Arktisk Kommando Nunatsinni Politiit peqatigalugit Search and Rescue-mik, tassa ujaasinermik annaassiniarnermillu, akisussaassutut ataqaatigiissaarisartoq isumaqatigereerlugu, annaassiniarnerup ingerlaneranik saqqummiusinissamut akuerineqarpugut. Air Greenlandip qulimiguuliutaa H225 annaassiniarnernut atorneqartartoq Kangerlussuarmit aallaaveqarpoq. Timmisartortartut marluk aamma amuartaatilerisut marluk nikittaallutik ulloq unnuarlu qulimiguullip atorneqariataarnissaanut pigaartuusarput. H225-i timmisartortartut 9-t, amuartaatilerisut 8-t mikanikerillu 2 -t suliffigaat.

Ataasinngornermi septembarip 5-ni nal. 05.57 Air Greenlandip qulimiguuliutaa H225 annaassiniarnerni atorneqartartoq Arktisk Kommandomit nalunaarfigineqarpoq atorfissaqartinneqartoq. Umiatsiaaraq ataatsimik issimasulik angallatip motoorianik unittoorsimavoq, qulimiguulillu Ummannap kangerluanut annaassiniaqataajartortussanngorpoq, tassani nunamit suleqataasut ikiortigalugit umiatsiaaqqmik ujaaseqataassalluni.

Qulimiguuliup naalagaa Simon Dupont, aquttua Carl Bostrøm aammalu amuartaatilerisut Dolfi Lund aamma Aima Jensen Kangerlussuarmi pigaartuupput.

- Pigaartunut oqarasuaatikkut nalunaarutigineqarpoq Uummannap avannamut kangiatungaani sømilit 60-t missaanniilluni umiatsiaaraq motooriminik unittoorsimasoq. Piareersarpugut nalunaaquttallu ataatsip ingerlanerani qangattarpugut, Aasiaat qulaallugit Nuussuup kangiatungaanut ingerlanitsinni umiatsiaaraq siullermik sumiiffittut taasamit 1 milip missaaniittoq paasitinneqarpugut, H225-mi qulumiguuliup naalagaa Simon Dupont oqaluttuarpoq.

Qulimiguulik Flight Management Systemimik ilaatigut sumiissusersiutitalimmik atortoqarpoq. Taannalu atorlugu GPS-ikkut nalunaarutip kingulliup sumiinnera ujaasiffiginneqarsinnaavoq. Pisumili uani taassuma atornissaa pisariaqarsimanngilaq, umiatsiaaraq naniuminarmat.

- Angalasut tamarmik GPS-ikkut imaluunniit VHF-kut ajornartorsiornermik aallakaatitsissuteqaraluarpata pilertornerusumik ujaasisinnaasassagaluarpugut. Uanilu angut ajornartorsiortoq VHF-radioqarmat attavigisinnaagatsigulu, sumiiffia nassaarisinnaavarput. Umiatsiaaraq iluliarsuup qanittuaniippoq, siullermik sumiiffittut nalunaarutaasumit ungasinnani, Simon Dupont oqarpoq.

Timmisartup inuttai angutip umiatsiaaqqamiit amuarneqarnissaanut piareersarput. Amuartaatileriup aappaata Aima Jensenip suleqatini Dolfi Lund ammukartippaa, pilersaatutaasutulli pisoqanngilaq.

- Silaannarmi  umiatsiaaqqap qulaani 150 fodit (meterit 45-t missaanni) qutsitsigaluta ”uninngavugut”, qulimiguullillu pilersitaata anorip umiatsiaraq avammut ajattarpaa, tikikkuminaallisillugulu. Taamaattumik 170 fod-it missaannut qullartariaqarpugut, amuartaat nikerarpallaaqqunagu. Taamaattumillu aalajangerpugut Dolfi imaanut aqqartariaqartoq, Simon Dupont oqaluttuarpoq.

Air Greenlandip oqaluttuarisaanerani amuartaatilerisumik aatsaat taamatut iliortoqarpoq, tassani anguniarneqarluni amuartaatip sanimut uteqattaarluni aalavallaannginnissaa. Iliuuserlu taanna timmisartortartut amuartaatilerisullu sungiusarluarsimammassuk iluatsilluarpoq.