Air Greenlandip 2022-mi kaaviaartitai aatsaat taamak annertutigalutik 1,5 milliard kroniupput, tamannalu ukiup ingerlanerani ilaatigut ulaperujussuarsimanermut ersiutaavoq.

Ukiup 2022-p aallartinnerani Covid 19 inuiaqatigiinni tuniluutipiloorpoq taamaattumillu qaammatit siulliit ulapiffiunngillat. Taamaakkaluartoq ukiumut timmisartuussinerit 33.000-niit 34.600-nut amerleriarput, ilaasullu ukiup Covid 19-ip atuutilerfiata siulianitut 2019-misut amerlatigingajallutik.

- Januaarimi februaarimilu pisarnermit ilaasut ikinneroqaat, ukiunulli siuliinut marlunnut naleqqiullugu siorna timmisartuussinigut amerlanerupput aammalu ilaasoqarneruvugut, siulersiusunut siulittaasoq Bodil Marie Damgaard oqarpoq, 2022-illi Air Greenlandimut angallassinikkut ajornartorsiorfiusarsimanera eqqaallugu.

- Siullermik silarluttarnerani kinguaattoornerit taamaatitsinerillu immikkut ittumik amerlasimappt, aappaatullu Covid 19 aammalu Ukrainemi sorsunneq pissutigalugit timmisartunut kingoraartissanik Europami pissarsiniarneq ajornarsimaqaaq. Tamannalu Dash 8-t pilersaarutit malillugit angallaartarnerinut teknikkip tungaatigut aammalu H155-t atulerneqarnissaannut sunniuteqarpoq.

Tamakkulu avataaninngaaniit sunniinerit, ilaasullu amerlanerujussui, sullitatsinnut annertuumik eqquipput suliffeqarfillu tamakkerlugu tamaviaartillugu. Pissutsillu unammillernaraluaqisut Air Greenlandip sulisuisa tunniusimalluarlutik ilaasunik sullissilluartuarnerat assut ajasoorutigaara.  Immikkorluinnarmi sullissisimapput, Bodil Marie Damgaard oqarpoq.

Sila pissutigalugu timmisartuussinernik taamaatitsinerni Air Greenlandip nammineq akilikkaminik ilaasut unnuiffissaannik isumagisarpai, naak tamanna inatsisitigut pisussaaffiginngikkaluarlugu, aammalu nunarsuup sinnerani silaannakkut angallassisunit allanit atorneqanngikkaluartoq.

- Timmisartuussinissat taamaatittarnerint kinguaattoornernullu aningaasartuutit ukioq manna 100 millionit kronit missaanniipput. Sullitattalu ornitaminnut apuunnissaat qulakkeerniarlugu taamatut iliortarpugut. Sullitatsinnut ataasiakkaanut pingaartuummat, aammali Air Greenlandip inuiaqatigiinni akisussaanini naapertorlugu angalasut ataasiakkaat ornitaminnut apuunnissaat, taamatullu silaannakkut attaveqaasersuutit ataqatigiittuarnissaat, qulakkeerusummagu.

Angalaniartut amerliartorput

Ukioq 2022 Covid 19-ip kingorna sukkasuumik nalinginnaasumik ingerlaleqqiffiusoq, immikkut ittumik unammillernartut Air Greenlandimut sullitaanullu annertuumik tamaviaartitsipput.

- Sullitat naatsorsuutigisamit sukkanerusumik uteqqipput tamannali ilutigaluguli silap pissusaata silaannakkut angallassineq aamma annertuumik ajoqusersorpaa. Pitsaaqutinillu taasaqassagutta ingerlalluaqqilernitta saniatigut takornariaqarneq siuariarujussuarpoq. Tamanna inuiaqatigiinnut iluaqutaavoq, angalasulli ingerlariaqqinnaveertut inissarsiuuttarnerini unnuisarfinnut immikkut eqquisarpoq, pisortaaneq Jacob Nitter Sørensen oqarpoq.

- Maannakkullu sulisutigut aammalu angalasut eqqarsaatigalugit nalinginnaasumik ingerlaqqilernerput uagutsinnut nunatsinnullu nuannaarutissaavoq. Maannakkummi Covid 19-mmi kingorna silaannakkut angallannerup pissusissamisuuleqqinnera qularutissaanngilaq, ukiorlu qaangiuttoq aamma angallannerup tungaatigut siuariarfiulluni, pisortaaneq oqarpoq.

Angallannerup annertusinera piffissap angallannerpaaffiup avataani pivoq, takornariallu angallannerpaaffiup avataani angalanissamik toqqaasarnerannik ersersitsilluni. Timmisartunut ilaasut 34%-mik amerleriarput, 2021-mi 309.000-niit 2022-mi 416.000-nut.

- Nunatsinnullu takornariarnissamut suli amerlanerujartortut toqqaasalernerat, ineriartornerup pitsaasumik ingerlaneranik ersersitsivoq. Air Greenlandip suliffeqarfissuartut takornariaqarnermut aningaasaliinermigut ”reason to go” -mik (tikissallugu pissutissaqarpoq) taasanik tunisassiorpoq, tamannalu suliffeqarfiutigisatta isumagaat, Jacob Nitter Sørensen oqarpoq, assersuutinillu taasaqarluni.

- 2022-mi Michelin-imit nersornaasigaq neriniartarfik KOKS Ilimanami, pilersitseqataaffigaarput, tassanilu suliffeqarfiuterput World of Greenland illuaqqanik attartortakkanik ingerlataqarpoq. Aamma ”Arctic Excursions” pilersipparput, nunaqavissut takornarialerinermik ingerlatsisut takornarianut aammalu nunaqavissunut ingerlataminnik qarasaasiat aqqutigalugit piseqqusaarinissamut periafissillugit.

Suliniut taanna piffinni assigiinngitsuni takornariagassat amerlanerulersillugillu takornariat namminneq takorusutaminnik toqqaanissaannut periarfissiivoq. Suliniutillu taakku piginnaasanik annertusaanermut ilaapput, nunattami tamanna takornariaqarnermik ineriartortitsinermi pisariaqartippaa, pisortaaneq oqarpoq.

Timmisartuutit amerlipput

Ukioq 2022 sulisut puigorallassagunanngilaat. Timmisartuussinerup silamik akornusersorneqanera kisiat pissutiginagu, kisiannili Air Greenlandip timmisartorsuartaavata Tuukkap nunatsinnut tikinnera pissutigalugu.

- 2018-mi timmisartuutinik nutarsaanissamut periusissiap naammassinissaa qanilliartorpoq. Aatsaat taama akisutigisumut aningaasaliivugut, tassa Airbus 330neo-mut decembarimi atulikkatsinnut. Aammalu H155-nit arfineq marlunnit tallimat atulerneqarput, tamannali ajornaatsuinnaasimanngilaq. Aaqqitassallu aammalu teknikerinik timmisartortartunillu ilinniartitsineq naammassippat, qulimiguullip piumasaqaatinik eqqortitsinissaa qularutiginngilarput.

2022-mi siulersuisut Dash 8-mik ataatsimik pisinissaq aalajangiuppaat, taannalu ukioq manna maajimi atulersussaq, teknikkikkut ajornartorsiornermi taartaasartussatut piareersimatinneqassaaq. Taamatullu qulimiguulinnik H125-nik pisinissaq aalajangiunneqarpoq, taakkulu qulimigulinnut AS350-nut taartaassussat ilaat ukiaru ilaallu 2024-mi atorneqalissapput. 

- Naak ukioq annertuumik pisoqarfiugaluartoq, akileraarutit peereerlugit ukiumi angusat 58,6 million kronit siulersuisunit naammaginartinneqarput. Air Greenlandip suliffeqarfissuartut siunissamut, aamma 2022-ip kingorna, piareersimalluarnissaa annertuumik pingaaruteqarpoq. Nuna tamakkerlugu ingerlatsivugut takornariaqarnikkullu periarfissat ineriartornerlu maannakkut atuuttut, annertuumik eqqumaffigalugit.

Air Greenland A/S ileqquusumik ataatsimeersuassaaq majip 12-ani 2023.

• COVID 19-ip nassataanik martsip tungaanut angalaniartut ikissimapput
• Ukiup ingerlanerani sila unerisimanngeqaaq, timmisartunullu kingoraartissat annertuumik amigaataallutik
• Air Greenland timmisartuutit taarsersorneqarnissaannut atatillugu aningaasanik attartornissamut isumaqatigiissuteqarneq tunngavigalugu, nunani tamalaani nersornaasiuttakkamik “European Editor’s Deal of the Year” -mik qaammammi maajimi nersornaatisivoq.
• Air Greenland aamma Airbus Helicopters qulimiguulinnik H125-nik qulingiluanik pisinissamut isumaqatigiissusiorput
• Qulimiguullit H155-t nutaat tamangajammik atulerput
• Savalimmiormiut neriniartarfiat tusaamasaq Michelin-imillu akuerisaq KOKS Ilimanami ammarpoq
• Angalaffissanik nittarsaassinerup Vestnordenip 400-nit peqataatitaaffigineqartup ammaanersiorneqarnera Air Greenlandip hangariani ingerlanneqarpoq
• Visit Greenlandimik suleqatigiinnissamut isumaqatigiissut ukiunik pingasunik sivitsorneqarpoq.
• Air Greenland Billundimiit Kangerlussuarmut silaannakkut aqqummik nutaamik ammaavoq
• Air Greenland Kalaallit Nunaanni timersoqatigiiffiit kattuffiat pingaarnertut tapersersuisuunissamik isumaqatigiissummik atsioqatigaa, taamatullu Nunatta isiginnaartitsisarfia - The National Theatre of Greenland, aamma pingaarnertut tapersersuisuunissamik atsioqatigalugu.
• Sulisut kattuffii sisamat isumaqatigiissutinik tallimanik atsioqatigineqarput.
• Nunatta Angalatitseqatigiiffia, Relationwise-mit tunniunneqartartumik, suliffeqarfittut Danmarkimi innersuunneqarnerpaasartutut nersornaaserneqarpoq
• Arctic Excursions-portal atulersinneqarpoq
• Timmisartuussinermi Tuukkaq atulerneqarpoq