4191

2024 maajip 17, tallimanngorneq

Air Greenlandip Iqalunnut timmisartuussisalissaaq

26. juni 2024 Air Greenland Nuummiit Nunavimmi illoqarfiit pingaarnersaannut, Iqaluit tungaannut aasaanerani 23. oktober tikillugu timmisartuussisalissaaq.

 

Pingasunngornerit tamaasa aqqutigineqarsinnaalissaaq, ullorlu taanna Canadami illoqarfiit pingaarnersaannut, Ottawamut, illoqarfissuarmut Montrealimut aammalu Nunavimmi Kuujjuarmut ingerlariaqqinnissamut periarfissaqassaaq. Tamanna Air Greenlandip aammalu timmisartuutileqatigiiffiup Canadian Northip sapaatip akunnikkaarlutik sumiiffinnut aalajangersimasunut timmisartuussisarnissamik isumaqatigiinneranni pisinnaalerpoq.  

 

Aqqut Nunavut aamma Kalaallit Nunaata 2022-mi suleqatigiinnermut isumaqatigiissutigisaata sivitsornerivaa. Tassani isumaqatigiit illugiittut kulturip, ilinniartitaanerup, aalisarnerup nukiillu piujuartitsisup suleqatigiissutigineri pitsaanerulersinniarlugit minnerunngitsumillu angalanerup eqaannerulernissaanut aqqutissiuinissaq kissaatigaat. Kingullerlu pineqartoq piviusunngulerpoq.  

Malik 1 (1)

- Nalunngilarput Nunavut Kalaallit Nunaatalu suli qaninnerusumik suleqatigiinnissaat annertuumik kissaatigineqartoq, attaveqaqatigiinnerlu qulakkiissagutsigu kitaatungitsinnut aqqutissaqalernissaa pissusissamisoorpoq. Isumaqarpugut inuussutissarsiornikkut, politikkikkut kulturikkullu assigiissuterpassooreersunut iluaqutaajumaartoq, Air Greenlandimi siulersuisuni siulittaasoq Malik Hegelund Olsen, oqarpoq. 

Johnnya

- Canadian North-imi Air Greenlandimilu 2020-mi januaarimili nunarsuarmi immikkoortutta marluusut akornanni attaveqalernissaq sulissutigaarput, tassani siunnerfinnut nalunaarut atsioratsigu. Suliaq COVID-19-ip nunarsuarmi tuniluunnera peqqutigalugu kinguaattooraluartoq sulinerput ingerlatiinnarparput, Johnny Adams, Canadian North-ip siulersisuini siulittaasoq oqarpoq nangillunilu.  

- Angallaviup taassuma atuutilernera, issittumilu immikkoortunut ataqatigiissitsilernera nuannaarutigisorujussuuarput Adams naggasiivoq.   

Aqqut Air Greenlandimit sapaatit akunnikkaalugit Dash-8 atorlugu pingasunngornerit tamaasa nal. 14:55 ingerlanneqartassaaq. Iqalunnukarneq nalunaaquttap akunnerini marluk missaanni sivisussuseqartassaaq, nalunaaquttallu akunneranik marlunnik nalunaaqutaq nikingammmat nal. 14:00 miss. tikittassalluni. Aallaqqaammut junimit oktobarip tungaanut timmisartuussineq pisassaaq, atorluarneqassappallu sivitsorneqarsinnaassalluni.  

Jacob Ny 1 !

-Kalaallit Nunaannut kivitseqataanissaq angorusupparput, Iqalunnullu aqqutip ammarnerani nunatta naggueqatitsinnik suleqateqarnerulernissaannut iluaqutaangaassaaq. Issittumi nunat tikeraarusunneqarnerat kingullermik illoqarfinni pingaarnerni marluusut akornanni 2014-imi aqquteqarneranut naleqqiullugit annertunerulernikuuvoq. Isumaqarpugut aqqutip tassuma ammaqqinnissaanut piffissaq piumaneqassusaalu naleqquttoq, Jacob Nitter Sørensen oqarpoq.  

Canadian North-ilu timmisartuusseqatigiinnissamut isumaqatigiissut 

Iqalunnut aqquteqalernermi Canadami illoqarfiit pingaarnersaannut, Ottawamut, Iqalunnit 2100 kilometerinik kujasinnerusumiittumut, illoqarfissuarmut Montrealimut aammalu Nunavimmi Kuujjuarmut ingerlaqqissinnaanissaq aamma periarfissanngussaaq. Tamaammat siunissami tikiffissat taakku marluk suliffeqarfiit nittartagaanni toqqaannaq inniminneqarsinnaanngussasut. 

 

- Canadian Northip suleqatigilernera iluatsimmat nuannaarutigingaarpara, siunissami angalasussat namminneerlutik ingerlariaqqiffissat allat pingasuusut tungaanut billetinik inniminniisinnaalissammata. Taassumap ineriartornerata malinnaaviginissaa pissanganarpoq, maanimiullu kimmut angalatinnissaat aammalu Nunavummit Canadamillu tikinneqartalernissarput qilanaaraarput, Air Greenlandimi pisortaaneq, Jacob Nitter Sørensen, oqarpoq.  

 

Canadian Northip pisortaanerup, Shelly De Cariap suleqatigiilerneq nuannaarutigalugu aamma oqaaseqarpoq.  

Shelly De Caria 2 1

- Takornariarnerup, nunat kulturillu akornanni suleqatigiinnerup aningaasarsiornermilu ineriartornerup ingerlalluarluarnerulernissaanut suleqatigiinnikkut peqataanissarput qilanaaraarput," Shelly De Caria, Canadian Northimi pisortaaneq oqarpoq, nangillunilu.  

- Timmisartuutsitsinerup saqqummiunnerani Canadian Northip inuiaqatigiit akornanni attaveqatigiinnissamut suleqataarusussuseqarnera kulturikkullu attaveqarnerput ersersinneqarpoq, Shelly De Garcia oqarpoq. 

Canadian Northip angallavigisartagaanni aqqutit tikiffiusinnaasut 27-upput; illoqarfinni pingaarnersaqarfimmiittumi Ontariomi, Nunavummi, Nunavimmi, North West Territoriesimi, Quebecimi Albertamilu maannamiit timmisartuusseqatigiinnermi billetimik Ottawamut, Montrealimut aamma Kuujjuarmut uterluguluunniit aqqutaanut ingerlariaqqiffiusinnaasunut angalasoqarsinnaalerpoq.  

 

Erseqqinnerusumik paasissutissat pissarsiarineqarsinnaapput Tuniniaanermut Pisortaq, Katja Vahl attaviginerani, tlf. 58 92 59, e-mail: kvh@airgreenland.gl 

Paasissutissat

Iqaluit aamma Nuuk akornanni angalanissaq tuniniarneqarpoq pisiarineqarsinnaallutillu Air Greenlandip nittartagaatigut angalatitsiviilluunniit aqqutigalugit. Aqqutissaq 2024-mi 26. juni-miit 23. oktober piffissami tassani pingasunngornerit tamaasa angallavigineqartassaaq.  
Nuummiit Iqalunnut aqqut ataaseq 1.995 kroniniit imaluunniit 392 canadiske dollars, CAD-iniit akeqassaaq. 

Canadamut tikinnissanut qinnuteqarnissat eqqumaffigissavat, tamannalu pillugu uani atuarsinnaavutit.
Iqaluit pillugu uani paasisaqarnerugit