Timmisartugut Dash-8-t pingasut Kangerlussuarmi orsersorluareerlutik Nuummut pujungaatsiartumut, nal. 17.00-imi nalliuttumut minniarlutik misiliipput. Inuttatta immikkoortut pingasuusut ilisimavaat, pujornerani “putumik” takkuttoqarsinnaasoq, tamatumalu pinerani qanittumiinnissaq pisariaqarpoq.

Kangerlussuaq ulikkaarluinnareersimavoq unnuiffissallu nungussimallutik. Siniffiit siaartakkat inersuarmiittut atorneqarput, tamannali ajornartoornermi aaqqiissutissani, nunaqarfimmi siniffissaarukkaangat atortakkatsinni kingulliusarpoq. Taamaattumik ilaasunik apuussiniarluta timmisartullu angerlarsimaffiannut Nuummi hangarimut apuunniarlugit misiliinerup kingulliup misilinnissaa pingaaruteqarsimavoq.

Tassani timmisartut misissorneqartarput aserfallatsaalineqartarlutillu. Assimi, 14. juulimi assilisaasumi takuneqarsinnaasutut Nuuk timmisartutsinnit Dash-8-nit arfineq pingasuusunit arfinillit aammalu timmisartutta napparsimasunik assartuutitta angerlarsimaffigaat, tassanilu aamma qulimiguuliutigut annertuumik misissorneqartarput. Timmisartut anninneqarsimapput siuleriisillugillu uninngatinneqarlutik, mittarfiup nutaap sananeqarneranut atatillugu pilersaarutaasumik qaartitsinissaq peqqutigalugu. Lars Nielsen, timmisartuni teknikeritut ilinniartorput assiliisimaneranut qutsavigaarput.

Inuppassuit malinnaapput

Ippassaq unnukkut timmisartut timmioraartut nipaat inuppassuit nittartagaq Flightradar24.com aqqutigalugu malinnaanerinut peqqutaasimanersoq qulakkeerlugu ilisimaneqanngilaq.

Kisianni pasinarpoq, inuppassuit mittoqarnissaa iluatsissanersoq pissanngatigisimassagaat. Nal. 22.11 Air Greenlandip timmisartui GL561, GL 416 aamma GL3259 Flightradar24-i aqqutigalugu malinnaaffigineqarnerpaapput.

Tassani timmisartut ataasiakkaarlutik aqqut aalajangersimasoq, sukkanniuttarfittut ilusilik kaaviiaarfigalugu paarlakaakkaat ersarissumik takuneqarsinnaavoq. Timmisartoq ataaseq kaaviiaarfimminiit Akianut aallaraangat, tullia kaaviiaarfimmut pisarpoq.

Timmisartut Nuummiit Nuummut ingerlatillugit uani malinnaavigineqarsinnaapput www.Flightradar24.com 

Aamma Mittarfeqarfiit YouTube-kkut toqqaannartumik aallakaatitsinerannut inuppaaluit malinnaapput. Tassani miffissami pissutsit qanoq innersut, aammalu misiliinerup taamaatinnissaanut ikummatissaq qanoq annertutiginersoq allaaserineqaqattaarput. Aamma piffissap ingerlanerani inuttat piffissakilliartorput qasuersernissamullu aalajangersakkat atuutilernissaat qanilliartorluni. Assiliissut avannamut sammitinneqarpoq, tassanilu nal. 21.57 pujoq qanoq ussitsiginersoq takutinneqarpoq.

Assiliissummit mittarfiup avannamut sammisortaanut sammitinneqartumit isikkivia uani takusinnaavat

Missanerpammi

Nal. 22.20 missaaniilersoq isikkivik pitsanngoriarpoq, taamaattumillu GL514 mittarfiup avannaata tungaanut aallarpoq. Timmisartup assakaasuni anillatsippai, tamannalu timmisartup iluani nuannatsitsivoq. Kisiannili tamatuma peqatigisaanik ilaasut upperinnippasinngitsut malunnarpoq. Sivisoorsuarmimmi kaaviiaarsimasutut misigisimasimassapput. Timmisartup assakaasui mittarfimmut tummata qularnerli suli nipitunerusumik nillerrannermik ersaattaannerujussuarmillu taarserneqarpoq. Timmisartut tulliit marluk malisungaannarlutik nal. 22.35 aamma 22.43 mipput

Taamaalilluni timmisartuutigut pingasut inuttagullu putsumut ajugaallutik angerlarsimaffimminnut isumannaatsumik mipput, taamaalillunilu teknikerigut marlunngornermi angallassinissamut piareersaasinnaalerput. Tamanna qanoq inerneqassanersoq paasiumaarparput, kisiannili oqaluttuarisinnaavarput, Air Greenlandimi sulisutta pisinnaasartik tamakkerlugu angalasut apuuffissaminnut apuunnissaat sulissutigimmassuk. Angalasullu sila imaluunniit pilersaarutaanngitsumik aserfallatsaaliuinerit peqqutigalugit apuussinnaanngitsut atugassarititaasut, ukiup imaalinerani ajornakusoorsinnaasut atorlugit pitsaanerpaamik inissinnissaat sapinngisatsinnik isumaginiarsaraarput.

Piffissamik eqquisinnaajunnaaraangatta angalanissamut pilersaarummik nutaamik suliaqarniarluta katitigassarpassuit aallartittarpagut, silassaq, akunnittarfiup tigusinnaasai, inuttat timmisartullu suut aqqummi sumi atorneqartussaanersut misissorneqartarput. Naatsumik oqaatigalugu katitigassat nutaat aallartittarput. Taamaattumik timmisartugut kinguaattoortillugit, imaluunniit aallartussanik taamaatitsisariaqartilluta sulisorpassuagut sumiiffinni suliffigisaminni ajornartorsiutinik aaqqiiniarlutik ulapputtarmata eqqaamaneqartariaqarpoq <3