Air Greenland attartortitsisarfimmik Carlyle-mik isumaqatigiissuteqarpoq, pilersaarutit malillugit 2027-mi aasaanerani timmisartuussinermi timmisartumik A320neo-mik attartornissamik. Attartornissamik isumaqatigiissut ukiuni arfinilinni atuutissaaq sivitsorneqarsinnaalluni, taamaaliornikkut Air Greenland Ilulissat Københavnillu akornanni aqqummi nutaami kiffartuussinissamut eqaannerussalluni, saniatigullu timmisartoq ingerlatseqatigiiffiup timmisartuanut A330neo, Tuukkarmut tapertaasinnaalluni.

Timmisartoq decembarimi 2026-mi tunniunneqassaaq kingornalu Kalaallit Nunaanni pissutsinut naleqqussarneqassalluni. 2027-mi upernaakkut ingerlalernissaa naatsorsutigineqarpoq, Ilulissat mittarfittaavani 2.200 meterimut 2026-p naanerani ammartussatut naatsorsuutigineqartumut ilaasoqarnerpaaffissaq siulleq angumeralugu. Taamaalilluni A320neo mittarfissuartaap pilersitaanik naammassisinnaasanik annertuseeqataassaaq.

- Airbusimik timmisartunik nutaamik pisinermi, tigunissaanut maannakkorpiaq ukiuni 6-7-ni utaqqisariaqartarpoq, taamaattumillu aalajangerparput timmisartunik attartorniarluta, ilaatigut Ilulissani mittarfissuartaap ammarnissaanut ilaatigullu aningaasatigut eqaannerusumik ingerlatsiniarluta, aqqut suli nutaajummat, Jacob Nitter Sørensen, CEO, oqarpoq.

Timmisartoq A320neo Københavnimi aserfallatsaaliorneqartassaaq. SAS-imi Air Greenlandip timmisartuanik A330-800 Neo Tuukkarmik aserfallatsaaliortareerpoq, taamaattumillu pissusissamisoorluni A320-mik aserfallatsaaliornissami SAS-imik isumaqatigiissuteqarnissaq A330-p saniatigut.

Timmisartoq Air Greenlandip sulisuinit timmisartorineqartassaaq Air Greenlandillu qalipaataannik aappalaartunik ilisarnartunik qalipanneqassalluni timmisartuutileqatigiiffimmit ilisarnaateqarluni. Timmisartut Airbusimeersut pingaaruteqaqisutut pitsaaqqutigaat timmisartortartut saqisullu A330-mik A320-millu kiffartuussisinnaagamik akuersissutigeriikkatik atorlugit. Tuukkami saqisut aamma taamaalillutik timmisartumik nutaamik A320neo-mik kiffartuussisinnaapput, Dash8-mi timmisartortartut ilinniarteqqinneqarsimasut aamma inuttaaqataaffigisaannik. Timmisartussap aqqa kingusinnerusukkut saqqummiunneqarumaarpoq.

- Ilulissanut aqqut nutaaq neriulluarfigeqaarput attartornissamillu isumaqatigiissut angallavigisatsinni periarfissanut nutaanut ammaassisutut takusinnaallugu. Minnerunngitsumik timmisartup anginerup A330neop kiisalu mikinerusup A320neop akornanni naammassisinnaasat naleqqussarsinnaalissavavut, Jakob Nitter Sørensen nangilluni oqarpoq.

Timmisartut suut atorneqarnissaannik nutaamik periusissiortoqarpoq, 2019-imi Air Greenland tamakkiisumik Namminersorlutik Oqartussanit pigineqalermat. 2019-imiilli Air Greenlandip timmisartuutini Airbus H155 qulimiguullit, H225 ujaasinermi annaassiniarnermilu atugassat, H125 attartortittakkat nutarterpai, naggataagut Airbus330-800neo Tuukkaq nutaarluinnaq pisiaralugu, imarpikkoorutissatut.

Timmisartunik atorneqartussanik periusissiornermi A330neo timminernik wetleasemik taaneqartartunik ilaneqartarput Jettimep isumagisaannik. Periusissiap ilagiuarsimavaa namminerisamik timmisartuutitaarnissaq jetmotorilinnik tunisassiat ima annertutigilissappata nammineq tunisassiarinissaat illersorneqarsinnaalerluni. Tassunga killittoqassaaq Ilulissani mittarfik ammarpat. Timmisartumik taassuminnga attortornermut atatillugu Air Greenlandimi Dash-8-mi timmisartortartut A320neo-mik timminissamik ilinniartinneqassapput.

Ilulissani Qaqortumilu mittarfissat ammarnissaat nunap iluani Dash-8-mik timminernut sunniuteqarnavianngillat.