7. november 1960 Suliffeqarfipput taamanikkut Grønlandsflymik ateqarsimasoq SAS-imit Orsugiassiorfimmillu Øresundimit pilersinneqarsimavoq, taamani Dye-stationinik Sisimiuni Kulusummilu pilersuisussatut takorloorneqarluni. Suliassamut tassunga DC-4-t Islandimit Sikorsky S-55-illu Canadamit attartortarsimavavut. Aammattaaq isumaqatigiissutit Wet-lease-nik taasat KGH-mit ingerlanneqarsimasut ingerlatilerpavut. KGH-p timmisartuussineq 1958-imiilli tamanna tikillugu ingerlatarisimavaa. Isumaqatigiissut Catalinanik Otterinillu angallassinernik imaqarpoq.

1962 Nunatsinni Landsrådi KGH-lu suliffeqarfitsinni piginnittutut ilanngupput, piginneqataasullu taakku sisamat suliffeqarfik tamarmik immikkut 25%-imik piginneqataaffigilerpaat. Nuummi Catalinamik ajunaartoqarnerani inuit 15-it toqunerisa kingorna taakku timmisartut immamut missinnaasut qulimiguulinnik taarserpavut.

1965 S-61-it siulliit Nuummut tikiunneqarput. Taakkulu atorlugit Grønlandsfly nunarsuarmi timmisartuutileqatigiiffinni siulliit ilaanniilluni qulimiguulinnik ilaasunik angallassisartunngorpoq. Taassuma kingorna S-61-it tallimanik allanik ilaneqarput, qulimiguulillu nunatsinni angallassinermi ilasarnaataallualersimalluni. Illoqarfiit arfinillit heliportilerneqarput. Tassungalu atatillugu aamma Catalinat atorunnaarsikkiartorneqarput.

1966 Aallaqqaammulli inuiaqatigiinnik kivitseqataanissaq Grønlandsflyp tungaanit takorluugaasimavoq. Suliffeqarfiup pilersinneqarneranit ukiut arfinillit qaangiuttullu kiisami angallassinermut assistentinik nammineq ilinniartitsisinnaalerpugut.

1970-ikkut Sinerissami illoqarfinni arlalinni heliportiliortoqarpoq. 72-imi Ammassaliup eqqaani qumiliguulik atulersinneqarpoq, 75-imilu Thulemi eqqaanilu timmisartuussisarneq ingerlanneqalerpoq. Taamaalilluni Grønlandsflyp nunarsuarmi qulimiguulimmik timmisartuussisarnerni angallaviit isorartunerpaat ineriartortilerpai.

1972 S-61-it suliassanut tamalaanut atorneqartarsimapput, napparsimasunut timmisartuussinernit assigiinngitsunut kivitsilluni assartuussinernut. Ingerlatsitseqatigiiffigisaq Greenlandair Charter (Glacemik taallugu nalunnginneqartoq) pilersinneqarpoq tassani niuernikkut sullitaqarnissat ukkatarineqarluni, US Air Forcelu tassani sullinneqarsimavoq. Bell 206 Inngili Qernertumi zinkimik piiaaffimmut atugassatut pisiarineqarpoq. Qulimiguuliutivut aamma Tuluit Nunaanni Amerika avannarlermilu sinerissap avataani suliaqartunut attartortinneqartarsimapput.

1974 Grønlandsflymi sulisut amerliartorusaarput, flymekanikerillu siulliit ilinniarsimasunngorput.

1979 Nuummi mittarfik sananeqarpoq Dash 7-ilu pisiarineqarluni. Timmisartoq taanna nutaarluinnaavoq asseqanngitsoq, Grønlandsflylu nunarsuarmi siulliit ilaanniilluni timmisartumik pisisuuvoq. Timmisartoq annertuumik useqarsinnaasutut sanaajuvoq mittarfinnilu naatsuni ingerlasinnaalluni.

1980-ikkut Namminersornerullutik Oqartussat eqqunneqarnerani sullissiviit nunatsinni sullissisimasut assigiinngitsut taarsersorneqarput. Siornatigut KGH tassaasimavoq timmisartulernermi billetsinik tuniniaasuusarsimasoq; ukiut taakku Grønlandsflyp suliffeqarfik KNI suleqatigalugu suliffeqarfik Grønlands Rejsebureau aallartissimavaat.Ilulissani Hotel Arctic ingerlatarilerparput, taanna mittarfittaarneq ilutigalugu sananeqarsimasoq.

1981 Canadamiut suliffeqarfiutaat First Air suleqatigalugu Nuummit Iqalunnut aqqut pilersinneqarpoq ukiunilu 13-ini ingerlasimalluni. Aqqut 1994-imi ilaasukippallaartarnera peqqutigalugu unitsinneqarpoq, kingornatigulli arlaleriarluni ammarneqartarsimalluni. Kingullermi 2012-14-imi ingerlaarfiusarsimavoq. Reykjavikkimut aqqut ukioq taanna aamma ammarneqarpoq, ukiullu pingasut qaangiummata sivitsorneqarluni Dash-7-it Nerlerit Inaannut Ittoqqortoormiit eqqaaniittumut ingerlaqqittarniassammat.

1983 Ilulissani mittarfik sananeqarpoq, tassanngaanniillu aqqutit nutaat Dash 7-it mittarfinni tallimani, Nuummi, Kangerlussuarmi, Narsarsuarmi, Ilulissani Kulusummilu ingerlavigisartagassaat sanarfineqalerput. Mittarfinnit taakkunannga tallimanit qulimiguullit aamma piffinnut mittarfeqanngitsunut ingerlasarput.

1986 Grønlandsflyp Icelandair suleqatigalugu Narsarsuarmit Keflavikkimut Københavnimullu aqqut ammaappaat SAS-illu atlantikoq qulaallugu kisermaassilluni timmisartuussisarnera taamaalilluni unitsinneqarpoq. Ukiut marluk qaangiutiinnartut sapaatip akunneranut timmisartuussisarnerit amerlineqarput marlunngortinneqarlutik, tassani Islandimiut Boeing 727-utaat atorneqartarluni.

1990-ikkut 90-ikkut aallartinneranni atlantikoq qulaallugu timmisartuussisarnerit nutarterneqarput, taamanikkullu Maersk Airimit taasamit timmisartumik attartortalerpugut Keflavikkimullu akunnittarneq taamaatillugu Narsarsuarmit Københavnimut toqqaannartalerluta. Mittarfiit naatsut amerlanerit sananeqarput Dash-7-inillu amerlanernik piseqqissinnaalluta, taamanikkullu timmisartoq taanna naatsorsuutiginarluartoq tallimanngorlugu pigilerlugu.

1992 Ingerlatseqatigiiffiutigisarput GLACE US Air Forcep taassumalu DYE-baseutaasa nunatsinniikkunnaarnerisa kingorna imminut akilersinnaajunnaarpoq. Suliffeqarfik matuneqarpoq nalingilu Grønlandsflymut ilanngunneqarlutik. Taamalillunilu timmisartunik attartortitsisarneq suliffeqarfimmi immikkoortortaalerluni ilannguppoq.

1998 Grønlandsflyp Boeing 757-itaava ‘Kunuunnguaq’ pisiarineqarmat SAS-ip nunatsinni timmisartuussinikkut inissisimanera aammaarluni allanngortinneqarpoq. Timmisartorsuaq Kangerlussuup Københavnillu akornanni timmisartuussisussatut inissinneqarpoq, ukiullu tulliuttut suliffeqarfiit taakku marluk illugiillutik timmisartuussinernik suliaqarsimapput.

2002 Grønlandsfly apriilimi Air Greenlandimik taaguuteqalerpoq, ullumikkullu ilisarisimalluagarput qalipaat aappaluttoq ilisarnaallu issittumi naasoq piffinnut nutaanut ingerlanitsinnut ilisarnaataallualerput. Ukioq taanna SAS uniinnarpoq nunarpullu qimallugu. SAS-ip uninnera ilutigalugu Airbus 330-200, ‘Norsaq’, pisiaraarput, taannalu novembarimi siullerpaamik tikiunneqarpoq. Timmisartorsuaq annertunerusumik useqarsinnaavoq. Timmisartorsuartaarnerullu kingorna ilaasutta kiffartuussineq ilorrisimaarnerlu tulluarnerulersoq malugisimavaat. Billetsillu akii kisermaassilluta timmisartuussisalernitsinni qaffatsinneqanngillat.

2003 Air Greenland aammaarluni SAS-imut unammillernermi siuttunngoqqippoq US Air Forcemut isumaqatigiissut Pituffimmit (Thule Air Base) Københavnimut timmisartuussinissamut tunngasoq ukiunut tallimanut atuuttoq pissarsiarigamiuk. Isumaqatigiissut taamanili arlaleriarluni nutarterneqartarsimavoq.

2004 Air Greenland nittartagartaarpoq, ilaasullu billetsinik internetsikkut pisisinnaalerput. Sungiussiniarneq arriissimavoq, 2009-miilli billetsisiniat 30%-ii internetsikkut pisiniarsimapput, taamanerniilli aamma internetsikkut billetsisiniarneq nalinginnaajartuinnarsimalluni.

2007 SAS angallannerpaaffiup nalaani timmisartuussisartussanngorluni uteqqippoq, aamma tassani Icelandair Reykjavikkip Nuullu akornanni angallassisalerpoq. Icelandair suli illoqarfiit taakku pingaarnerit marluk akornanni ingerlasartoq SAS aammaarluni nunatsinni timmisartuussisarnini unitseqqiinnarpaa.

2010 Dash-7 ukiut 30-t nunatsinni angalasarsimalereerpoq. Nutarterinissamut piffissanngorsimavoq, upernaallu ingerlanerani Dash-8-t marluk siuliminnut taarsiisussanngorput. Air Greenlandip FN-ip Global Compactimik tunngaviit qulinik taasagai ilannguffigai.

2015 Air Greenlandip Dash-7-iutini kingulleq tunivaa, suluusalinnillu timmisartuussinerit massakkut Dash-8-mit tamakkiisumik ingerlanneqalerput. Islandermiut qulimiguuliuteqarfiata Norðurflugip 30%-ia pisiaraarput, 2021-mili tuneqqillutigu. Ukioq aamma taanna FN-ip nunarsuarmi anguniagai 17-it ilannguffigaavut.

2019 Air Greenland nunatsinnit 100%-imik pigineqalerpoq, danskit naalagaaffiata SAS-illu piginneqataaffitik Namminersorlutik Oqartussanut tunimmatigik. Airbus 330-880neo nutaarluinnaq pisiarissagipput aalajangiunneqarpoq, taassuminnga pisineq suliffeqarfiup oqaluttuarisaanerani pisiaq annerpaajuvoq. Club Timmisa, ilaasortatsinnut klubbiusoq atulersinneqarpoq. Club Timmisa iluaqutigalugu ilaasuvut aallalernermit tikinnissap tungaanut iluaqutissanik paasissutissanillu toqqaannaq tuniorarneqartarput. Nunarsuarmi anguniakkat sorliit piujuartitsinissamut periusissiassatsinni tunaartarineqassanersut aalajangiunneqarpoq.

2020 Covid-19 nunarsuaq tamakkerlugu ajalusoortitsivoq, Air Greenlandillu atorfiit 95-it atorunnaarsittariaqalerpai. Suliffeqarfik ukiunik 60-inngortorsiorluni nalliuttorsiorpoq, tamannalu KNR-ikkut aallakaatinneqarpoq timmisartumilu aviisimi Sulummi aamma immikkut ittumik saqqummiunneqarluni.

2021 Air Greenland Avolonilu sunniivigeqatigiinnissamik isumaqatigiissusiorput, tassani isumaqatigiissummi timmisartunik sarfatortunik pisinissaq attartornissarluunniit isumaqatigiissutigineqarpoq, timmisartuussinernillu CO2-mik aniatitsinngitsumut alloriarneq siulleq tutineqarluni.