Air Greenlandip Avolonillu silaannakkut angallannermut mingutsitsinngitsumik aqqutissiuisussamik suleqatigiilernertik ullumi nalunaarutigaat.

Air Greenlandi timmisartumik CO2-mik mingutitsinngitsumik attartornissamut pisinissamulluunniit pilersaaruteqarnermik Europami timmisartuutileqatigiit siullernut ilaalluni nalunaaruteqarpoq.

Silap pissusiata allanngoriartornerata akiorniarnerani CO2-mik aniatitsinerup annikillisarniarneranut silaannakkut angallassineq unammilligassaqaqaaq. Isumaqatigiissusiornermigullu Air Greenlandi timmisartut VX4 eVTOL-it ukiut pingasut iluini atulernissamut piareernissaannut siuttunngorpoq.

- Siunissaq ungasissoq eqqarsaatigalugu Air Greenlandi ullumi nalunaaruteqarnikkut piujuartitsinermik tunngaveqarluni suliniuteqarnerup ingerlaqqinnissaanik aallartitsivoq. Ullut tamaasa silap pissusaata allanngoriartornera malugisarparput, nunatsinnilu angallannerup CO2-mik mingutitsiviunngitsup angunissaa sulissutigiuarlugu. Pilersaaruteqarnermik nalunaarut tunngavigalugu suliffeqarfittut silaannakkut angallannerup allannguiviginissaanut siuttuussaagut, pisortaaneq Jacob Nitter Sørensen oqarpoq.

Timmisartoq aquttup saniatigut inunnut sisamanut inissaqarpoq, nal.ak. 322 kilometerinik sukkassuseqarluni 160 kilometerinik isorartussusilik ingerlasinnaallugu. Timmisartoq nipiliunngingajattoq CO2-millu mingutsitsinngitsoq, qulimiguulittut qummut ammullu qangattarlunilu mittarpoq.

Issittumi CO2-mik mingutsitsiviunngitsunik angallannissanut suleqatigiissitaq

Air Greenlandilu pilersaaruteqarnermik nalunaarummik Avalonimik atsioqateqarnikkut, suleqatigiissitamut issittumi niuernermik tunngaveqarluni angallannerup CO2-mik mingutsitsiviunngitsumik ingerlanneqarnissaanut periarfissanik nalilersuisussamut peqataanissaminut akuersivoq.

- Suleqatigiissitami peqataanitsigut timmisartup innaallagissamik ingerlatillip sumi atugassatut piukkunarneranik qulaajaaqataallutalu, niuernermik tunngaveqarluni timmisartuussisarnernut nunarsuarmi piumasaqaatit tunngavigalugit akuersissutit nunatsinninni pisariaqartitat, qulakkeernissaannut peqataassaagut, Jacob Nitter Sørensen nassuiaavoq.

Air Greenlandip timmisartunik VX4-nik qassinik pisinissaa pisariaqartitsitsineq naapertorlugu suleqatigiissitamit nalilersorneqassaaq. Timmisartullu siunissami Ilulissat Ilimanallu akornanni piffissami qanittumi atorneqarsinnaalernissaa Air Greenlandimit piukkunnartutut nalilerneqareerpoq.

- Timmisartoq VX4 Air Greenlandimut atorfissaqarluarpoq. Ilulissaniillu Ilimanamut illuaraateqarfitsinnut timmisartuussinissamut angalasut siulliit tikilluaqqunissaat takorluulereerparput. Aqqummilu tassani silap pissusaata allanngoriartornerata nunatsinnut aammalu nunarsuatsinnut sunniutai qanimut timitarsineqarsinnaassapput, Jacob Nitter Sørensen oqarpoq.

Avolon Vertical Aerospace-lu

Avolon-ip timmisartuliorfik Vertical Aerospace VX4 eVTOL-nik sanaartortuusoq timmisartunik taakkunannga 500-nik inniminniiffigereerpaa. Timmisartuliorfik taanna ukiuni tallimani kingullerni eVTOL-imik sanaartornermik aallussinermini sulisut misilittagaqarluartut pigai, innaallagiarlu ingerlatigalugu silaannakkut angallassinerup ineriartortinnerani siuttutut inissisimavoq.

Avolonip pisortaanerata Dómhnal Slattery-p pilersaaruteqarnermik isumaqatigiissutip nalunaarutiginera nuannaarutigaa.

- Timmisartup taassuma sananissaanut isumaqatigiissutip siulliup atsioreernerata kingorna, nunarsuaq tamakkerlugu timmisartuutileqatigiit timmisartunik CO2-mik mingutitsinngitsunik atuinissamut alloriarnertut siullertut, timmisartunik VX4-nik atuilernissaq toqqaraat takuarput. Timmisartullu CO2-mik mingutitsinngitsut nunami silap pissusaata allanngoriartorneranik takussutissaqarnerpaaffiusumi atugaasariaqarnerat ullumi Air Greenlandimut atsioqatigiinnermik nalunaarutip ersersippaa. Timmisartullu CO2-mik mingutsitsinngitsup VX4-p pisariaqarnerpaami atorneqalernissaanut Air Greenlandimik suleqateqalernissatsinnut qilanaarpugut, Dómhnal Slattery oqarpoq.

Air Greenland Europami timmisartuutileqatigiinnit siullersaat ilaanut timmisartumik taassuminnga inniminniivoq, aammalu Brasilien 250-nik, Japan Airlines 100-t angullugit Air Asia-lu ikinnerpaamik 100-nik inniminneereersimapput.

22. marts 2022, 08:00