Ulloq decembarip arfineq aappaat ileqqoq nuannersoq Qaanaami malunnartinneqarpoq: Operation Julemand, (Juullip inuata takkunnissaa), Pituffik Space Base ukiut tamaasa 1959-imiilli ingerlattarsimavaa. Avannaani 66-issaannik Avannaani meeqqanut juullimi tunissutissat tunniunneqarput – suliaq ukiup ataatsip ingerlanerani suliarineqartartoq aamma ataatsimoortitsisartoq.

Tamatuma aallartinneqarneranut sakkutooqarfimmi sulisut tunngaviliisuupput – sakkutuut amerikarmiut, canadamiut aamma danskit, sakkutuujunngitsut isumaqatigiissuteqarlutik sulisut aamma tikeraartut – taakkua ukiup ingerlanerani bankortitsisarlutik aamma postkortinik tuniniaasarlutik aningaasanik katersuiniartarlutik. Aningaasat juullimut tunissutissanut atorneqaannartanngillat aammattaaq najukkami suliniutinut tapiissutaasarput, ilaatigut januaarimi qimmit nerisaassaannut piffissap tamatuma nalaani illoqarfimmi piniartut piniariarnissaminnut ajornartoornerisa nalaani.

Juullip inuata aggernissaa sumiuussutsit assigiinngitsut aallartitaraat, tassani peqataapput amerikarmiut, danskit, canadamiut aamma kalaallit sakkutuut aamma sakkutuujunngitsut ataatsimoorlutik katersuiniartarput aamma pilersuisarput meeqqat illoqarfimmi aamma nunaqarfinni avannarpasinnerpaamiittuni atorneqartussanik (pinngussat, atuartut atuarnerminni atugassaat, atuakkat). Ileqqup 1959-imi aallartittup Air Greenland tassani peqataavoq, ukioq manna pisussamut assartuinissamut qulakkeerinnittuusoq.  

Imaammat Qaanaap timmisartuussisarnikkut Namminersorlutik Oqartussanit sullissinissamik isumaqatigiissummut ilaalluni, tapersersuineq taamatut ittoq Namminersorlutik Oqartussanit akuersissutigineqaqqaartussaavoq, taamaattoqarporlu.

- Uannit assorsuaq nuannaarutigineqarpoq Air Greenland qulimiguulik atorlugu sullissinissamut isumaqatigiissuteqarnermigut Pituffik Space Basep juullimut atatillugu ileqqortoqaa tapersersorsinnaammagu, tassa juullip inuanik Qaanaamut tunissutissanik pajunnerani angallassinnaammagu. Misigisap tamatuma nuannaarneq aamma ataatsimoorneq pilersippaa, kiisalu tapertaalluni meeqqat nuannersumik juullimut misigisaqarnissaanut, Naalakkersuisoq Aqqaluaq B. Egede taamatut oqaaseqarpoq, novembarip naalernerani tapersersuinermik akuersissuteqarnermut atatillugu.

Suliffeqarfissuup Air Greenlandip pisortaanera, Jakob Nitterip tulluusimaarutigaa timmisartuutileqatigiiffiup pisumut tamatumunnga tapersersuisinnaanera.

- Operation Julemand (juullip inuata takkunnissaa) ileqquuvoq 1959-imili aallartinneqarsimasoq, aamma uagut tulluusimaarutigaarput tamatumunnga peqataasinnaagatta. Uagutsinnut apeqqutaasoq tassaavoq assartuinerinnaanngitsoq – tamatumani pivarput nuannaarnermi apuussinissaq aamma inuit akornanni attaveqatigiinnermik pilersitsinissaq Kalaallit Nunaanni sumiiffiit avinngarusimanerpaaffiisa ilaanni. Tamanna eqqaasitsineruvoq kusanartoq juullip nalaani ataatsimoornissamut aamma isumassuinissamut, Jacob Nitter Sørensen oqarpoq.

Tapersersuilluni aningaasaliinermut ilaapput juullip inuata aamma ikiortaasa aamma tunissutissarpassuit Pituffimmiit Qaanaamut qulimiguulimmik ingerlannissaat, tassani Qaanaami najukkami ataatsimiititaliamit, atuarfimmi aqutsisumit aamma kommunimi sulisunit nuannaarutigalugu tikilluaqquneqarput.

Soorlu assilisani takuneqarsinnaasut juullip inuata tikinnera kialaarnermik aamma nuannaarnermik takutitsivoq, siulliullugu utoqqaat illuat pulaarpaa aamma illoqarfimmi meeqqat timersortarfimmut aggiasimapput.

Pituffik Space Base Forbindelsesofficer (attaveqatigiinnermut naalagaq), Lars Hawaleschka, nuannaangaarpoq ileqqup ingerlateqqinnissaa iluatsinneqarmat.

Misigisaq tassaavoq asanninneq aamma juullimut qilanaarneq. Atuarfimmi atuartut angajulliit juullip inuaata tunissutissanik agguaanerani ikiuupput – juulli ilumut nalliussivarput aamma 2025-mi.

Air Greenlandip saniatigut Inussuk, Qaanaami Najukkami Ataatsimiititaliaq, US 821 Space Base Group, 22 SOPS – DET 7, 12 SWS, Aarsleff, InDyne aamma allarpassuit tapiissuteqarput, juullip inuata takkunnissaanut ukiup ingerlanerani tapersersuinermikkut.