Tamanna aamma pivoq qulimiguulimmik nutaamik B212-itsinnik taarsiutissanik toqqaasussanngoratta. B212-iutivut nunatsinni 1980-ikkunnili angallassisarsimapput. Taartissatut EC155 toqqarneqarput, taanna sukkaneruvoq orsussamillu annikinnerusumik atuisarluni.

Silaannakkut angallassissutit nutaanerusut avatangiisinullu mingutsitsinnginnerusut

Silaannakkut angallannermik suliaqarneq tassaavoq nunarsuarmi CO2-mik aniatitsiviunerpaasartoq. Taamaattumik uagutsinnut pingaaruteqarpoq piujuartitsinerusunik aaqqiissutissanik ujarlertuarnissaq. Silaannakkullu angallassissutaativut tassaammata aniatitsinerpaasartut, taakku taarsernissaannut pingaaruteqarpoq taartissaat sukkasuujullutillu aniatitsinnginnerussasut siuliminnit.

Tassunga ilutigalugu angallassissutivut ikilissavagut. Silaannakkut angallassissutitsinik 2010-mi taarsersuileqqaaratta Dash 7-imit Dash 8-mut taarsiivugut, taamanilu qulimiguullit timmisartullu suluusallit assigiinngitsut 11-t pigaavut, ullumikkut arfinilinnut apparnikuupput.

Taarsersuinerit kingulliit ilaat tassaapput S61-it SAR-imut atorneqartartut EC225-nik taarserneri. Kingusinnerusukkullu siornatigut eqqaariikkatsitut B212-it 2022-mi atorunnaassapput EC155-inillu taarserneqassallutik.

King Airiuterputtaaq nutaanerusumik modeleqataanik taarserparput 2022-llu naalernerani Airbusissarput nutaaliaq, nutaarsuaq atulissavarput.

Tuukkaq – Airbus 330-800neo

Airbusitaassarput nalunnginneqarluartumut Norsamut taartaassaaq, taannalu atorneqanngivilluni nutaarluinnaavoq. Taannalu teknologii nutaaliaasoq atorlugu sanaajuvoq, Kalaallit Nunaata Danmarkillu akornanni timmisartuussineq isumannaannerusumik aalajaannerusumillu ingerlanneqarsinnaanngortillugu.

Tuukkaq tassa timmisartup atissaa. Taanna ilorrisimaarneq allanngortinnagu inissaqarnerulersitsivoq. Timmisartorsuarmi 305-inik inissaqarpoq pitsaassutsinut marlunnut agguagaallutik, Premiumimik Standardimillu taaneqartartunik, sullitanullu sullissineq peqqissaartumik sananeqaatsimigut, ilorrisimaarnarnermigut kiisalu aliikkusersuinikkut pitsaassutsimigut qaffasinnerpaamiilluni.

Silaannakkut angallassissutinik taarsersuutigut assigalugit timmisartorsuaq orsussamik atuinikinneruvoq. Norsamiimmi CO2-mik aniatitsineq ilaasumut ataatsimut minnerpaamik 15%-imik timmisartorsuartaarnitsinni annikillissaaq.

SAF – Silaannakkut angallassinermi orsussaq piujuartitsisoq

Motorit tassaapput Norsamit Tuukkamut allaanerussutissat pingaarnerpaat. Tassami taakkuupput orsussaq SAF atorlugu ingerlasussaq. SAF tassaavoq orsussaq sanaassamik arrortinneqarsinnaasumik sanaaq, taassuma CO2-mik aniatitsineq 80%-imik timmisartup piunerani annikillisissavaa.

Silaannakkut angallassissutinik taarseruiinnarata aamma silaannakkut angallannermi teknologii nutaaliaasoq allannguingaatsiartussarlu peqataaffigissavarput.

Timmisartut sarfatortut Ilulissat Ilimanallu akornanni ingerlaartinneqassapput

Pisarnitsinnit nutaarluinnarmik sunniivigeqatigiinnissamut isumaqatigiissummik suliffeqarfillu Avolon atsioqatigiippugut.

Sunniivigeqatigiinnissamut isumaqatigiissummi suleqatigiinnissamik isumaqatigiippugut, tamannalu timmisartumik sarfatortumik VX4 eVTOL-imik pisinissamik inerneqarsinnaavoq.

Timmisartup sarfatortup ilaasut 160 km sinnerlugu ungasissusilimmut angallassinnaassavai, taamaattumillu Qeqertarsuup tunuani angallassissutitut piukkunnarluinnarluni, tassami Ilulissanit Ilimanamut timmisartuussissutaasinnaassammat.

Timmisartoq sarfatortoq nipikitsuuvoq, qulimiguulittullu qummorluinnaq millunilu qangattarsinnaalluni. Timmisartumik taama ittumik angallassissuteqarnitsigut ilaasuvut Ilimanaq Lodgemilu tikeraavut piujuartitsivissumik angalasinnaapput, atlantikoq qulaallugu toqqaannartumik Ilulissanut minnerminnit aallarnissartik tikillugu.