Air Greenlandi timmisartuutimi nutarsarnissaannut aningaasaliinissamut, attartornikkut aningaasaliissutissamik isumaqatigiissusiornerminut, nersornaammik ippassaq ataasinngornermi maajip 9-ani, tunineqarpoq. Nersornaat inuit silaannakkut angallassinermik aammalu attartortitsinermik aningaasaliinernut immikkut sammisaqartartut nersornaasiuttagaraat.

Mogens Jensen, Air Greenlandimi aningaasaqarnermut pisortaq, ingerlatseqatigiiffik sinnerlugu nersornaammik “European Editor’s Deal of the year” -mik tigusisuuvoq. Tamanna Dublinimi Irlandimi ukiumoortumik “Aviation 100 deals of the Year”-mik nersornaasiinermi, ippassaq nunatsini nalunaaqutaq ualikkut arfernup missaani pivoq. Nersornaallu tassaavoq silaannakkut aammalu attartortitsinernut aningaasaliinermik ingerlatsisut akornanni niuerluarnerpaasimasunut tunniunneqartartoq.

- Air Greenlandip nunani tamalaani timmisartuutileqatigiit aningaasaliinermillu ingerlatsisut uuntritilikkaat nuimasut akornanni nersornaaserneqarneranut tunngaviuvoq, amerikami “private placement marked”-mik (USPP-mik niuerfik, soraarnerussutisiaqalernissamut aningaasaateqarfiunerusunit ilaasortaqartoq, aaqqiss.), taarsigassarsinissamik pitsaalluinnartumik isumaqateqarnera, aningaasaqarnermut pisortaq Mogens Jensen oqarpoq.

Taarsigassarsinissamut isumaqatigiissut Air Greenlandimip piviusunngortitaa 1.140 mio.kr.-nik aningaasartaqarpoq, timmisartuutinullu aningaasaliinissamut taarsigassarsiniarnissamut suliaq, Namminersorlutik Oqartussat 2019-mi Air Greenlandimik 100%-mik piginnittuulernerata kinguninngua, aallartippoq. Piffissami tassanerpiaq Air Greenland SAR-imut isumaqatigiissutinut aammalu Namminersorlutik Oqartussanut kiffartuussinissamut isumaqatigiissutinut neqerooruteqartussaavoq, timmisartorlu Atlantikoq qulaallugu timmisartuussinernut atorneqartartoq ukiunik 25-t miss. pisoqaassuilik aamma taarsigassanngorsimalluni.

Piffissami sivisujaami attartorfigineqarsinnaasunik misissuereernermi aammalu nunani avannarlerni attartortitsisartut saqqummiisereernerisigut, amerikami USPP-mik niuerfik, inuinnaat pappiaqqanik nalilinnik, obligationinik, niuerfiat, ingerlatsivinnut attartortitsisartoq, Air Greenlandimi pisortat paasiniaaffiginiarlugu aalajangerput.

- Aningaasaliinissamut ilaatigut pingaartissimavarput aningaasat nalingisa annikitsuinnarmik nikerartuunissaat, tassa attartornermi danskit koruunii piumanerullugit, attartukkat sivisuumik taarsersornissaat, aammalu taarsersuinerup pigisat nalillit pingaarnerit aallaavigalugit ingerlannissaa. Qularnaveequsiinerit siunissamilu iliuusaasartussat aamma immikkut pingaartinneqarput, tassa tamakkuupput suliatsinni pingaartitavut, Mogens Jensen oqarpoq.

- Aningaasaliisussarsiornermi nalilersuinitsinni USPP toqqagassatut piukkunnarnerpaatut nalilerparput. Danmarkimi SEB bank aamma New Yorkimi CITI suleqatigalugit, periarfissanik misissuereernermi amerikami aningaasaliisartunut soqutiginnittunut Air Greenland sukumiisumik saqqummiussinnaanngorparput. Oqaluttuarisaanermi naammassisarsimasat saniatigiut, suliniutit aningaasaliinerilu, ukiunut tallimanut missingersuusiatsinnut ilanngussat, qanganisarsiortumik periutsinik tunngaveqartut, pingaartillugit saqqummiuppavut, Mogens Jensen oqarpoq, nangillunilu

- Pisortat saqqumeereermata aningaasaliisartut apeqquteqarsinnaapput. Taamatut saqqumiinnerit ataatsimeeqatigiinnerni ”roadshow”-nik taaguutilinni pisarput, Covid-19-ili pissutigalugu tamanna attaveqaatit atorlugit pivoq.

Piffissap sivisulaartup ingerlareernerani aningaasaliisartut atukkanik taarsersuinissamut saqqummiussat, tunngaviusumik pigisat nutaat nalikilliartornerinut takussutissaasut, ataani takussutissat tunngavigalugit neqeroorsinnaalerput

• Ukiunut 5-nut atuuttut akilersugassaanngitsut
• Ukiunut 10-nut atuuttut ingerlaavartumik akilersugassat
• Ukiunut 15-nut atuuttut ingerlaavartumik akilersugassat

Amerikami aningaasaliisartut nunatsinnik ilisimasaqarluarnerat tupaallaatigaarput, aamma nunatsinni attaveqaatilersueriaatsip unammillernartui eqqarsaatigalugit, taamatullu nunatta siunissami piujuartitsinissamik tunngaveqarluni ingerlanissaanik takorluugaqarneq.

- Aningaasanik attartornissap iluatsinnerata nalaani, Covid-19-p nassataanik silaannakkut angallannermi annertuumik nalorninartorsiorneq piuvoq. Saqqummiussatta tigulluarneqarnera kingornalu aningaasaliisartunik oqaloqateqarnerup, nunatta timmisartuutileqatigiiffianut aningaasaliinerup Air Greenlandimut aammalu nunatsinnut tatiginninneq takutippaa, oqarpoq.

Europami aaqqissuisut ”Private placement deal”-mut pitsaanerpaamut nersornaasiinerannik tigusineq qanoq misigiffiunersoq Mogens Jensen aperineqarami ima akivoq:

- Air Greenlandimut aningaasaliineq pingaaruteqarlunilu siunissamut ungasissumut qulakkeerutaavoq, dollarsinilli milliardikkaanik niuerfiusartumi akuerineqarnermik takutitsineq pingaaruteqarpoq. Ukiut kingulliit amerlasuut patajaatsumik ingerlatsisimaneq ineriartorsimanerlu aningaasaliisartunut annertuumik pingaaruteqarpoq, maannalu uagutsinnut suliffeqarfittut inuiaqatigiinnullu iluaqutissamik timmisartuutitsinnut pigisatsinnullu aningaasaliisinnaanermik kinguneqarpoq, siunissami suliffeqarfittut allanik aningaasaliinissamut pituttugaanermik nassataqarnani. Aningaasaliinermut attartorneq Air Greenlandip unammillersinnaassusaanik aalajangiisuulluinnartumik pitsannguivoq.

Suliap ingerlannerani siuliani taaneqartut aningaaseriviit saniatigut, eqqartuussisuserisut Gorrisen Federspiel inatsiseqarnerup tungaatigut aammalu Air Greenlandip soqutigisaanik isumaginnippoq, USPP-mut isumaqatigiissusiornermut eqqartuussisuserisoq amerikameersoq isumaginnilluni, taamatuttaarlu USPP-mut aningaasaliisartut sinnerlugit eqqartuussisuserisoq amerikameersoq isumaginnippoq, suullu tamarmik iluatsilluartumik ingerlapput.

Attartukkanit 1.140 MDKK-nit siorna apriilimi 655 MDKK tunniunneqarput, sinnerilu qaammat una tunniunneqassapput.

Nunani tamalaani immikkut atuagassiaq Airline Economics, ”European Editor’s Deal of the Year” -mik nersornaasiisarpoq. Nersornaasiinermillu aamma aaqqissuisuulluni.