Icelandairip aamma Air Greenlandip silaannakkut angallasseqatigiiffiit marluusut akornanni periusissiornikkut suleqatigiinnerup annertusineqarnissaa pillugu siunnerfeqarnermut nalunaarut atsiorpaat.

Ingerlatseqatigiiffinniit suleqatigiinnissamut periarfissat, ingerlatseqatigiiffiit marluusut attaveqaataannik atalersitsisussat, tassalu Air Greenlandip Kalaallit Nunaanni attaveqaatai aamma Icelandairip Keflavik International Airport-imiit attaveqaatai annertuut takuneqarsinnaapput. Suleqatigiinneq ingerlatseqatigiiffiit marluusut sullitaannut iluaqutaassaaq, aammalu Kalaallit Nunaanniit Islandimiillu, taakku aqqutigalugit nunanilu namminerni niuerfigisaminnut attaveqarneq annertusitissallugu.

Icelandairip timmisartuussinermini Kalaallit Nunaannut ornigassanut, Reykjavikip mittarfianiit Keflavikimi nunanut tamalaanut mittarfimmut nuussinermigut nunami namminermi timmisartuussinerit nunanut tamalaanut attaveqaatinut atasunngortissimavai. Taamatut allannguineq Air Greenlandip Kalaallit Nunaanni Islandimullu attaveqaataanut annertunerusunut taakkunanngaanniillu, aamma Icelandairip Europami Amerikallu avannaani angallaviinut annertuunut attaveqaatit iluarisimaarnarnerulersitsisimavoq.

Silaannakkut angallasseqatigiiffinni pisortaanerniit suleqatigiinnerup annertusineqarnissaa qilanaarineqarpoq.

- Air Greenlandip suleqatigineqarnerata annertusineqarsinnaanera nuannaarutigisorujussuuarput. Timmisartuutileqatigiiffiit naligisatta, atuisunut pitsaalluinnartumik misigisaqartitsinissamut piujuartitsiviusumillu ingerlatsinissamut kajumiffigisatta tunniusimaffigisattalu assinginik anguniagaqartut suleqatiginissaat aallutaraarput. Air Greenlandip Kalaallit Nunaanni angallaviinut annertuunut aamma Icelandairip Keflavik International Airport-imut attaveqarnerit pitsaanerulernerisigut, ajornartorsiutaanngitsumik Kalaallit Nunaannut aamma Europamut Amerikallu Avannaanut attaveqaatitsinnut annertuunut angalanissanik neqeroorsinnaalissaagut. Air Greenlandip najukkanut ilisimasai aamma Kalaallit Nunaanni attaveqaatinut aningaasaliineri iluaqutigisinnaalissavagut, aammalu Air Greenlandip Europami tuniniaanermi siammarterinermilu attaveqaatigut annertuut iluaqutigisinnaalissavai.

Air Greenlandip pisortaanera Jacob Nitter Sørensen imatut oqaaseqarpoq:

- Suleqatigiinnerup annertusineqarnera periusissiornissaq eqqarsaatigalugu Kalaallit Nunaannut pitsaasutut isigaarput, Icelandairip nunanut tamalaanut angallavippassuinut attaveqalerneq Kalaallit Nunaata tikikkuminarnerulerneranik kinguneqartussaammat, aammalu inuussutissarsiortut sunngiffimminnilu angalasut Kalaallit Nunaannut ajornannginnerusumik tikissinnaalernissaannut periarfissat pitsaanerulertussaammata.
Taamaalilluta aamma tamaani najugaqartut nunarsuatsinni ajornannginnerusumik angalatissinnaalissavagut, aammalu nunarsuarmiit Kalaallit Nunaannut tikissinnaaneq ajornannginnerulersissallugu.

Taakku saniatigut takornariat Islandimut tikittut Kalaallit Nunaannut tikeraarnissamut pitsaanerusunik periarfissaqalissapput.
Naggataagut minnerunngitsumillu suleqatigiinnerup annertunerulernerata kingunerisaanik sullitagut nittartagarput aqqutigalugu angalanissanik pisisinnaalissapput, tassani aamma Icelandairip angallavii annertuut allassimalertussaammata. Taamatuttaaq Icelandairip sullitai periarfissaqassapput, taamaalillunilu Kalaallit Nunaannut aamma Kalaallit Nunaanniit angalanissamut pilersaarutip ataqatigiinnissaa ajornannginnerulissalluni.