunani allani tusagassiuutinik niuerfinnillu salliutinneqartunik angalatitsivinnillu pilerisaarinissaq. Familiarization trips-inik taaneqartartut atorlugit angalatitsinermik suliaqartut immikkut toqqakkat Kalaallit Nunaannut qaaqqullugit ornigassaq nammineerlutik misigalugulu nammineq tusagassioriaasertik atorlugu nittarsaatissavaat.

- Kalaallit Nunaanni periarfissarpassuarnik misigisassanillu ilisimasaqarnerulersitsinikkut sumiiffinni takornarialerinermik suliaqartunut toqqaannartunik aqqutissanik nutaanik pilersitsissaagut. Angalatitsivinni sulisut tusagassiuutillu ornigassanik nammineerlutik misigitinnerisigut Kalaallit Nunaat tuniniarsinnaanerulissavaat ussassaarutigalugulu, taamaaliornikkut angalarusuttut amerlisinnaallutik.

Anguniarparput ingammik piffissap takornariarfiusartup sivitsornissaa angalaffiunerpaap avataani takornarianik amerlanerusunik pilerisaarinikkut, taamaalillutik takornarialerisut ukioq kaajallallugu niuernermik patajaannerusumik ingerlatsilersinnaallutik.

Suliassami matumani tunaartaqarluartunik suleqatigiinnikkut inuussutissarsiummut annertunerpaamik pissarsiassaqarnissaq qulakkiissavarput ataatsimoorlutalu siunissamut ungasinnerusumut takornariaqarnerup piorsarnissaa sulissutigalutigu, Visit Greenlandimi pisortaaneq Anne Nivíka Grødem oqarpoq.