Marlunngornermi decembarip ulluisa aappaanni Air Greenland timmisartunut iniliap nutaap napparneqarnera malunnartippaat, tassaniissapput qulimiguullit Kujataanni sullissinissamut isumaqatigiissummik naammassinnittussat. Aaqqissuussinermut inuussutissarsiortut suliffiutillit, suleqatigisat aamma kommunimeersut amerlasuut aggerput – tamarmik isumalluarlutik nuannaarput aappaagu Qaqortumi mittarfiup nutaap ammarneqarnissaanut.

Piujuartitsinermut pisortaq, Inga Dora G. Markussen, aamma niuernermik ingerlatsinermut pisortaq, Chris Shern, aggersimasut oqalugiarlutik tikilluaqquaat, tassani pingaartippaat attaveqaasersuutit nutaat nunap immikkoortuanut pingaaruteqarnissaa:

- Tim­mi­sar­tu­nut i­ni­li­aq sa­naar­tu­gaq taa­maat­tu­in­naan­ngi­laq - tas­saavoq Kujataata tamarmi siunissaanut aningaasaliissutigineqartoq. Annertusiartortitsinissamut killiussat, suleqatigiinnermut aamma periarfissat nutaat pilersippavut, aappaagu mittarfiup nutaap ammarneqarnissaannut, ilaatigut taamatut oqarput.

Tim­mi­sar­tu­nut i­ni­li­aq 715 m2-i­sut a­ngi­ti­gi­soq ilusilersorneqarpoq qulimiguulik H155 ataaseq aamma qulimiguullit H125-t marluk imaluunniit H225 ataaseq taassuma iluaniissinnaallutik. Tamatuma saniatigut illumiipput allaffik aamma isersimaartarfik, perusuersartarfik, eqqiaanermut atortuusivik, toqqorsivik aamma teknikeqarfik, isertarfik ilanngullugu 125 m²-isut angitigisoq. Sanaartorneq aallartippoq marsimi qaartitsisoqarneratigut kiisalu timmisartunut iniliap januaarimi tunniunneqarnissaa naatsorsuutigineqarpoq.

Air Greenlandimit oqalugiaat ileqquusut tunngavigalugu pingasoriarluni huraartortoqarpoq entreprenør KJ Greenland aamma assassorlutik sulisorpassuit, saanaartornermik isumaginnissimasut pillugit. Air Greenlandip illuutinik aamma sumiiffinni ineriartortitsisua, Jess Angelo Degn Jacobsen, naapertorlugu taakkua suleqatitit sullissisut allat peqatigalugit suliaq kusanartoq tunniuppaat, ilaatigut pissutsit unamminartut nalaanni.

Tamatuma kingornatigut KJ Greenlandimit oqalugiartoqarpoq sanaartornermik aqutsisoq Anders X sulisartut qutsavigai sulilluarsimanerannik. Kommuni Kujallermi borgmesteri, Malene Vahl, aamma naatsumik oqalugiarpoq, tassani erseqqissarpaa mittarfiup nutaap atulernissaanut taamaallaat qaammatit tallimat affaannanngortut, suliffeqarfinnillu kaammattuivoq suleqatigiinnissamut nunap immikkoortuata ineriartornissaanut.

Timmisartunut iniliaq Sermeq Helikopters inissisimaffiata sanianiippoq tamanna Air Greenlandimit suleqatigiinnerup pitsaasup ilisarnaataatut erseqqissarneqarpoq:

– Ser­meq He­li­kopter­silu sanileriilernerput isumarput malillugu suleqatigiinnerup pitsaasup ilisarnaatigigaa. Na­lun­ngi­lar­pum­mi i­ne­ri­ar­tor­neq i­lu­at­sil­lu­ar­ne­ru­sar­toq qi­vit­se­qa­ti­giin­nik­kut, pisortaasut oqalugiaatiminni oqarput, tamannalu iluarineqarpoq.

Sermeq Helicoptersimi pisortaq, Pilu Nielsen, qaaqqusinermut aammattaaq qujavoq erseqqissaatigalugulu pilotit aamma mekanikerit pitsaasumik suleqatigiinnerat:

– Uagut ileqqoraarput suleqateqartarneq, maanilu nunami sammisamik assigiimmik suliaqaratta, ilaatigut oqarpoq, Air Greenlandimi pisortat aggersarpai tunissuteqarfigalugillu.

– Uanga nalunngilara misilittakkakka tunngavigalugit nuannersarnermik pilersitsissasoq – siaasaasarfik, sanileriinnik ataatsimoortitsisussaq, qungujulalluni oqarpoq. Tunissut assut nuannaarutigineqarpoq. 

Oqalugiartut kingornatigut nerisassarpassuit aamma kaagit alutornaqisut tamusserfigissallugit piffissanngorpoq, KJ Greenlandip kantiinamiuisa piareersarsimasaat.

Qaqortimi aappaagu apriilip ulluisa 16-ianni mittarfik nutaaq ammarpat, naatsorsuutigineqarpoq taassuma assartuinermut, sullissimanermut aamma nunap immikkoortuani ataqatigiinnermut pingaaruteqartutut aallaaviunissaa. Tamatumunnga ilutigitillugu sulisut, ulluinnarni suliassanik ingerlatsisussat – timmisartortartut, mekanikerit aamma amoortaatinik suliallit – Narsarsuarmi Qaqortumut nutsissapput.

Tamatuma saniatigut KJ Greenland Air Greenlandimut sulisunut inissiassanik arfineq pingasunik sanaartornertik ingerlappaat, taakkua aappaagu februaarimi naammassineqartussaapput, tamatuttaaq Greenland Airportsip mittarfimmi utaqqisarfissaata nutaap sanaartorneqarnera ingerlavoq.

Nappaanersiornerup kingornatigut arktisk ingeniør, Ukalini Josefsenip, utaqqisarfimmik sanaartorneq qaaqqusanut takornariartippaa. Tassani takorlooruminarpoq naammassineqaruni qanoq iluseqarnissaa, taamatuttaaq AFIS-napasuliaq illup iluaniittoq alutorineqarpoq.

Maanna Greenland Airports qanimut suleqatigalugu attaveqaatit nutaat atulernissaannut pilersaarusiorneq aallartikkiartuaarpoq.