Kalaallit Nunaanni silaannakkut angallannermut tunngatillugu 2024-mi pisussat ilaat ataaseq killingusaami utaqqivoq: novembarip 28-at. Ulloq taanna Nuummi mittarfik nutaaq pilersaarutit malillugit ammarneqassaaq. Taavami?

– Piviusoq nutaajuvoq, timmisartortitseqatigiiffimmut pingaarutillit ilaat Air Greenlandimi Attaveqaqatigiinnermut Isertitanullu pisortaq, timmisartuussinissamut pilersaarutip tungaatigut pingaarutilimmik inissisimaffeqartoq, Tomas Leth Jørgensen akivoq.

– Novembarip 28-ani Nuuk isaasalerlugu Kangerlussuanngussaaq. Illoqarfiit pingaarnersaat novembarimiit nunami nunanullu allanut timmisartuussinermi qitiussaaq. "Bussinik unittarfissaq“ nutaaq, sumulluunniit timmisartuussiffiusoq, Thomas Leth Jørgensen oqarpoq.

"Timmisartuussinissamut pilersaarut" pikkunaappalussinnaagaluarpoq. Angallannerit killeqanngitsut takorloornarsinnaapput. Kukkussanngilasili. 2024/25-mut soqutiginartunik nutaarsiassaqarluarpoq – nunanut allanut timmisartuussinerit aallarnerfigeriartigit:

2025-mi aasaanerani timmisartuussinerit marsimiit oktobarimut pilersaarutaapput, sapaatip-akunneranut arfineq-pingasoriarluni Atlantikoq qulaallugu toqqaannartumik timmisartuussisoqartassalluni, taakkunannga tallimat Tuukkamik pingasullu timmisartumik Narrow Body-mik taaneqartartumik, ataatsimik ingerlaarfilimmik 180-189-inillu ilaasoqarsinnaasumik. Nutaatut sapaatip-akunneranut pingasoriarluni ullaakkut Nuummit Københavnimut ualikkut Danmarkimut tikittoqarsinnaalissaaq, aamma Københavnimit Nuummut 19.30 tikittoqarsinnaalissalluni.

Siunissami – maannakkut 2024/25-mi timmisartuussinerit saniatigut – pitsanngorsaanerit allat aamma takorloorneqarsinnaapput. Tuukkap unnuakkut timmisartuussisarnissaa pilersaarutaavoq, Thomas Leth Jørgensen suleqataalu siulittuipput. Aamma The Big Applemut, New Yorkimut, timmisartuussisalernissaq pilersaarutaavoq.

Thomas Leth Jørgensenip pingaarnersat ima eqikkarpai:

– Danmarkimi København Billundilu salliutinniarpavut – Aalborgimullu pilersaarutit sulissutigileruttorpavut. Kangiani Islandimut attaveqaatit nukittorsarniarpavut. Kitaani Canadamut attaveqaatit aallartissavavut, piffissarlu ungasinnerusoq eqqarsaatigalugu New York assigisaallu timmisartuussiffigisarniarpavut. Tamanna ullumikkut aqagulu pissanngilaq, Ilulissanili mittarfik ammareerpat piumaneqarnerujartorpallu Amerika aamma eqqarsaatigineqassaaq.

Air Greenlandip katiterisarneranut nunarsuarmi timmisartuutileqatigiiffiit ikittuinnaat unammillersinnaapput. Nunarsuarmi qeqertat annersaanni inoqarfiit siammarsimaqisut pissutigalugit atugassarititat immikkuullarissuupput. Silap pissusia immikkut ilungersunarpoq, kaperlallu unammillernarluni. Allatut oqaatigalugu nunarsuarmi qeqertat annersaata ataqatigiissaarnissaanut misilittagaqarnissaq paasisimasaqarluarnissarlu pisariaqarput, kikkut tamarmik isuaniit isuanut angallanneqarsinnaaniassammata. Air Greenland sakkutuunut suliffeqarfiugaluarpat ima oqariartuuteqartoqarsimassagaluarpoq: "Kinaluunniit qimanneqassanngilaq“. Tomas Leth Jørgensenimut suleqataanullu attaveqaatit pingasut ataqatigiilluarnerat pingaaruteqarpoq.

– Attaveqaatitsinni aggulunneq siulleq tassaavoq aqqutit angallannernit annertunerpaanit ungasinnerpaasut. Tassani kiffartuussinissamut isumaqatigiissutit atuupput, oqarpoq. Namminersorlutik Oqartussanik kiffartuussinissamik isumaqatigiissutit ilaatigut imaapput Qaanaap, Upernaviup, Uummannap, Ilulissat (ukiuunerani), Sisimiut (ukiuunerani), Kujataata, Tasiilap Ittoqqortoormiillu qulimiguulimmik angallavigineqartarnerat kiisalu Upernaviup Qaanaallu akornanni suluusalinnut isumaqatigiissut.

– Attaveqaatit aappaat tassaavoq illoqarfiit annerusut akornanni timmisartuussinerit Dash 8-mik ingerlanneqartussat. Kangerlussuup qitiusumik timmisartuussiffigineqartarnera Nuummit tiguarneqassaaq, Leth Jørgensen nassuiaavoq.

Timmisartuussinissamut pilersaarut nutaaq malillugu Avannaani, Qeqqani, Kujataani Tunumilu ullormi tassani angallannerit amerlanerulerlutillu pitsaanerulersinneqassapput, nunap immikkoortuisa akornanni aamma Atlantikoq qulaallugu angallassinernut atatillugu.

– Allannguutit ilaatigut ima kinguneqassapput, Tunumiit ilaasut ullormi tassani Atlantikoq qulaallugu timmisartuussinermut angumersisinnaalissasut, taamaalillutik unnuisariaqassanatik. Aamma Dash 8-t marluk Ilulissani inissinneqartalissapput, ullumikkutut ataasiinnaanani, Leth Jørgensen oqarpoq.

Ilaasunut apeqqut pingaarutilik alla: Akimmi?

– Unammillernermut illersuutaalluarnerpaaq tassaavoq timmisartuussinissamut pilersaarutit pitsaasut akillu unammillernartut, Thomas Leth Jørgensen akivoq itisiliillunilu;

Air Greenland unammillersinnaassuseqarniarluni suliniarpoq ilaasut ilumoorfiginnittut pakatsisikkumanagit. Ilumoorfiginninnerat nuannaarutigeqaarput, timmisartulli aappalaartuunera ilaasut uagutsinnik toqqaanerannut pissutaanngitsoq nalunngilarput, oqarpoq.

– Niuernermi asanninneqanngilaq. Taamaattumik akit appasinnerpaaffianiitinniarpavut, tamatumalu saniatigut Dash-8-nik angallassisarnitsigut angalanerit ataqatigiissimasut neqeroorutigisarniarlutigit. Aamma nunani allani timmisartuutileqatigiiffissuit suleqatigilluarnissaat anguniagaraarput, pisiniarfitsinni taakkua angalaffissaat tuniniarniassagatsigit, taakkualu uagut angalaffissavut toqqartarniassammatigit, Thomas Leth Jørgensen oqarpoq.