Air Greenlandip siulersuisuisa 11. septembarimi ataatsimiinnerminni suliffeqarfissuarmiit ukiup affaanut nalunaarusiaq akuereqqammerpaat, aammalu inernera, 15,8 MDKK-nik amigartoorfiusoq iluarisimaarlugu oqaatigalugu. Ingerlatseqatigiiffiup ukiup affaata aappaani sinneqartoortarnera nalinginnaavoq. Mittarfiit nutaat atuutilernerisigut attaveqaatinut nutaanut nuunnermut atatillugu annertuseriaatissat appasinnerunerat aammalu aningaasartuutissat amerlanerunerat peqqutigalugit siulersuisut ukiup inernissaanut naatsorsuutigisatik appartippaat. Piffissamik eqquinnginnermut atortunillu pilersaarutaanngitsumik aserfallatsaaliuinermut aningaasartuutit suli qaffasipput.  

Air Greenlandip piginneqatigiiffiutaasalu (matuma kingorna suliffeqarfissuaq, aaqq.) 2024-mi 1. Januaarimiit 30. Juunimut ukiup affaanut naatsorsuutaat DKK 15,8 millioninik amigartooruteqarfiupput. 30. Juuni 2024-mi nammineerluni aningaasaatit DKK 732,5 millioninik amerlassuseqarlutik.

Naatsorsuutit akileraannginnermi KDD 21,1 millioninik amigartoorfiupput, tassalu siorna piffissamut tassunga naleqqiullugu DKK 29,4 millioninik ikileriarlutik (2023 DKK +8,2 millionit), tassalu sanaartukkanit pigisanik (A330 Norsaq kiisalu B212-it) tunisinerit pitsaasumik sunniuteqarput. Kaaviiaartitat ilanngaasereerlugit 4 procentinik qaffallutik DKK 854,5 millioniupput, tamannalu angalasut amerlanerunerinik peqquteqarpoq. Piffissami tassani aningaasaqarnikkut ineriartornermi takutinneqarpoq, aningaasartuutit tamarmiusut, isumakkeerinninnernik ilaqartinneqartut DKK 37,4 millioninik amerlisimasut, tamatumunngalu sanaartukkanit pigisat nutaat, tunisassiornerup annertusinera aningaasartuutillu ataatsimut isigalugit qaffakkiartorneri peqqutaapput.

30. juni 2024-mi angallavinni timmisartuussinerit 4.000-ngajaat sila peqqutigalugu taamaatinneqarput, siorna piffissap taamaalinerani amerlaqatigalugit. Timmisartut suluusallit atorlugit angallavinni piffissaq eqqorlugu timmisartuussinerit 77%-iusimapput, 2023-mi 79%-iusimallutik, tamatumunngalu pingaartumik silarlunnera peqqutaavoq.

- Aamma 2024-mi angallannerit pilersaarutaasut ingerlannissaannut sila unammillertitsingaatsiarpoq, tamannalu ilaatigut pisinnaasat atorneqarnerinik annikillititsivoq aningaasartuutinillu amerlisitsilluni, taamatullu sila peqqutigalugu aningaasartuutissat eqqoriarnissaat ajornakusuungaatsiarluni, Malik erseqqissaavoq.

Tamatuma saniatigut sullissinermi ilaatigut attaveqaatinut nutaanut nuunnissamut pilersaarutaanngitsumillu aserfallatsaaliuinissamut atatillugu aningaasartuutit amerlisimapput.

- Tamanna unammillernartuuvoq, taamaattumillu piffissaagallartillugu eqqarsaatiginninnissaq pingaaruteqarpoq, Malik Hegelund Olsen nangippoq.

Ingerlatsinermi avataaniit isertitat allat DKK 25,2 millioninik ikilipput, tamatumunngalu 2023-mi sanaartukkanik pigisanik tunisineq peqqutaavoq, kiisalu sulisunut aningaasartuutit DKK 22,8 millioninik amerlipput, aammalu piffissami tassani suliffeqarfissuaq piffissaq tamakkerlugu sulisunik 704-nik atorfeqartitsivoq, taamaalillunilu qaffariaatit 3,6%-iullutik.

Siulersuisut 2024 tamakkerlugu ukiup inernissaanut naatsorsuutigisaat ukiup affaanut naatsorsuutit tunngavigalugit appartinneqarput.

- Ukiumi angusassat DKK 90-105 millioniunissaat naatsorsuutigisimagaluarparput, kisiannili ukiup affaanut siullermut naatsorsuutit aammalu ukiup affaanut tullermut naatsorsuutigisat tunngavigalugit, maanna 2024 tamakkerlugu ukiumut angusassat akileraannginnermi DKK 50-65 millioniunissaat naatsorsuutigilerparput, oqarpoq.

- 2024-p aallartinnerani taarsigassarsinissamut sinaakkutissat DKK 275 millioniusut, pingaartumik sanaartornermut aningaasaliissutissat aningaasalersornerinut atorneqartussat pilersinneqarput, piffissamilu tassani taarsigassarsiassanut sinaakkutissat taakku tigusiffigineqanngillat, tamannalu aningaasaliinissat pilersaarutaasut ataatsimut isigalugit kinguaattoorfiunerinik peqquteqarpoq.

Oqimaaqatigiissitsineq DKK 2.252,4 millioniniit DKK 2.357,4 millioninut qaffanneqarpoq, tamannalu sanaartukkanik pigisat amerlinerinik aammalu akiitsut piffissami sivikitsumi akilersugassat amerlinerinik peqquteqartutut oqaatigineqarsinnaavoq.

Erseqqissaatigaa, unammilligassaqartoqaraluartoq Air Greenlandip aningaasaatitigut tunngavissaasa patajaanneri ingerlaannartut, nammineerluni aningaasaatit DKK 732,5 millioninik amerlassuseqarmata, aammalu akiliisinnaassuseq 31,1 procentinik annertussuseqarmat.

- Nammineerluni aningaasaatinut upalungaarsimanitsinni aningaasalersuinermi pisussaaffigut malippagut, aammalu tunngaviusoq suli patajaatsumik inissisimasutut isigineqarpoq. Suliffeqarfissuaq aallaqqaammut Nuummi nunani tamalaani mittarfiup ammarnerani, kingusinnerusukkullu aamma Ilulissani Qaqortumilu mittarfiit ammarnissaannut attaveqaatinut nutaanut ikaarsaarnissamut piareersarpoq. Taamaalilluni Air Greenlandip nunattalu tamarmiusup ukiut nutaat aallartissavai, tassanilu unammilleqatigiinneq malunniutingaatsiartussaavoq. Siunissaq pissangalluta ornipparput, Malik Hegelund Olsen naggasiivoq.

Asseq toorukku 2024-mi ukiup affaanut nalunaarusiaq aassinnaavat