Ulloq 22. april 2023 qulimiguuliuterput B212 OY-HCY Nuummukaanneqassalluni Tasiilamiit aallarpoq, timmisartortartoq Ole-Widar Elvemo aquttoralugu Mittarfeqarfimmeersorlu usilersuisartoq Amos Ezekiassen ilaasoralugu. B212-illu pigisatta kingullersarimmassuk pisoq persuarsiornartutut isigaarput.

Qulimiguullip taassuma B212-p sineriassuatsinni isorartuumi 1981-mili atorneqalersup maanna ukiut 42-t qaangiunneranni nunatsinni naggataarnera sap.ak. ingerlanerani malinnaaffigaarput.

OY-HCY-p Nuummut timmisartuunnera nunatta kangiata kujataa aqqusaarlugu, Skjoldungen orsersorfigeriarlugu, assinilu takuneqarsinnaasutut Narsarsuaq aqqusaarlugu pivoq. Pilersaarutillu malillugit aqaguani Paamiut aqqusaarlugit Nuummut apuunneqartussaavoq. Pisussarli tamanna silamaasiit akornuserpaa, aqqutissaami timmisartorfigisassaanngilaq.

Silallu pitsanngorsiisaa, kujataanilu silaginnera iluatsillugu, qulimiguulik taanna Qaqortumut Nanortalimmullu nassiussanik assartuussinermut naggataamik atorneqarpoq.

B212-p eqqartorneqarnera apeqqarissaarnernik naggasissavarput. Qulimiguulimmut tassunga tunngatillugu timmisartunik iluarsaasartoq Finn Lennert aamma timmisartortartoq Lars Munch oqaloqatigaavut. Uani atuakkit. 

B212-illu takoqqinnera nipaatalu immikkuullarissup tusaaqqinnera inuit nuannarineqaat. Qulimiguulimmi taanna 2013-miilli, S61-mut taartitut, taqqavani ilaasunik angallassissutaavoq.

Taamanikkulli B212-ip tikilluaqquneqarnera killeqarsimavoq, S-61-mi 19-nik ilaasorqarsinnaasoq, silalu apeqqutaatippallaarnagu ingerlasinnaajuartoq amerlasuunit maqaasineqarpoq. S-61 maannamut amerlaqisunit eqqaamaneqarpoq, tassungalu ilaasimanngitsut ilisimassavaat taamani pissutsit qanoq nuannersimatiginerat. Nalunngilarpulli suna tamarmi aallartiffeqarlunilu naggateqartarpoq.

B212 OY-HCY-p Narsarsuarmiit Paamiut aqqusaarlugit Nuummut ingerlanneqarnera sisamanngornermi apriilip 27-ni pivoq. Qulimiguulik 10.15 aallarami nal.ak. arfinillit qaangiuttut nal. 16.10 Nuummut tikippoq. Taamaasillunilu B212-it Air Greenlandimi atuunnerat naggaserneqarpoq.

Qulimiguullip Nuummut tikinnerata Mittarfeqarfinniillu tikilluaqquneqarnera ilusilersuisartutut ilinniartutta videoliaani uani takuneqarsinnaavoq. Assinillu videonillu takusassiisimasut tamaasa qutsavigiumavavut.

Atuartut ilaat aperissajunnarsipput, taavami? Qulimiguullip naggataamik angalanissaa tullinnguuppoq. B212-t marluk, aappaa OY-HCY- lluni, Canadami suliffeqarfimmut tunineqarput, juunillu ingerlanerani umiarsuarmik aallarunneqassapput. Pisisut sumut atorniarneraat ilisimaqqissaanngilarput, nalunngilarpulli piumaneqaqisut.

B212-p eqqartorneqarnera apeqqarissaarnernik pingasunik naggasissavarput. Uani Air Greenlandip pisortaanera Jacob Nitter Sørensen oqaloqatiginera pillugu atuaruk.