Nuummiit avannamut Ilulissiassaatit – illoqarfimmut sermip iigartartup killinganiittumut. Tikikkuit mittarfimmi aaneqassaatit akunnittarfimmullu ilorrisimaarnartumut Hotel Arctic-imut ingerlanneqarlutit, tassani sulisunit tikilluaqquneqassaatit angalanerlu pillugu paasissutissinneqarlutit. Ualikkut angallassisoqarlutit, Ilulissat illoqarfittaani angalaarlutit, illoqarfiup oqaluttuassartaata tusarnissaanut qanorlu misiginissaanut periarfissaqarputit – unnukkut neriniartarfimmi Ulo-mi nerisassianik immikkut mamasaakkanik nerinissaq, immaqalu misigisap taassuma arsarnernik takuniaanermik ilallugu pikkunarnerulersinnissaa periarfissaavoq. 

Akianut ilaapput: Nuummiit Ilulissanut angalaneq, mittarfimmiit angallanneqarneq, Hotel Arctic-imi unnuineq ullakkorsiornertalik 

Saniatigut pisiarineqarsinnaasut: Ilulissat illoqarfianni angalaarneq, neriniartarfimmi Ulo-mi nerineq, arsarnernik takuniaaneq. 

Hotel Arctic-imi ullaakkorsioreernerup kingorna aaneqarlutit illiniliuummik, issittumi nunap timaanut angallanneqaruit, ullormut misigisassat nuannersut aallartissapput. Tassani aputilimmi nipaatsumi, illuaraqarfik Igloo Lodge inissisimavoq –eqqissinartoq, kissalaartoq iseruminartorlu, qaqqanik apummik qallersimasunik avatangiisilik. Illuikkiami qisummi alianaatsumi, inimi ataatsimoorfimmi, ukiup nunaanut isikkivilimmi ullup qeqqasiutissanik sassaallerfiusumi tikilluaqquneqassaatit. 
Ualikkut pisussaq tassaavoq angalanermi misigisassat alutornarnerpaat ilaat: Angissutsimikkut immikkoorutillit akornanni pisunneq/Walking amongst giants – angallassisoqarluni kangerluup tullianut sikusimasumut, iluliarsuit immap sikuanut qerrusimasut akornisigoorluni qamuteralanneq. Tassani misigisassat tassaapput sukkalisaarneq, nipaassuseq, pinngortitaq minguitsoq pinnissuserlu ataqqinarlunilu siooranartoq. 
Unnukkut illuaqqami nereqatigiinneq, tamatumalu kingorna oqaluttuunneqarneq. Sila apeqqutaalluni arsarnernik takuniaaqataasinnaavutit, arsarnerillu pinningaarlutik qilammi aalataartut misigalugit. Apummit illuikkiami unnuineq– misigisaq assissaqanngiinnarani puigugassaanngitsoq. 

Akianut ilaapput: Illiniliuummik siumut utimullu angallanneqarneq, ullup qeqqasiorneq, unnukkut nerineq, apummit illuikkiami unnuineq, oqaluttuarfigitinneq 

Saniatigut pisiarineqarsinnaasut: angisutsimikkut immikkoorutillit akornanni pisunneq/Walking amongst giants (qamuteralanneq) imal. qimusserneq. 

Illuaraqarfimmi Igloo Lodge-imi, illuaqqami qisummik sanaami alianaatsumi ullaaq eqqissinartoq, iterluni ullaakkorsioreernermi nunatsinni ukiuunerani misigisassat immikkut malunnaateqarnerpaat ilaat utaqqivoq, tassalu apussarissukkut qimusserneq. Qimmit qimuttoralugit qimussimi ingerlaarninni kiinnavit anorsalaarfigineqarnera malugissavat, qamutip apummi ingerlaarnerata qimmillu isigaasa tuttarnerisa nipaat tusaallugit. Angalaneq taanna nunatsinni kulturimut pinngortitamullu qanillisitsivoq – misigisaq misigissutsinik attuillunilu oqaluttuarisaanermut tunngasoq. 
Ulloq taanna kingusinnerusukkut Ilulissanut utissaatit, Hotel Arctic-imullu inissinneqaqqillutit. Ualikkut Kangiata sulluanut iigartartumik sermilimmut, puigugassarinngisannik angallammik angalanissaq periarfissaavoq– angallassisoqarluni Ilulissat Kangerluani, UNESCO-p nunarsuarmi eriagisassatut kingornussat nalunaarsorsimaffianniittumi ilulissat ataqqinarpaluttut akornanni angalaarneq. Tassani ukiumi qaamaneq tungujuaartoq, ilulissat qiperukkatut ilusillit akornanni angallammik angalaarninni, pinngortitaq qanillivissavat. 
Ullup sinnera sunissaq nammineq aalajangerneqarsinnaavoq. Misigisarpassuit kingorna akunnittarfimmi eqqissisimaarneq nillertumillu imeruersarneq ussernartorsiornarnerpaasinnaapput. 

Akianut ilaapput: Hotel Arctic-imi unnuineq ullaakkorsiornertalik 

Saniatigut pisiarineqarsinnaasut: Qimusserneq, Kangiata sulluani angallammik angalaaneq 

Hotel Arctic-imi ullaakkorsioreernermi mittarfiliaanneqarneq Nuummullu uterneq. Angalaneq naammassivoq, apummit illuikkiaq, arsarnerit, issittumilu misigisanit eqaamasat qaqugorsuarmut piujuassapput. 

Akianut ilaapput: Ilulissaniit Nuummut timmisartorneq, mittarfimmut angallanneqarneq 

Ullormut najoqqutassaq, sila najukkamilu pissutsit apeqqutaallutik naleqqussarneqarsinnaavoq. Sammisassat angalanermi ataatsimoortumi tunngaviusumi ilaanngitsut saniatigut pisiarisariaqarput.