Air Greenland aamma Albatros Arctic Circle isumaqatigiissuteqarput, ukioq 2025-mi qaammatini martsimiit oktoberip tungaanut, sapaatip akunneranut marloriarluni Kangerlussuup Københavnillu akornanni timmisartuussisoqartassasoq.

Naatsorsuutigineqarpoq silaannakkut aqqutip, angallaviit arlallit aqqusaarlugit takornariaqarneq inerisassagaa, kiisalu ullaakkut unnukkullu Nuummiit Kangerlussuaq aqqusaarlugu Københavniliarsinnaanermik kiisalu Københavnimiit ualikkut angalanissamik periarfissat nassatarissagai.

Novembarip 28-anni Nuummi mittarfittaarsuaq ammarpat, Kangerlussuarmiit Københavnimut imarpik qulaallugu silaannakkut aqqut matussaaq – piffissalli ilaannaani. Martsip 17-anni 2025, aqqut ammaqqissaaq, oktobarip 16-iata tungaanut, sapaatip akunneranut marloriarluni timmisartuussisoqartassalluni.

Periarfissaq piviusunngussaaq juulip 10-anni Air Greenland A/S-ip kiisalu Albatros Arctic Circle ApS-ip atsioqatigiillutik isumaqatigiissuteqarnerisigut. Kangerlussuup Københavnillu akornanni sapaatip akunneranut marloriarluni timmisartuussinermi, Jettimme-ip timmisartua Jettime-ip Boeing 737-800 atorneqartassaaq. Ullaakkut unnukkullu Nuummiit Kangerlussuaq aqqusaarlugu Københavniliarnermi, kiisalu Københavnimiit ualikkut nunatsinnukarnermi timmisartoq taanna atorneqartassaaq. Aqqut pillugu paasissutissat amerlanerit naqqani Paasissutissat-mi allaassimapput.

Kangerlussuaq takornarianit tikissallugu kajungerineqartaqaaq, ukiumut tassani takornariartut 10.000-t missaanniittarlutik. Takornariat taakku tassaakkajunnerupput, nunatta qeqqani avannaaniluunniit angalanerminni, takornariarnermik aallartinnerani naggaserneraniluunniit Kangerlussuarmi takornariartut.

Kangerlussuup takornarianik tikikkumaneqartarnera Air Greenlandip suleqataaffigissallugu pingaartippaa, kiisalu nunap iluani avataanullu angallannermi Nuup qitiulernissaata kinguneranik, Kangerlussuup suli tikinneqarsinnaanissaa peqataaffigerusullugu.

Kangerlussuup mittarfiata timmisartunit innuttaasunik angallassisunit miffigineqarsinnaanera qulakkeerneqarmat, Kangerlussuup Københavnillu akornanni silaannakkut aqqut toqqaannartoq aatsaat pimoorullugu eqqartorneqalerpoq.

- Tamanna qulakkeerneqarmat, periarfissat takkussuupput. Kangerlussuup Københavnillu akornanni toqqaannartumik aqquteqarnissaa tunngavissaqarluartoq nalilerparput, aamma timmisartoq ingerlaqqiffiusinnaasunut allanut atorsinnaagatsigu. Nuummiit Kangerlussuaq aqqusaarlugu Københavnimut ullaakkut unnukkullu angalasassaagut, Københavnimiillu Kangerlussuarmut ualikkut angalasassalluta. Taamaalillutik angalanissamut neqeroorutivut nukittorsarpavut, unammilleqatigiinnermilu nukittunerusumik inissisimalissalluta, Kasper Thomsen Rungfeldt oqarpoq.

Taassuma Albatros Arctic Circle, aqqutip pilersinnerani pilersitseqataammata nersualaarpai.

- Neqeroorut upperalugulu aalajangeeqataaffigisimasinnaanngikkaluarpassuk piviusunngorsimassanngikkaluarpoq. Aningaasaleeqataapput, silaannakkullu aqqutip piviusunngortinneqarnissaanut ingerlallualernissaanullu tamanna tunngaviliisuvoq.

Takornarianik sullissinermik suliffeqarfiup, Albatros Arctic Circlep, ukiuni kingullerni 20-ni Kangerlussuup takornariarfittut ineriartornissaa anguniartuarlugu aalluppaa, ullumikkullu nunaqarfimmi suliffeqarfiit annerit ilagaat, 100-t missaannik sulisulik. Taakku suliaannut ilaapput, sermersuarmut angallassinerit, pinngortitami avatangiisit kusanartut takornariartinneri kiisalu umiarsuarsuit takornariartaatit sullinneri, taakkunani sulisut ilaasullu taartigiittarneri, taakkua saniatigut unnuisarfiit Old Camp, Polar Lodge aamma Hotel Kangerlussuaq kiisalu neriniartarfiit Restaurant Roklubben Restaurant MuskOxilu pigisaraat.

Albatros Arctic Circlemi pisortaq, Jørgen Larsen, 2000-kkut aallartinneranili Kangerlussuarmi takornariaqarnermik ineriartortisinermik aallutaqarpoq. Taassuma Kangerlussuup Københavnillu akornanni aqquteqalernissaa nuannaarutigalugulu eqqissiallaatigaa.

Taanna aamma oqaluttuarpoq, Kangerlussuarmi takornariaqarneq ineriartorlualersimasoq, Albatros Arctic Circle 2007-imi nunaqarfimmut pimmat. Namminerli 2000-mi nunaqarfimmut nuukkamili takornarianik angallassinermik suliaqalersimavoq.

- Kangerlussuaq mittarfittut aqqusaartarfiinnartut atuuffeqarunnaarluni maanna takornariarfittut atuuffeqalernikuuvoq. Taama inissisimaniaraanni aningaasaliillunilu sulingaatsiartariaqarpoq. Taamaammat mittarfiup atuutiinnarsinnaanera, uatsinnut nunaqarfimmiuusunut pingaaruteqaqaaq. Kangerlussuarmiit Københavnimut silaannakkut aqqummik, aammali nunatta iluani, tassa Sisimiunut, Ilulissanut Nuummullu silaannakkut qqutinik pilersitseqataavugut, oqarpoq nangillunilu.

- Taamaalilluta Kangerlussuaq tikeraarfittut pingaarnertut ineriartorteqqissinnaalerparput, sermersuaq aamma nuna uumassusilik, timmisartuussinerit aalaakkaasut misigisassarsiorlunilu takornariarnertitsinerit ukkataralugit, Jørgen Larsen naggasiivoq.

Atsioqatigiit isumaqatigiissutip imaa annerusumik iserfiginianngilaat, Air Greenlandilli tikkuarpaa isumaqatigiissut arlalitsigut ajunngitsumik kinguneqassasoq, angalatitsivinnut, angallassisartunut, pisiniarfinnut, mittarfimmut – tassalu sulisoqarnermut, naggataatigullu kommunet nunattalu karsianut isaatitsiviussalluni.